Вы здесь

Институтна’’ хасуюр’’ пода

Все они – выпускники Института народов Севера / фото из открытых источников

Санкт-Петербург’ маркана мале 90 по’’ ямбан’ институт народов Севера манзаямда минреда. Ӈэрм’ я’ тер’’ ненэця’’ мале таӈок по’’ таня тоходанаванзь тэворӈа’’.

Ӈока хибяри’’ таӈок по’’ ямбан’ таняна тохолковамдо’ ёльцевы’’, тикы пуд’ мал харто’ яханандо’ таралъядаць. Ӈэрм’ ненэцие’ институт’ ёльцевы’’ поӈгана тохолкода’’, паднана’’, журналист’’, ерв’’, учёной’’… харто’ яханандо’ илесь ӈарка манзаидо’ минре’’.
Тюку ирий’ нертей яля’’ пиркана институтва’’ юбилеямда мэ’’манзь хамякусь, таняна тоходанавы’’ хибяри’’ Санкт-Петербург’ маркана ма’’лаванзь ятнаць.
– Маня’’ институтна’’ со’’яма ялям’ мэ’’манзь товаць. Ӈока’’ по’’ ваера’’ ся’’ня тюкохона тоходанаваць, ханяӈына’’ мале ни’’ манзара’’. Маня’’ това’’, институтва’’ паклы, ниня манзарава’’ яляха’ еримяваць. Ханзер’’ ӈэӈгува’’? институтандо’ юбилеян’ товы’’ хибяри’’ тарця вади’’ хэтаць.
- Питербургхана Ассоциация КМНСС и ДВ РФ представительство’ тане, таня сид’’на’’ тэвраць. Ассоциацияна’’ петербургской отделение’ манзаи’’ тасламбада’’ нина’’ маймбась сид’’на’’ ядабтаць. Ӈобкана ма’’лась лаханакурмина’’ тянё ниць’ ӈа’’, хусувэва тоходанавы пода тензебтембись.
Александр Петров’, доктор филологический наук, мале ӈахы’ похот институтхана манзара, пыда мядондито’ е’’эмня ӈэрм’ ненэцие’’ институт’ история’ нямна презентациямда манэ’’лабтась.
Тены’’ похо’’на’’ институтхана тоходанана’’, ассоциация’ манзаи’’ минрена’’ ӈацембой ненэця’’ Татьяна Вельвина, Арина Тадырова, Галина Веретнова ваде’’ӈадонзь, ханзер’’ студентна’’ тоходана’’, ханзер’’ илевамдо’ ӈарка маркана минредо’, хурка серу’’ ӈобкана ма’’люрць таслабсеты’’.
Яндахат’ товы’’ хибярихи’ ихид минрена вадида’’ видеосвязь’ мэць Всероссийской ассоциацияна’’ президент’ Григорий Ледков хэтась.
Тарем’ тюку по’ Питербурган’ турмы’’ ӈэрм’ я’ тер’’ ненэця’’ институтандо’ ӈарка ялям’ мададонзь.
Маня’’ яна’ тер’’ хибяри’’ тикы институтхана нертей похот’ тоходанаць. Таняна тоходанавы’’ поӈгана теневана’’ нина’’, хибя илевандо’ ямбан’ тарана манзаидо’ минре Мария Яковлевна Бармич – Герцен’ нювм’ нюбета университет Почётной профессор, тохолкоди’’ тохолкода. Манзараванда ямбан’ сертавы манзаи’’ ӈока. Роза Ивановна Канюкова, манзаравы пода’ округханана’’ ваераць, теда’ нод’’ ӈопой яхана нисеты хасена, ненэця’’ вадам’ тохоламбавахана тарана’’ учебник’’мана манзарасеты. Ненэця’’ паднана’’ нина’’ нертей падвы’’ манзаидо’ институтхана тоходанавандо’ мальӈгана ӈадимяць, тикахад илевандо’ ямбан’ паднава серм’ минрець. Ӈэрм’ яхана Алексей Ильич Пичков, Прокопий Андреевич Явтысой теневана’’ паднана’’.  Танок по’’ ямбан’ сян’ хибяри’’ таняна тоходанаць, толава’’ серта яӈгу. Теда’ ӈод’’ тоходанаванзь ӈацекына’’ тэворӈа’’. По’’ваерась пыдо’ харто’яхандо’ манзараванзь тэвӈгуд.