Няръяна маркана илена’’ хибярина ӈокаювдо’ ӈопой яхана’ хасенам’ ехэра’’. Ханяӈына сё’’ мэ’’манзь’ ма’’люрцеты’’, ханяӈына хуркахова спортивной секцияха’ тэворцеты’’, хибяхова ӈани’ хуркари’’ кружокха’, клубха’ ядэрцеты’’. Хусувэй хибяри ивнянда ӈэда мэбебцомда мэцьты.

Няръяна маркана «Мел’’ не’’» клуб’ таневам’ ӈока намдсетыва’’, таняна не’’ ма’’люрӈа’’, сэдора’’. Тарця клубхана сэдорана’’ не’’ манзаи’’ маркана танеда выставкахана маниесьтына’’. Пыдо’ сэдвы манзаидо’ манэць пысасьтына’’. Манзаидо’ ёльце’ сомбой ӈэсьты, тёмбекавна’ сэдвы, сэдо’’водо’ пуде’’раха ӈэсьты’’.

«Мел’’ не’’» клуб’ тюку по’ самляӈг пода паны. Таняна сэдорана’’ не’’ клубандо’ со’’яма ялям’ мэ’’мась ӈарка пэвдэй ирийна няхарамдэй яӈганя толыркана ма’’лыць. Клубандо’ со’’яма ялян’ мел’’ не’’ ӈарка выставкам’ хамадавыць. Пыдо’ ӈудахататто’ тарпвы’’ манзая’’ маля ӈокаць. Маня’’ сэврина’’ мэ’’ӈаваць, ихиня савархась – нина’’ ненся’ ӈод мел’’ ӈэвы’’.

Тарця ма’’лёвам’ Марина Валентиновна Маргось нэдась. Тарця вади’’ хэтась: – Тюку яля’ выставкам’ нэмбива’’- «Времени живая нить» тарем’ нюмдевы. Самляӈг по’’ тяхана тюку’ хардахана не’’ ма’’лэйдаць, тюкон’ манзаравась’ тоць. Тамальӈгана ихинян’ мадамзь: ма’’лэяд’ сава, тянембёвна тюкон’ турта’’, манзаидо’ сертабаӈгу’’, лахарёдо’ мэта’’. Тикахад’ янамбовна выдараӈгуд’, ни’’ турт’, хардакова хаеӈгудо’. Тикы яляхад’ наӈгадя’ самляӈг по’’ ваера. Сомбой некоцин’ хусувэй си’’ивхана ма’’лы’’, турӈа’’, сэдора’’. Тюку яля’ маниена выставкахана мел’’ не’’ манэ’’лабтамбидо: ханзер’ пыдо’ ивняндо’ ӈэда серм’ нерня минредо’, сямбирувна пыдо’ мэбе’’ӈа’’. Теда маня’’ мел’’ нена’’ харто’ яханандо’ хуркари’’ выставкахана манзаидо’ манэ’’лабтамбидо’, тикы’ хавна маля ӈани’ яханана танеда выставкаха’, фестивалька’ тэворцеты’’. Не’’ ив’ ер манзарана’’, нянэювна харвабтана серм’ пэртя’’. Нерня’ ӈод таремъв’ хардаконана ма’’лёя, манзарая. Клубан’ турта’’ хибяридо’ ӈокамданая!

Елена Киприянова Чудинова маля ӈахакуд’ «Мел’’ нехэна» сэдора. Хусувэй си’’ив маттамдэй яляхана маймбась сэдоравась ядсеты. Пыда ӈудаханата сэдвы манзая’’ выставкахана маля ӈокаць. Ӈухуко’’, панно’’, падтавы’’ ӈавори’’ таня. Елена Киприяновна манзаида манэ’’лабтабась тарця вади’’ мэ’’ӈась: – Тарця ӈухуко’’ Канин’ выӈгана мюсерта’’ хибяри’’ сэдбада’’, невхэна ӈухукуна тарця ӈэсьты’’. Хан’ месеркад’ сэдбадаць, невхэна ной, ӈодя яӈгуць. Хуркари пускэцяхад’ сэдорасьтыва’’. Мань’ нюдякоӈэ’ тарця ӈухукохона сянакумась, лавкахад’ тэмдабэй сянакуна’’ яӈгуцьнё. Неява масьты: сэдорада, ӈухуком’ сэдхова, ӈацекым’ ембкова’’.

Самляӈг по’’ ямбан «Мел’’ не’’» клубхана сэдорадм’, тюку яля’ самляӈг пова’ паны. Маня’’ ӈарка ялява мэ’’ӈава’’, тарця ялян’ маймбива’’. Тюку’ хардан’ харвась’ турцетыва’’, сэдорасьтыва’’, нина’’ манэць’ маймбасьтыва’’. Нюртей’ тобнан’ мань’ маля, хойхана вадювэӈэ’, нибям’ ня’’амбась теневамась, ӈумбъяв’ со’ пикцянан’ пересь, сэдорамась маля.

«Мел’’ не’’» клуб’ со’’яма яляхана сейхад’ хэтвы’’ вада’’ ӈокаць. Сэдорана’’ нехэ’ лаханаць – С.К.Никулин маркы’ администрациянана культура’ серу’’ нерня минрена, А.Н.Бурдыка маркы культура’ харад’ ервӈэ’ тарана, А.И. Лыченко округна администрация’ культура серм’ пэртя ӈуда’ ӈылы. Пыдо’ мядонзэйм’ тэвраць, грамоты, благодарность нехэ’ тэвраць. Тикахад’ клубхана сэдорана’’ не’’ ӈод харто’ вадидо’ хэтбиць, ваде’’ӈадось: ханзер’ манзара’’, ханя тэворӈаць, ханзер’ мастер-класс’’ мэцьты’’.

Теда клубхана сэдоранина’’ ӈухокори’ ни’’ сертамбю’’, пыдо’ маля нянэй ӈарка манзаи’’ сэдбасьты’’.

Тюку яля’ мань’ ӈод мел’’ нехэ’ тарця вади’’ мэ’’ӈадм’: пыдара’’ ӈарка серм’ пэрӈада’’, нянэй мел’’ неда’, нерня’ ӈод тамбир’ манзаямда харвась’ пэрӈара’’.