Вы здесь

Нина’’ ихид’ лаханаць

Паднана няваʼʼ теневаʼʼ

Тюку по’ округна сиднтет ю’’пом’ ядабтаваць. Ӈарка ялуна’’ваеравы си’’ивна маттамдэй яляхана Няръяна маркана мэ’’ӈаваць. Ӈока ихид’ миндя’’ вади’’ округна нямна намдаваць, яндахат’ товы’’ мядондина’’ ӈокаць.

Тикы яля’’хана яӈгумы’’нина’’ӈод тензебтеваць, хуний илевандо’ мальӈгана хари’’ ямдо’ сахарамбась илець, харто’минревы’’ манзаяханандо’ хаевы сехэрыдо’нюдя ни’’ӈа. Тарця нина’’ хаевы’’ сарпявна маня’’ теда миӈава’’. Ӈопой тарця ненэця Алексей Ильич Пичков. Ненэцие’’ паднана, журналист. Пыда падвы манзаямнанда ӈацекына теда тоходана’’, хуркари’’ яханана танеда литературной ма’’лёвахана пыда падвы манзаида толабада’’ танесеты’’. Алексей Ильич Пичков ёнар’’ хасуюёнар’’ няхар’’ю’’ нябимдей похона Канин’ выӈгана соявысь, нися’ хасада ты’’пэртяӈэ’ таравысь. Нюдякоданда выӈгана вадюданась, тоходанна’’ пирӈэ’ хэсь пыда тоходанась’ пядась. Шойна ӈэсыхына си’’ив классм’ ёльце’’махаданда Няръяна март’ нерня тоходанвась’тэвыць. Округна еркы маркана педучилищем’ ёльце’’махаданда тамна нерня тоходанвась Ленинград март’ ӈэдалавыць. Тарця ӈарка маркана Институт народов Севера маля таневысь, ханяна ӈэрм’ яхад товы’’ ӈацекы’’тоходанаць . Алексей Пичков ӈарка маркана илесь, тоходанась нюртей падвы манзаида’’ ӈадимданаць. Ненэця хасава ӈацекы луца’’вадавна паднась. Нянэй ненэцие ила нямна, вы’ янда серо’’ нямна падвы ‘’ манзаида тянё’’ни’’ӈа’’. Хусувэй манзаянанда харта вы’ямда мэневамда манэ’’лабтамби. Ӈопой падвэнанда тарем’ лахана: -«Мань вы’ яв, мань сиципой’’ ханян иле. Мань ехэван’ пыдар’ сиципой’’ил’’еми яӈгу!»

Алексей Ильич сиднтет по’’ тяхана вэба ирийна маттамдэй яӈганя толыркана яӈгумась, Няръяна маркана сюры. Сиднтет по’’ ваерась хибярина паднана нямдо’тенедо’. Округна ӈарка ялу’’ мэ’’мана’’ мальӈгана паднана сюрвы ян’ тэворӈаваць. Таняна ма’’лась ӈока ихид’ миндя’’ «Заполярьем’» нюбета ЛитОбъединение манзаям’ нерня пэртя Инга Артеева хэтась. Пыда ихид’ лаханась, падвэмда толась. Ханяӈы нина’’ Алексей Ильич падвы луца’’ вадахад ненэця’’ вадан’сертавыдось. «Мараӈгаця» падвэмда луца’’ вадавна Пичков не нюда толадась, ненэця’’вадан’ падвэмда Роза Ивановна Канюкова толась.

Мария Яковлевна Бармич, Алефтина Ионовна Вокуева Алексей Ильич няюв’ илевандо’ ямбан ӈобт’ тэворӈаць. Пыдо’ӈопой школам’ Шойнахана ёльцець, тикахад’ малӈэ’педучилищехэна тоходанаць, тикахад’ ӈобкана Ленинград маркана илець, тоходанвамдо’ минрець. Тарем’нидо’ нядабась, ӈопой яхана нибнандо’иле’’ӈод, илевамдо’ мэ’’ӈадось. Мария Яковлевна, Алефтина Ионовна ӈобкана тохолковамдо’ ваде’’ӈаханзь, хуркари’’ мэкад иле’’ми няданди’ намдаваць. Ольга Латышева паднана падвы манзаям’ ненэця вадан’сертавэдась, тарця манзаямда намдаваць. Округна администрация нэрм’ тенз ненэцие’’ серу пэртя управление’ нерм’пэртя А.В.Дитятев ихид’ лаханась. «Ханибцё» коллективхана хыно’’та нява Людмила Булыгина сём’ ханась, таняна мэвы’’ хибяри’’янамбовна малӈэ’ хыно’’ладаць.

Илеванда ямбан А.И.Пичков ӈокавна манзаравы хибярись, паднава серм’ сававна теневанась. Пуданда хаювы’’книгида маля ӈока, теда ӈод ЛитОбъединение манзаям’ пэртя’’нина’’ паднана няна хаевы манзаи’’ ӈобт’ ма’’ламбидо, едэй книги’’ сертаби’’. Пудана’’ ма’’лёва манэ’’лабтада: хибярина паднанамдо’ тенедо’, пилибт’ тенеӈгудо’!