Хусувэй школахана тоходанна’’ ӈацекы’’ хуркари’’ предмет’’мана олимпиады’’ мэцьты’’. Ныхытидо’ Межрегиональной олимпиадахана паднасеты’’. Хари’’ вада’, краеведение’ олимпиада’ ӈод танесеты’’.

Сян по’’ ямбан тарця олимпиадахана паднавась маня’’ округна ӈацекы’’ Саля’хардан’ ӈэдалёрцеты’’. Хэвхы округ’ еркы маркана ныхыдо’ манэ’’лабтабасьты’’. Ваеравы’ по’ тарця олимпиада’ дистационный режимхана ваерась. Тарця олимпиадан’ ӈокханда юр’’ самляӈг ю’’ сидя ӈацекы’’ манзаидо’ ӈэдаравыць. Я’мал сидя’яӈганя муниципальной образованияхад’ , тикахад’ Ханты-Мансийский округ’ Сургут’ маркад’, Белоярский районхад’, Кондинский районхад’ манзая’’ таняць; Красноярский край Долгано-Ненецкий муниципальный районхад’ манзая’’ тоць, маня’’ округна ӈацекы’’ манзаидо’ таняюв’ ӈэдаравыць.

Олимпиада сидя номинациядась: «Краеведение», «Родные языки». Мат’’ ю’’ ӈопой ӈацекы’’ харто’ вадандо’ олимпиадахана паднавыць. Ӈацекы’’ харто’ вадавнандо’ сочинении’’ падбиць, падвы’’ манзаидо’ луца’’ вадан’ сертавыдось; тикахад’ стихотворении’’ толабиць, хари’’ вада, литература викторинам’ мэ’’ӈаць.

Тюкумэвахана тэвравы’’ манзая’’ ӈокаювдо’ саць савовна падвы’’ ӈэвыць. Манзаи’’ манэ’’сармы жюрихана хэвхы’ округхы’ Региональный институт развития образования’ , Научный центр изучения Арктики манзарана’’ манзараць. Ваеравы олимпиадахана сиднтет победитель’’, сидя яӈганя призёр’’, няхар’’яӈганя лауреат’’. Тарця ӈацекы’’ малӈэ’ диплом’’ ня’’амӈгу’’.

Саля’хардахана хари’’ вада, краеведение’ олимпиада маля сян по’’ ямбан ӈацекы’’ ма’’ламбись. Маня’’ округна ӈацекы’’ таняюв’ няхар’’ по’’ ямбан ӈэдалёрнаць. Поӈгнандо’ тарця ӈацекына таня, хуний краеведение олимпиадахана сава результатм’ манэ’’лабтаць. Ненэцие’’ вадам’ пэрмахана хусувэймэвна Ямалкана илена’’ ӈацекы’’ нердевыць. Сидя ёнар’’ тетимдей’ яӈганя похона олимпиада’ дистационно миӈаць – ӈацекы’’ харто’ таняюв’ нидаць’ ӈэдалёр’’, валакада манзаидо’ ӈэдараць.

Маня’’ ӈацекына ваеравы Межрегинальной олимпиадахана тарця результатм’ манэ’’лабтавыць. «Краеведение» номинацияхана сиднтетимдей – ӈоб’яӈганя классхана тоходанна’’ поӈгана Анна Валей хасуюдимдей’ яӈганя местан’ тарпвыць, сидя ю’’ тетимдейӈэ’ Ирина Выучейская хэвысь – тохолкодадо’ Н.А. Вострикова; сидя ю’’ хасуюдимдейӈэ’ Иван Филиппов хэвысь, тохолкодада Л.И. Яковлева. Мал’’ӈацекы’’ Ненэцие’’ школа-интернатхана тоходана’’.

Нерняна ӈод’ хусувэй предмет’’мана ӈацекына олимпиады’’ падбаӈгу’’. Хари’’ вадавнандо’ паднана’’ ӈацекына харина таня, пыдо’ ӈод харвась’ паднасьты’’. Ненэця’’ вадам’ минрена’’ тохолкодина ӈод’ тарця серкана ӈарка манзаям’ сертамби’’:ӈацекыдо’ олимпиадаха’ хамадабидо’.