Ваеравы юр’’ по’’ тяхана округханана’’ ӈока тарана сер’’ таняць. Тарем’ 1931 по’ носиндалава ирий’ си’’ивумдей яляхана Оксинохона советско-партийной техникум’ нэць, ханяна яханана’’ тарана’’ манзаяха’ хибяри’’ тохолабась пяць, тохолкодаӈэ’ тоходанна’’ ӈод’’ таняць. 1934 похона нертей тохолкода’’ таняд’ тарпыдаць, мат’’ яӈганя тохолкодаӈэ’ тоходанвы’’ хибяри’’ дипломдо’ ня’’маць.
Нертей диплом’ ня’’амвы Федор Андреевич Хыльмась’, тикахад’ пыда сидя юкад’ вата по’’ ямбан тохолкодаӈэ’, директорӈэ’ округна’’ школаха’’на манзарась. Нябимдей диплом’ ня’’амвы Анатолий Иванович Рожин ӈэвысь. Тикы’ хасава маня’’ яхана’’ тоходанвась Архангельской область’ Шенкурской районхад’ товысь. Техникумхана ненэця’ вадам’ минренаӈэ’ тамальӈгы похо’’на Григорий Давыдович Вербов манзаравысь. Тикахана Анатолий Рожин ненэця’ вадам харвабтадась, ивъер’’ тохолабидась, тикахад’ нертей ненэця’ букварьм’ падась. Тикы’ пуд ненэця’ вада тохолкодаӈэ’ ӈокханда няхар’’ юкад вата’’ по’’ ямбан’ педучилищехэна манзарась. Пыда ненэцие’’ е’’эмня падвы учебной пособиеда’’, методической разработкида’’ сян юд’ по’’ ваерась, ненэця’ вадам’ минрена’’ тохолкодина’’ тенад’ манзаяханандо’ мэ’’эйдо’
Тохоламбада хибярита ихиня сава и’ӈуд хаевысь. Анатолий Иванович Сядеев педучилищем’ 1955 похона ёльцевэдась, тохолкодамда тензебтевахананда тарем’ падна: – Мань’ школа-интернатхана манзараван’ мальӈгана нини’’ хобсетыни’, литература’ музыка’ нямна лаханасьтыни’. Тохолкодава’’ ненэцие’ литература’’ нямна хонаркосьты, паднава серм’ пявы’’ нина’’ теневыдась. Тамальӈгана паднава серкана ныхыдо’ хорпавы ненэцие’’ Василий Ледков, Алексей Пичков, Прокопий Явтысой, Александр Канюков теневыдась. Ӈоб’’ мальӈгана си’’ми’ пысабтесь, Ледков Явтысый’ня падвы «Сававна падна» стихм’ тохолась нян’ ваде’’ӈадась. Тикахад’ Анатолий Рожин сертабавы манзаяха’’нанда ненэцие’’ стих’’ мэцьтыда. Ихинянда сава ӈэсьты ся’’ха луца’’ паднана’’ манзаи’’ ненэця’ вадан’ сертабасьтыдо’. Тарем’ лаханасьты: – «Тарана манзъям’ пэрць тара.»
Тамна Анатолий Иванович Рожин ява’’ саць мэнедась. Таӈы’ мальӈгана тудакуманзь’ ядэрцеты, ӈодинзеты, ханяӈэхэ’’на халядаӈгу. Ханяӈы’ мэвахана сими’ пэдаран’ тудако ма’’лаванзь ханзьты, ядэсумбава-хана’’ни’ хуркари’’ серу’’ таслабсетыни’, лаханаковада ӈока ӈэсьты.»
По’’ ваерась Анатолий Иванович Рожин’ то’’олха’ хибяри’’ пилибт’’ ихиняна хаюрӈа’’. Округна’’ образование’, культура’ серт’ масьтевы манзаяда’ тянё ни’’ӈа’’. Анатолий Иванович Рожин – РСФСР’ школа’ заслуженной тохолкода, илеванда ямбан’ сямянд’ тарана манзаям’ минревы. Пыда ненэця’ вада’ нерня’ илева’’ е’’эмня ӈокавна манзарась, сертавэда ӈока. Тикы’ е’’эмня, нянда, ӈарка вада’’!
Перевод на русския язык
Важное событие прошлого века
В 1931 году прошлого столетия произошло событие, во многом повлиявшее на культурное развитие нашего округа. В селе Оксино 7 ноября 1931 года состоялось открытие «кузницы национальных кадров» – Ненецкого комплексного советско-партийного техникума с педагогическим отделением. В 1934 году состоялся первый выпуск учителей, диплом №2 получил Анатолий Рожин, приехавший на учебу из Шенкурского района Архангельской области. Анатолий Иванович еще студентом заинтересовался ненецким языком, изучил его в совершенстве и стал автором первого ненецкого букваря. Его учебные пособия, методические разработки и спустя десятилетия используют учителя ненецкого языка.
Анатолий Иванович – заслуженный учитель школы РСФСР сумел сохранить, сберечь ненецкий язык для будущих поколений жителей тундры. И за это ему огромная благодарность.
