Носиндалава ирийна хасуюдимдей яляхана округхы’ музей хардахана маня’’ яна’ тер’’ хибярина ма’’люрӈаць. Тикы яляхана едэй хамандавы выставка няӈгартамбэясь. Тарця выставка ненэця падтаӈгода няна Нина Васильевна Валейской си’’ив ю’’ понда панва нямна сертабэй.

Нина Васильевна Москва маркана иле, таняна ӈока по’’ ямбан ивнянда ӈэда манзаянанда манзара. Округханана нибнанда иле ӈод’ харта Нюдя ямда саць мэнеда, пилибт’ тенеда. Няръяна маркы музейхана юкад вата пыда падтавы манзаида’’ таня’’. Нина Васильевна саць творческой некоця, нянэй недрев’ ӈудида мэтакоця. Ӈухукомна сэдорана не, пыда ӈудаханата сертавы ӈухукуда маня’’ сян’ манэ’’цетына’’. Нина Васильевна сертавы ӈухуко’’ хасую’’ по’’ ямбан музейхана лэтбидо’, таня турта’’ хибяри’’ маниесьтыдо’.

Нерняна товнда ирийхана округханана ненэцие’’ культурана, вадана нямна хамандавы’’ яля’’ ваераӈгу’’. Тарця яля’’ мальӈгана  ӈарка, юнета падтаӈгода нява мядоманзь’ харта со’’явы яханда товась ятна. Тамальӈгана округна музейхана, «Арктикам’» нюбета мякана падтаӈгодава ядтась пиртава’’. Нина Васильевнава Няръяна маркана  ӈатева’’, маймбась ядтаӈгува’’.