Харючи Вэсако нисями таня. Небями таня. Недко папами ӈани’ таня’’ нив’. Ӈоб’’ таханава’’ – Тысъя ӈацекэ. Ӈари’’ тайкуна Харючи’ Ӈарка ню нями танявонда. Ӈоб’’ таханада – Лэхэ ӈацекы. Тамна тяхакуна Харючи’ Ёнэй нями танявонда. Ӈоб’’ таханада – Вэ’’ли ӈацекэда. Няхар’’ ӈэсыхына няхар’’ ю’’ ёнар’’ тэва’’ ӈэ’’ нив’. Ӈэсына’’ ӈацекы’’ няхар’’ ю’’ хасава.

Няхар’’ по’ илева’’. Ӈавэ’’ твняхуна мань тарем’ мадм’: – Тысъя ӈацекэ сидя ӈэсыхы нид хокаркар’’, ӈацекэсавэй мал’ тэваран’’. Пон’ нись мы’’, сидя ӈэсы’ тер’’ тикандо’ то’’нё’’. Мят’ ханя’’ тю’’. Ӈамгэ’ пирка’’на харасяда ян’ вэн’’ тёрейд’’. Тарем’ сырпа’’ни ӈока’’ ӈэдалёда’’ итрев’ хамдома’’. Нита нерденя Тавысо’’ Сюдбя. Тад нянда пуй Марьико’’ Сюдбя не’ тэмдавэда. Пин’ тарпыв’’. Мэта хан’ ни’ ӈамдотанахани, хэвамбованани нулта’’ нидом’. Мань тарем’ мадм’: -Хибяда’’ ӈэбта’’?

Нита нерденя манзь ханада: -Ӈари маньзяван Тавысо’’ Сюдбям’ тэри нюбе’’ӈав. Хэвэхэми нями Марьико’’ Сюдбя. Ӈани’ вахалъяв’’: – Ху’, пэрӈара’’? Тавы’’ ванёбтей’’: – Харючи’ Няхар’’ ню’ ян’ пэрӈава’’. Ӈоб’’ не нядо’ мире’’ хэбиле’’ма, ӈэв’’ салаво’’ма ӈэрахавонода. Пюнина’’ мядона’’ маня’’ хоб’’нам’? Мань ӈани’ мадм’: – Пюнида’’ хойда’’. Тавы’’ ӈани’ ма: – Ӈоб’’ не нямда’’, ныхы матакана маня’’ ханаӈгува’’.Ӈари’’ тайкуй Марьико’’ Сюдбя ныхында е’’эмня не’ тэмдавэми. Мань тарем’ мадм’:- Ӈоб’’ не нява’’ мирквавнанда сянда вуни ӈа’’. Тэри ӈабцата ныхыхававна няхар’’ не няни ӈобто’ нидм’ тат’’.Тысъя ӈацекэ мядондит мэд ня’’мыбтахаркар’’.

Тахана хасава ӈавэ’’ пирка’’на сидя менаруйм’ нюдерць ӈадимя. Хасев’’ ӈавортан’ я’ сид’ ян’ саӈоми хэвы. Ӈока ӈэдалёди сэв сёбтыда. Нита нерденя Туӈгосо’’ Сюдбя. Ӈоб’’ тикы вада’’, ӈани’ нендувнзь товы’’. Ӈамгэ’’ пирка’’на ӈани’ ӈэдалёда’’ мядона’’ синда’’. Нита нердена Нюдя Хабт Пари. Ӈаркарка ӈэвы, техэ нумда хэв етя едеворӈа. ¬Ӈамгэ пирка’’на Тавысо’’ Сюдбя манзь ханада: – Сюдбя манзь ханада: – Нэкалта пяхана сит хоркадм’: «Выдараб’’нанд ӈоб’’ ненямд мирци’’ ханаӈгув.» Мань ӈани’ мадм’: – Вэ’’ли ӈацекы тикар хор’’. Ет’ ӈэда нем’ ханаван’ харва’’. Тет тыра’ мянм’ сидян’ пяди’. Вэ’’ли ӈацекы тад нэкалманда, Тавысо’’ Сюдбя’ ӈэваконда нимня сидя енядада выварць хаяха’. Туӈгосо Сюдбя выдаравы нянда ӈамдю’’мян’ ӈамда пяда. Тад нэкалманди’ Вэ’’ли выдара. Вэ’’ли ӈамдю’’мян’ Лэхэ ӈацекы паромбадараха. Лэхэ’ ӈэва’ нимня Туӈгосо’’ Сюдбя сидя енядада выварць хаяха’. Тикы нянда пуд Марьико’’ Сюдбя ӈани’ выдара. Нюдя Хабт Пари’ манзь ханада: – Мань яханани ныхыни пирад хось я’’мадм’. Ӈарками ныхыми сеяць то’’мами нив’ ӈа’’. Мань манэкав. Лата пя’ ядан’ та’ ӈамда’’ ни’’им’. Лэхэ ӈацекы нянда ядахана пан’ ӈу’ сянэраха. Тад нэкалманди’, Лэхэ ӈацекы сэртрем’ санэй’’.

Мань тарем’ мадм’: -Тысъя ӈацекы тикар хор’’. Недко папами ет ӈэда не. Тет тыра’ мянм’ сидя я’ вэт вэнпюлади’. Хуюмгартахана ха’’мандана яӈгу. Наӈэдя ялянди’ вэнпю’’ нидим’. Та’ ӈэсоӈгана Тысъя ӈацекэ’ сидя монзаӈгада манзадалъяха’.

Ӈамгэ пирка’’на пилибт’’ санэй’’. Нюдя Хабт Пари манзь ханада: – Харючи’ Нюдя ню, сит хоркадм’. Выдараб’’нанд ӈоб не нямд мирци’’ ханаӈгув.

Мань ӈани’ мадм’: - Ныхыхавахана няхар’’ не няни ӈобто’ нидм’ тат’’. Мирквавнандо’ ӈули’’ Нин сяй’’.