Вы здесь

Няхар’’ Ябтоӈэ’ папа (ярабц)

эвхы округханана илена’’ нянэй ненэця’’ вадамдо’ тамна сававна теневадо’. Невхы иринато’, нисянато’ мэ’’мы’’ ярабц’’ ӈод ӈокаювдо’ теневыдо’. Ханяӈэхэна ӈобт’ ма’’лась пыдо’ мэцьтыдо’. Няю Вэнга ӈока тарця ярабц’’ падвысь, ӈопой тарця падвэда «Няхар’’ Ябтоӈэ’ папа.»

Тарем’ лаханакодахандо’ не ӈадимя. Мандойко’’я ӈэӈгоданакы. Мандойко’’я ӈэваконда ниня си’’ив янда есям’ мал’ сярамбида. Мандой хамбе, мандой силме, сидя хэвувнанда Мандой вэде. Пыда мандараха: – Мирбями’ сава ӈэбтав’?

Не мят’ тю. Ӈарка Мандокор пыда тарем’ маси’’: – Тудва’’ тумъя. Мядонда то. Пон’ нись мы’’, якэдо’ ӈадимя. Ӈарка Мандокор пыда тарем’ маси’’: – Мякна мэхэва’’. Мят’ ханя тю’’. Сидяда сэвда тум’ сидя’’ӈаха’. Сидядо’ хэвдо’ ӈэвы. Нися вэсакодо’, небядо’ мякна танявэхэ’. Нисяхаюта синяна не ва’’аво’’мы. Нядоӈги’ Тэта Ню пибида яӈгаць вэсако’ синяӈы хэван’ та ӈамды’’. Хуркари я’’амна вэсако хонарку. Едамдо’ ӈамзь хыдидо’ сюръядо’. Мядонда нядо’ пин’ тарпы’’, иням’ вэрдась мяканда ӈэдалэй’’. Сянад хунад мимб’’нанда ӈод’’, мяканда тэвы’’. Пой’ ӈутоканда нултада. Тыда ӈэдлись мят’ мятю. Пыда тарем’ ма: – Нядоӈги нисяв, юд’ мян мядо’, мякби ходм’. Мандо’ ӈэвы’’. Мандохо’’ ӈэсоб’’на’’ хурка ӈэбта? Нумда ӈод’’ нарэйма. Тына’’ нисярць пэӈгуд’’. Хора ханедадо’ танянарха. Нядоӈги Вэсако маси’’: – Хора ханеда’’ ӈамгэхана тара’’? Ябтако ёнарт поӈгана хуркари’’ ты’’, илебця’ ӈамзараха’’ ӈамзидо’ таня’’. Нядоӈги’ Тэта Тэта ю пыда тарем’ маси’’: – Илебця’’ ӈамзараха’’ вуни’’ӈа’’. Няби’’ няро’’ ӈамза’’ ӈэ’’ним’. – Тикахав пыдрир серт. Пиримдо’ мата’’. Хуняна мя’’ма’’ ха’’мы’’. Мя’’на’’ ха’’амри Ябтоӈэ’’ тавы няхар’’ тарка мюдми’ пуйдав. Нядоӈги’ Тэта Ню самляӈг сэрм’ ӈобт’ пудэйда. Ӈудонда хэӈгадтада. Ӈавады пон’ нива’’ мюсе’’. Юд’ мян’’ мяд’’ ӈадимя’’. Нядоӈги’ Тэта Тэта ю няби варэхэ’ тидхалембида. Тикан’ нултада. Мята паланзянд’ пям’ пал’’ӈа. Нядоӈги’ Тэта Ню ю’’ Мандонда мядо’ няна хая. Ӈарка Мандонда пой’ ӈутот’ ханамда ӈэдада. Маня’’ няхар’’ӈэ мя’’ма’’ сертава’’. Нядоӈги’ Тэта Ню’ сыӈгарёда яӈгу. Нара’ ямбахана таня илева’’. Ю’’ Мандокор хор’’ хадасеты’’. Ӈопой хораком’ нёна’’ син’ ха’’аврасеты’’. Та’ ямбахана таня илева’’. Ёрколаб’’нана’’ Мандойко’’я сидя иня’ пойм’ ня’’амбасеты. Хане’ хэюто’ Нядоӈги’ Тэта Ню’ ӈани’ хан’’ӈа. Ханяӈэхэна самляӈг сэрм’ ядэрманзь пыда сярсеты. Мандой’ хэвувна самляӈг сэрта вада тута. Мандойко’’я пыда манзеты: – Тюку самляӈг сэр’’ не’ тэӈэ няна’’ сава’’ ӈэвы’’.Няхарто’ мэта тэданда мэтыда, сидядо’ хан’ пуйхэӈэ’ тараӈгуху’. Нядоӈги’ Тэта Ню сяхаринда сяродабта мэсыта ӈэсеты, Мандой’ хэвувна хэвдавэй’ ни ӈэсету’. Ханяӈэхэна самляӈг падвым’ ханда тэӈэ пыда сярсеты. Иб’’ ӈод’’ самляӈг падвэ’’ Ябтоӈэ’’ некани’’ тавы’’. – Тюкуехэбид, – Мандой’ манда, – Не’ мэта тэӈэ няна’’ сава’’.

Та’ ямбахана таня илева’’. Нядоӈги’ Тэта Тэта ю мяканда турць ӈоб ӈэвадэй’. Тёнярина пыда илесеты. Ӈамгэда ӈэвна, ӈэрёй’ сырава’’ торикаковна пилибт’ ха’’мы’’. Нядоӈги ирими’ маси’’: – - е ӈацекы, хуняӈы яля’ хаданд ня’ ханоди’ хураиди’. Хандава’’, ямдаӈгуна’’. Хада пухуцяни’ ня’ яля’ ямбхана хано’’ хурабини’. Не’ ханони’’ хурейни’. Ирими’ маи’’: – Ханоди’ хурэйдима, хуняна ямдаӈгуна’’.

Пэвсюмзь маня’’ хонэйна’’.

Ярабц малда тамна ни’’ӈа’’.