Ю’’ по’’ ямбан Москва’ маркана «Сокровища Севера» международной выставка-ярмарка танесеты. Хусувэй по’ ӈэрм’ яхана илена’’ хуркари’’ тенз’ мэта хибяри’’ таняна нара’ мальӈгана ма’’люрцеты’’.

Сян’ яля’’ ямбан харто’ яханандо’ ӈаву’’ пэрмамдо’, ханзер’’ илевамдо’ манэ’’лабтабсеты’’. Тикахад’ харто’ илесь’ мэта’’ мядудо’ тэврасьты’’, таня турта’’ хибярихи’ кухнямдо’ манэ’’лабтабасьты’’. Ӈэрм’ яхад’ товы’’ хибяри’’ харто’ ӈаврадо’ тэврабсеты’’. Хуркари’’ фольклорный коллектив’’ харто’ хамадавы’’ программыдо’ манэ’’лабтабасьты’’. Москва’ маркана илена’’ хибяри’’ харвась’ таня’’ турцеты’’. Пыдо’ ӈэрм’ ненэцие’’ ил’ теневаван’ харвадо’, нянандо’ мэкадарха’. Маня’’ яхадана тэвравы’’ халям’, ӈамзам’, ӈоди’’, хуркари’’ сувенир’’ харвась’ тэмдабасьтыдо’.  Теда товнда поход’ тарця выставка-ярмарка ӈани’ таневнда. Валакада сидя ёнар’’ маттамдэй яӈганя поход’ едэй яхана ваерась’ пэрта. «Сокровища Севера» выставка «Сокольники» конгрессно-выставочный центрхана тюкумэвахана манзараӈгу. Несэй яхана ӈани’ сава ӈэӈгу. Сокольники – ӈарка парк, яда’ ӈока’’. Москва’ маркана илена’’ хибяри’’ таня ныланавась’ харвась’ турцеты’’.

XI Международная выставка-ярмарка «Сокровища Севера 2016» манзаямда 2016 по’  ты’’ сие’ ниць ирий сидя ю’’ сиднтетимдей яляхад ты’’ ниць ирий нябимдей’ толыр’’ ӈэсонд’ манзараӈгу. Тикы яля’’ мальӈгана таняна тамна «Кочевье Севера» фестиваль’, «Полярный стиль» этнической мода тетимдей фестиваль’ яндахат’ товы’’ ӈэрм’ ненэця’’ ма’’лаӈгу. «Народы Севера приглашают друзей» ныланава яля’ ваерагу.