Вы здесь

Ненэця’’ ӈани’’ ма’’лаӈгуд’

Е.П. Тайбарей хыноʼʼта неʼʼ маʼʼламбиʼʼ

Хусувэй по’ Москва’ маркана «Сокровища Севера» нюбета Международной выставка- ярмарка манзарасьты. Тарця ма’’лёван ӈэрм’ тенз’’ мэта’’ ненэця’’ ӈод хусувэй по’ турцеты’’. Ӈэрм’ яхана иленаха’ таня ӈамгэм’ таняюв’ тэврась, таня ӈамгэм’ таняна манэ’’ лабтась.

Маня’’ округна хибяри’’ ӈод пудана’’ сян’ по’’ ямбан тарця выставка-ярмаркан’ ӈэдалёрцеты’’. Округна мел’’ хибяри’’ таняна мастер-классм’ манэ’’лабтабасьты’’, тикахад сё’’ мэта’’, тарана’’ ненэциена’’ коллектив’’ харто’ манзаидо’ тэрабсеты’’, тикахад’ округханана сертабада’’ ӈавор’’ ӈод таняюв’ тэврабсеты’’, ярмаркахана мирдапсетыдо’. Таня’’ ӈамгэм’ манэ’’лабтась.

Тюку по’ ӈод маня’’ хибярина’’ таняна мэць, мел’’ хибярина Няръяна маркад’, Несьхад’ таняна сян’’ яля’’ ямбан ты’’сие ниць ирийхана манзараць. Тарця выставка-ярмаркам’ ӈарка маркана маля хасую’’ по’’ ямбан’ ма’’ламбидо’. Няхар’’ ирий’ ваерась едэй пом, сидя ёнар’’ самлязимдей яӈганя пом’ ядабтаӈгува’’. Товнда по’ ӈод хуркари’’ сава сер’’ яхана тэвраӈгу’’. Сидя ёнар’’ самлязимдей яӈганя по’ нара тось, Москвахана ӈани’’ «Сокровища Севера» нюбета выставка-ярмарка ваеравнда. Тюкумэвахана юдимдеймэвна яндахат’ товы’’ хибяри’’ ма’’лаӈгуд. Теда маля тарця яля’’ха хамякова’’ миӈа’’. Хуркари’’ ӈэрм’ яхана илена’’ хибяри’’ хамяку’’, тикахад’ выставка-ярмаркам’ хамандабада’’ ӈани’ ядо’ ядэрӈа’’- ханзер’ товнда похона ваеравнда ма’’лёйм’ хамандаӈгудо’, хурка несэй ӈаво’’ танеӈгу’’, ханзер’ хусую’’ по’’ ямбан таневы выставкам’ несэюмдась.

Юдимдей «Сокровища Севера» выставка-ярмарка дирекция’ тикы е’’эмня манзара. Ханзер’’ тарця ма’’лёвам’ несэювна хамандась, хурка едэй ӈавори’’ манэ’’лабтась, тикы е’’эмня ӈэрм’ яхана илена’’ хибяри’’ ӈод харто’ и’ӈудо’ таняюв’ ӈэдарабто’ тара’’.

«Сокровища Севера» – тарця выставкан’ ӈэдалёрць хибярина маля торома’’. Няръяна маркана, округна ӈэсыхына илена’’ мел’’ нина’’ ӈод тарця яркаркан’ хусувэй по’ ядэрцеты’’. Пудана сян по’’ ямбан Заполярный раойн’ ӈэсыхына илена’’, манзарана’’ мел’’ нина’’ тарця ярмаркан’ ӈэдалёрма’’ е’’эмня есь’’ хобсеты’’. Маня’’ нина’’ харто’ манзаидо’ таняна манэ’’лабтабасьты’’, тикахад’ ӈани’’ яхад’ товы’’ нито’ манзаи’’ маниесьты’’.