Мяд’мюй’ ялэма’ сер’ нисяв тю’’у’ юркота пядась, таминда юрка я’’мадась. Саӈговота ӈэвада манябэдрев’ сальнянда ни’ мантэяць. Пыда ярта не папан няюв’ вареката сюрхалъяць. Нисяна’’ сята ӈарханда вэясипой’’ моренась, вадетадо’ мада вэяда яӈгусь. Пыда ӈамгэхэвам’ хэтван’ харванархась. Хэтувнда вадамда хэта я’’амванда нид сята сянхава’ пай нэкалӈадась.
Тад тикы’ пуд едянда тебнадрев’ сята сянмбой’ вантаръяць. Пыда пибтимда сякалманда сер’ сэта хаял’’ мунзи’’ ха’’мыдаць. Нисява’’ сэвта хаял’’ хамдомбава’ ямбан’ ӈобкарт’ ниць вахал’’. Мань ӈули’’ сяхаӈгарт’ ими тарем’ нись тоса’’. Таӈар мэбета ненэць’, хибяхартам’ нина пилюта ӈобтарем’ ярцетвы, ӈаво’’ирка’’на вареката тыхынахава вахалй’’: - Мань ню’’н небя, пудана мэва’ япда итми татнакэн…
Небява’’ паромбари хоб’' поӈгана сюрда нярава едамда тюхулӈа. Ита ед’ салабам’ тубкахана сарада’’махаданда яракохона нисяна’’ ит сахалӈа. Нисява’’ сидя сян няндеридм’ ӈаво’’махаданда манзь ханада: - Ӈота ӈод’’ идро’’махадани едями нямзерта’ то’’лаха. Иб’’ лаханаван’харвадм’ – лахананив пирас’’. Илевани ямбан’ ӈока маям’ мэ’’ӈадм’, ӈокахабця’ нянзихид нялкарасетыдм’. Маяндорць мадавы ялямитянё вуни ӈа’’. Тедахава’ ет’…
Нисява’’ мунзялво’’махаданда ханзеркава’ сидита нямна сейнда пиннадрев’, ӈамгэхэвам’ пюнядрев’ сысумби.
Небява’’ тарцям’ манэць, сейнда хэва’ сер’ ма: - Нявэ’’, ӈамгэр хадкэ? Нисява’’ небяхана’’ сэвхаюда мунзи’’ пидебихиюда. Пыда небяна’’ сякана ӈамгэхэвам’ ханзпада’ то’’олхась. Екар’’ небяна’’ и’ ханямна ядэрмам’ тасламбвы ӈэбтав’? Тарем’ сыро’’махаданда мась: - Хадри’ мань пирми ӈэдараха. Мань пумнани пыдар ӈод’’ минханд тут’’нинав’. Нюкцяхаюни’ маяндорць хаёвндархаханё’’. Пыди’ някади’ ӈани’ хыйва’’ яхана вуни иле’’.Маяндортаӈэ сидди’ хибя ханаӈгу?
Нюдя не папами нисян ӈобкад сяндада ӈэсеты. Пыда Еванем’ нянда хаӈада. Еванеӈэ нисянда няна вареката яда хая. Нисяв не папакоми пулыта ни’ ӈабтахая не нюнда тырцортана ӈэва’ тарм’ нямзьледа. Ӈани’ ӈамгэхэва вадам’ пыда тамна хэтван’ харванархась…
Нисяева’’ нясанадна’’ни хань’’. Лакри’ хораканда нэрна пэва’ сер’ небями сейнда хэсь нисяхани’ санэй’’, пыда таминда ярума.
Тарць’’ ямбхана нисява’’ ӈамгэхэртахат ехэрась, пили’’ индцялмась. Небями нисян ӈэвам’ пулэхэюта ни’ мэдась. Таддикахад пыда ӈэвамда мунзипой’’ нисяна’’ ӈэва’ ни’ туямладась. Мань сэвха’’нани нисями ямбумдадрев’ хэвысь. Мань ӈамгэхэртам’ нидамзь хамэда’’. Ӈамгэ’ небями нисяни ӈэва’ ниня пон’ мунзипой’’ ярмы ӈэбта?
Пыда хайлата помна мани’ няни’ сылы’’, нид яраць ма: -Мань сидя маяндортакоехэюн, нисява’’ нясанадна’’ ни хань’’.
Мань небой хэвы похона пыда няданда ӈобтарем’ тарця вади намдадамзь, тамальӈгана небяв ӈани’ тарем’ мась: - Тадхава, пыдар ӈарка някар – Иванко нясанадна’’ ни хань’’. Тикы вади мань минхани тензебтейн. Тамальӈгана няками ямб ларас’ мю’ мэ’’махадана’’ я’ ваӈган’ сюрӈаваць. Тикы’ таляюв’ Иванко сян’ нись ту’’. Лакри’ ими тарем’ ядэлы’’: - Нисями ӈобтарем’ Иванко’ тотрев’ хаеӈгодакэва’’?