Маня’’ округханана сяӈгова соявы’’, вадюданвы’’, тикахад’ ӈока по’’ ямбан манзаравы’’ хибяри’’ ханяӈыдо’ теда лаханась Архангельск’ маркана илевамдо’ мэ’’ӈадо’. Хибяхова таня манзаравась хаяць, хибяхова таняна хардадамдо’ тэмдась пенсиян’ тарпась илелъядаць, хибяхова нюдо’ нядабась тикы маркана иле’’.

Маня’’ яхадана хэвы’’ нина’’ харто’ общественный организациямдо’ сертавыць, ханяна ӈопой я’тер’’ хибяри’’ ӈобкана ма’’люрцеты’’. Луца’’ вадавна манзь – землячество. Тарця землячестводо’ ненецие округхад’ хэвы’’ хибяри’’ таня. «Тосавэй» – тарем’ нюмдевы.

Ямалкана агропромышленный комплексхана дирекция по развитию сельских территорий таня, таняна сян по’’ ямбан Евгений Вэрьевич Пурунгуй манзара. Пудана’ мэвна Саля’хардан тэворман’ мальӈгана пыда няюв лаханамась.

Нянэювна ты’’пэртя’’ хибярина ӈэрм’ яхана илена’’. Ханяна ӈока по’’ ямбан ненэця’’ тыдо’ пэрць мюсерӈа’’, тикахад’ илевадо’ пилибт’ пересь. Теда ӈод ты’’пэртя хибярихина ты’ сямянд’ таранада. Тэхэна нина’’ ӈэдалёрӈа’’, ты’ хибярим’ ембпида, ӈавламбида. Тэси’ ӈэрм’ ненэць илевада яӈгуд’ нив’.

Хибяхова манзарамамда ёльцесь, Архангельск’ маркана мятамда сертась, таня илелъяць. Хибяхова манзаравась’ таня еримы, термъв’ таняна иле. Хибяхова ӈани’’ нюда’’ нядабась илевамда тикы маркана мэ’’ӈада. Лидия Семеновна Лагейская Саляхана соявы не, тикахад’ ӈока по’’ ямбан культурахана манзарась. Нельминхана, тикахад’ Усть Кара ӈэсыхына культура’ харад’ ервотаӈэ’ тарась. Маян’ еримянда ӈэсонд’ савовна Карана илевамда мэ’’ӈадась, харвась таняна илесь. Теда пыда Архангельскхана не нюнда хэвхана иле. Няданда тарця вади’’ намдамась.

Валакада хойхана мюсерта’’ нина’’ хэбидя ялям’ мэтава’’. Тарця яляхана хамякова маля миӈа’’. Пилю’’ ирийхана хоян’ тиӈгуна’’, ты’’пэртина’’, мядм’ манзаям’ минренина’’ ныланава ялямдо’ мэта’’. Нито’ няюв лаханорта’’, манзара’’мидо’ ваде’’та’’, нерня илевамдо’ таслабгу’’. Поӈгнандо’ сянакода’’, сэдвы’’ манзаидо’ няхато’ манэ’’лабтаӈгу’’.

Валентина Нёликовна Няруй Ямалкана илена не. Пыда ӈока по’’ ямбан тохолкова ( образование) серкана манзара. Тохолкода. Илеванда ямбан тохолкова серм’ харвабтадась, теда ӈод ӈарка хибяриӈэ’ хэсь ивнанда ӈэда манзаямда нида хаембю. Манзаямда нерняри пэрӈада.

Округна школахана тохолкова по’ямбан тоходанавы’’ ӈацекы’’ ныланавась тарпыд. Няхар’’ ирий’’ ямбан ӈацекына ныхыдамдо’ ма’’лабгу’’.

Ханяӈы иба’ ян ныланавась ӈэдалаӈгуд’, хой’ тер’’ ӈацекэця нисянадо’, небянадо’ нядабаӈгу’’ – пыдо’ варёмдо’ мэць хойхана ныланаӈгу’’. Тамна тарця ӈацекына таня, хуний маркана, ӈэсыхына манзараӈгу’’.

Тюку по’ таӈы мальӈгана маня’’ округханана няхар’’ ю’’ няхар’’ лагерь’’ манзараӈгу’’, ханяна ӈацекы’’ яля’ ямбан ныланаӈгу’’, пыдадо’ савумдабгу’’.