Сидя ю’’ тет по’’ тяхана ӈэрм’ яхана ханярина ассоциация’’ ӈадимяць, хуний хусувэй яхана ненэциедо’ нядамбава е’’эмня ӈадимдевыць. Таӈок’ пир’ по’’ ямбан Москва’ маркана ӈарка ассоциациява манзаямда минреда.

Манзаям’ нерня’ пэрма серудо’ Координационный Советхана манзарана’’ ненэця’’ минрейдо’. Тарця Совет’ ма’’лёвахана сямянд’ тарана’’ серудо’ таслабсетыдо’. Мат’’яӈганя по’’ ямбан Всероссийский ассоциацияна ӈэвахана мэнаӈэ’ Сергей Николаевич Харючи манзарась. Теда пыда ты’’саполана ирийхад’ ассоциацияна Совет старейшин’ манзаям’ пэрӈа, ӈацембой нида’ ӈод ассоциация’ манзаравахана нядамби.

Носиндалава ирийна еркы толыр’’ мальӈгана Москва’ маркана ӈэрм’ тер’’ ненэця’’ ма’’лыць. Ӈарка Ассоциациява’ Координационной советамда мэ’’ӈась. Ӈэрм’ тер’’ ненэця’’ ханярид’ ӈарка март’ товыць, ӈокханда самляӈг ю’’ делагат’’. Ассоциацияна Советхана сямянд’ нерде вадам’ ханавы Григорий Петрович Ледков, тикы’ хасава ты’’ саполана ирийхана ваеравы ма’’лёйкана ӈарка ассоциацияна президентӈэ’ тэравы. Пыда ассоциацияна по’ пеля ваеравы манзара’’мамдо’ ваде’’ӈадась.

Тикахад’ Координационный Советхана ӈэрм’ тер’’ ненэця’’ илелава’’ яха’’на ӈэда’’ область’’, округ’’ ӈэвахана мэни’’ няюв’ ӈобкана манзаравандо’ е’’эмня соглашение’ падарт’ пидте’’мидо’ ӈабтавыць. Тикы’ хавна тамна нерняна министерства’’, агентства’’, газм’ ӈэкалпада предприятия’’ манзаядо’ ӈэрм’ терхат перени’’ ӈани’ тарця падро’’ сертаӈгу’’. Ӈарка ассоциацияна ӈэвахана мэнава таӈы яляха’’на Дальний Восток нямна ӈэдалёрмысь. Таняна ӈэрм’ тер’’ ненэцие’’ иладо’ незел’’ нивы’’ ӈа’’. Нянэйвана халям’ хадабава, халясавэй иде’’ тярпвандо’, халя ӈокадм’ тасламбвандо’ ёльцяӈгана тоенана серодо’ ӈокаворӈа’’. Тикы’ хавна ты’’ хадырць я’’, ханелава’’ ёдо’ хусувэй по’ тянюворӈа’’. Пудана по’ закон’ саир’’ яӈгво’’махад ваде’’мыда саць тоенана сер’’ӈэ толы’’. Халян’, ханеван’ харваб’’нандо; ӈэрм тер’’ ӈэвадо’ ӈани’ тасла тара. Теда серо’ тасламбабато’ тэнзамдо’ нидо’ вадес’’, тикыдо’ падаркана падбато’ тара. Законхана ӈамгэ тенз’ ӈэвава’’ падбата, таӈок маян’ ненэциена ни’’ еримберт’. Тикы’ нямна Ассоциациява’ теда манзара.

Ваеравы Координационный Советхана тад’ нерня манзаравнда ненэцие’’ тэраць, таняна сидя ю’’ сидя хибяри’’ манзараӈгу’’. Хуркари’ я’ тер’’ таня, маня’’ округхадана ӈарка ассоциацияна вице-президентӈэ’ Юрий Аркадьевич Хатанзейский тэравыць, Ямалкад’ таняна манзаравнда Валерий Федорович Елескин.

Ӈарка ассоциацияна президент’ Григорий Ледков, тамна РФ Государственный Дума депутатӈэ’ Ямалкад’ тэравы. Депутат’ серуда’ тасламбась ваеравы ирий’ пудана яля’’хана Ямалкана манзарась, таняна илена’’ хибяри’’ няюв’ тэворӈась. Хуркари’’ тарана сер’ нямна лахарё’’ мэ’’ӈаць.