Вы здесь

Мэбець’ паднана нява

Округханана Лукерья Александровна Валей нювм’ ӈокаюв хибярина намдурӈадось, ханяӈына сэвхана манэць’ сававна теневадо’. Лукерья Александровна паднана не, тикы’ хавна сертамбадада ӈока ӈэсьты. Пудана’’ юкад’ вата по’’ ямбан этнокультурный центрхана манзара.

Пыда ӈацекы’’ литературно-творческой группа «Суюкоця» манзаям’ нерня минренаӈэ’ тара. Тикы’ хавна нида’’ «Пунушкам’» сертабась нядабасьты. Паднана’’ нита’’ манзаи’’ ӈобт’ ма’’лась книги’’, хуркари’’ сборник’’ сертабасьты’’. Манзаяда ӈока. Паднава сер’ хавна Лукерья Александровна, нянэй недрев’, ӈудида мэта некоця. Табхад’ ӈодякоци’ сертамби’’, хуркари’’ сянако’’; пена’ вархад’, хоба’ пускахад’ сомбой манзаи’’ сертабасьты’’. Тикахад’ нотный грамотам’ тенева, харта музыкам’ падби, хыно’’ӈа’’.

Тюку ирийна сидя юдимдей яляхана Лукерья Александровна Валей мат’’ ю’’ пода пангу. Со’’яма ялянда е’’эмня округна толаӈгова’ хардахана ӈэрм’ ненэцие’’ отделкана манзарана’’ няхаюна’ ма’’лёвам’ хамандаць. Тарця ма’’лёва мэта си’’ивна нябимдей яляхана сидна’’ ма’’лась. Паднана няхана ихид’ миндя вади’’ хэтвась товы’’ хибяри’’ ӈокаць. Лукерья Александровна падвы’’ манзаида толабись.

Маня’’ округна Ӈарка явна мюсерта ненэцие’’ мякана ёнар’’ хасуюёнар’’ самляӈг ю’’ няхарамдэй по’ ӈарка пэвдэй ирий’ сидя юдимдей толыркана сывы’ мюсерць яхандо’ мюсевандо’ мальӈгана хад’ яляхана не ӈацекы соявысь. Нисяда Александр Дмитриевич Валей, небяда Мария Симоновна тамальӈгана «Красной Октябрь» нюбета колхозхана манзаравэхэсь. Не нюкцямди’ Лукерьяӈэ’ нюмдевэдись. Янамбовна не нюди’ выӈгы муно’’ намдорць вадюданась. Мякандо’ ма’’лёда хибяри’’ харвась’ ӈатесетыда, теневась – хибяри’’ тобнандо’ мякана пэвсюмбы’ ямбан хыно’’та’’. Тарем’ нюдякоданда ӈока ярабц, сюдбабц намдвы. Нися’ хасанда сё’ саць мэбе’’ӈась, ӈока сюдбабц теневась. Небя’ хасада ӈани’ лаханако’’ теневась. Хусувэй яля’ мядм’ манзаида ёльцесь нюкцида ма’’лась лаханако’’ ваде’’мы’’ ӈэсьты. Тикахад’ Лукерья тохолкода пир’’ӈэ’ тэвась Усть Кара’ ӈэсыхына тоходанась’ пядась. Хой’ не ӈацекы харвась’ тоходанась, хусувэй ӈамгэм’ теневаван’ харвана то’’олхась. Школамда маля Амдермахана ёльцедась. Таняхад’ Няръяна март’ тось, тохолковамда педучилищехэна минредась. Тамальӈгана «Хаяркана» тарась, студент’’ литературный конкурсхана падвыда’’ толабасьты.

Педучилищем’ ёльце’’махад’ манзарава пядась. Пирибцяко Хорей Веркана манзарась, паднава серм’ нидась хаебю. Сёнзянда мюйхад’ миндя’’ вадида падарт’ падбасьтыда. Нюртей падвы манзаида ёнар’’ хасуюёнар’’ си’’ив ю’’ си’’ивумдей похона «Дружба народов» журналкана ӈадимяць. Тикы’ пуд округна, областьна газетахана падвыда танесеты. Сяӈгова Лукерья Александровна Алексей Пичковм’ ядабтась. Тикы ненэць маля ӈокавна паднась, тамальӈгана тандая паднава серм’ пявы нямда нядадась.

Тюку ялян’ хэтась, Лукерья Александровна падвыда маля тянё ни’’ӈа’’. «Золотое солнце», «Голос кочевий», «Улыбка белолицей ночи», «На ладонях тундровых просторов», «Прочен остов чума».