Округна толаӈго’ хардахана манзарана’’ хибярина тянё ни’’ӈа’’, хусувэй отделкана харто’ серудо’ тасламби’’. Минрена’’ манзаядо’ хибяри’’ е’’эмня таславы’’. Ӈэрм’ ненэцие’’ отделкана маня’’ нина’’ манзара’’.

Тарця отделна ервота Зоя Степановна Ивакилева. Маля ӈахэт’ манзарана не, харта манзаямда сававна теневана. Тамна ӈопой таняна манзаранава Надежда Николаевна Талеева. Ӈоб’ манзаямда теневана не. Пыди’ сидяӈэ’ ӈарка манзаям’ пэрӈаха’. Толаӈго’ хардана ӈэрм’ ненэцие’’ мят’ турта’’ хибяри’’ тянё нисьты’’ ӈа’’. Хусувэй туртам’ няхаюна’’ сава ихиня ядтабсетыдо’, тарана серкана нядабасьтыди’. Тамна отдел Севера манзаям’ пэртяхаюна хуркари’’ ихиня сомбой ма’’лёва хамадабсетыхы’. Тарем’ еримбнанда толаӈго’ харадхана манзарана нина’’ манзаито’ нямна ӈани’ ян’ ӈэдалёрмадо’ танесеты. Хаювы’’ яляха’’на Зоя Ивакилева Якутск’ март’ ӈэдалэяць. Тюку ирийна пудана’’ яля’’ пиркана тикы маркана толаӈгова’’ хардахана ( библиотекахана) манзарана’’ хибяри’’ ма’’люрӈаць. Якутияхана хусувэй по’ тарця ӈарка конференциям’ хамандабсеты’’, таняюв ма’’ламбада хибяридо’ яндахат’ турта’’ ӈэсьты’’. Тарця ма’’лёвамдо’ Якутияхана тюку по’ хамадаць. Хурка сер’’ библиотека манзаям’ пэртина сертамби’’, ханзер’’ хибяри’’ харто’ яханандо’ манзара’’. Мал’’ тикым’ тарця серкана манзарана’’ нина’’ таняна сян яля’’ ямбан тасламбидось. Маня’’ округхадана тарця ӈарка конференцияхана Зоя Степановна Ивакилева манзарась. Тикы нява округна толаӈго’ хардахана отдел Севера манзаравам’ нерня минренава. Ханзер манзара’’, хурка серу’’ толаӈго’ хардан’ турта’’ хибяри’’ няюв сертабасьты’’- тикым’ Якутскхана ма’’лавы’’ няхата’’ ваде’’ӈадась.