Тюку по’ Россиянана литература’ поӈэ’ таславы. Паднана’’ ненэциена по’. Маня’’ ӈод яханана паднана’’ тянё вани’’ӈа’’. Нянэювна паднавы’’ нина’’ малӈэ’ тенейна’’.
«Илебц» театрхана сянакода’’ нина’’ маня’’ паднана’’ ненэциена падвы’’ манзаи’’ теда радиона толабасьтыдо’. Радиовна’ Василий Ледков падвы манзая’’ маля сосьты’’, стих’’ толабада’’ – « Мань тын’’» Нина Баркулёва , «Ярӈа нюняр’» Валентина Тайбарей, «Хыносма’’» Фаина Ледкова, «Тирти лэтмбан’!» Матрена Талеева , «Хохорэй» Серафима Дуркина, «Ханебцё» Валентина Чупрова, «Мерця» Надежда Талеева.
Ханяӈыдо’ маля намдурман’ хабедаць. Вадамдо’ мэта’’, вадамдо’ теневана’’ нина’’ харвась толанзёвась’ студиян’ тэворцеты’’. Пыдо’ паднана манзаи’’ со’’ теневыдо’.
Василий Николаевич Ледков 1933 по’ ӈарка пэвдэй ирий’ маттамдэй’ яӈганя толыркана соясь. Баренцов яв’ ӈохона – Варандейхана ӈэда школа-интернатхана мале сян по’ манзара”махаданда падвари манзаян’ ха”мыць. Ледков падвэда ӈока: стихотворения’’, поэма’’, повесть’’, роман’’.
Харта янда’ нямна ненэця’’ вадавна паднась. Падвэвнанда хынокад’ нина’’ сё’’ мэ’’ӈа’’.
Хохорэй
Ныхи”ями’ тамна ёльцевадавэй,
Сехэрыни’ тамна ханавадавэй”.
Яни’ сяд’ нина васаборӈадм’,
Ини’ ёрха”на ёхоборӈадм’.
Сарпякуни’ тамна вэтавадавэй,
Ини хамбахана хамбаёрӈадм
ӈуди лабяхана лабяхорӈадм.
Халцанана сарпя тяха вэнаӈга,
Таси сулмга, тюу пенаӈга
Ӈэвакони нид нумгы лэйна
Хубта хою понд ңуми сэйна.
…Иде’ салм’ нимня яля пендена,
Сыӈгрёсьдава” ява” тензена…
Мядо’хэна тон’ турць тохобэй
Сэр” хохорэй ит’ ӈохолэй”.
Тонда хамбаха”на сята масби,
Ита вархэн’ ӈэва васъи.
Салм’ хамба” нина тиртя са”мине,
Сава мирбямда ит’ мание.
Яля’ иняха”на тода халтамби,
Ензарюй ит’ пыям’ тялдамби,
Вадам’ хэтван харванархва,
Мань вадарив ӈатенарха.
Вади тэраба мань нуриӈадм’,
Ивнанда ӈэда вади пюриӈадм’.
Тосахад тиртя тэри ӈохолы.
Лэмбарахананда ита лохолы”.
Тиртям мание тэри нуриӈадм”
Тонда вархад сита ӈатеӈадм’,
Тикахавахана сэл’ хэндрев’
Хибя” яхава енм’ пендре!
Сидя сата тода ит’ мяртэй”,
Сэр тиртя ӈэва ит мантэй”.
Лэмбарахаданда вэя лохолы”,
Ита нярмотана тор лохома…
Идеё ёрхана пенд’ лыӈгарэй”.
Паль” якэ” яр ян’ нимнерей”.
Тикыринда ӈод” ита вар”ня
Лярцьнена”я тид варна.
Мяд’ хибярид, няби пинда тось,
Хаводик”ям лахарю”ӈадонзь
Вы’ латхад хаво’’мана тось
Сэр’ хохорэт яркодо’ сось.
Василий Ледков харта иле’’мямда падбавахана тарем’ лаханась: – нисянана’’ яӈгомнандо’ ядэрпато’ небянана’’ мякнандо’ едм’ пиребасьты’’. Ӈацекэӈэ’ маня’’ тэхэ’’ ядэрцетыва’’. Нисянана’’ яӈгован’ ӈарка хибяридрев’ нядаӈгосьтыва’’. Вэвко’’ серм’ сертабава’’ нямна ива’ нисьты’’ ядэр’’. Лэк’’ хибярина яӈгосеты’’. Тарем’ илеваць.
Ӈарка я’ тер паднанава выӈгы ямда саць мэнедась, сяӈадась. Янда ’ нямна падвы манзаида тянё ни’’ӈа’’. Ӈопой тарця падвэмда Матрёна Ивановна Талеева радиона толаби.
Тирти лэтмбан’!
Неро полихина,
Макодина нина
Ялям илбада
Тиртя хынолиӈга
Ӈацекэцяӈэ,
Муӈгм нён мэс!
Лэ’мораха’нана’
Есм’ нён мэс’.
Тирти лэтмбан’
Пиди нёд пэр’.
Мэцэямда’ма
Лэ’морэцяер.
Хойхана илевахана ихиня сомбой яля’’ ӈод танесеты’’. Яля’’ ся’’ня хибярина манзаяхатто’ таӈгалцетыд’. Хибярина сава ялян’ маймбасьты’’, хаярм’ маймбась ядабтабсеты’’. Тыто’ сенз’ ӈэва вы’ тер хибярина сямянд’ ӈарка маймбо. Сёнзянда маймбцохона хибярир’ хынота. «Хынос’’ма, хынос» падвым’ Фаина Ледкова толабида.
Хынос”ма, хынос”
Ява” мал’ инзелея,
Сёнд ендадм’ миноць
Лата вындер илея.
Илея сармик,
Нёя индцю” маирта.
Яр ӈобнзер’ тярмы,
Хаерад’ ӈыл’ соирта!
Хаерл, тялабтё,
Сидебая ханюй ям’,
Сарюд, харабтё,
Идебтея” сэлуй ям’.
Си”им илвы небяв –
Сыра сюдбя латэй я,
Вына” хавна сёнзяв
Вуни пюсьту” несэй я.
Илебц, лохомба,
Яхаңэ хылвабтёя,
Ненэць”, паромба,
Нито’ мяк ӈэдалёя”.
Вынд тир’ нина сей”
Сёнзя” латвана няӈгры”,
Ӈахат хусавэй
Хибяринд cёда накры.
Хынос”ма, хынос” –
Нумгэхэрт” худабтёя”,
Ид’ ӈылад вэ”моць,
Халякуд вы”лабтёя”.
Тись янд хобадярм’
Тиртя нёсьтада ёцьту”.
Тэвэй” техэ варм’
Саӈо нёсьтада хосьту.
Носид ваӈгота”на
Нювэй вадабая”,
Ӈаць” нин вына” тавна
Тюн” мюд вэӈгалая”!...
Хынос”ма, хынос” –
Выма” мал’ инзелея,
Сёнд ендад миноць,
Юдабэй я илея.
Нувот хохо”лёр
Ӈано’ есерми’ нэя
Няханд мэта сёр
Вына” тиркна илея!
Василий Ледков падвы манзая’’ сёӈэ’ сававна ха’’мурӈа’’. Хынокад’ нина’’ ӈока’’ сёӈэ’ мэцьтыдо’. «Нюняр’’ ярӈа» сём’ сейхад’ Валентина Тайбарей мэ’’ӈада.
