Не мяка ха’’авра, ёрколаӈаха’, не мюдамда пуйда, таминда нид ӈудонда мюдм’ манзабта. Тарем’ мюсебата яля’ ӈылари’ пэрӈада. Ялэ’ мюсеӈаха’. Тарць’’ ямбахана хасавакоюм’ танырӈа. Ӈаво’’ таняхуна недам’ нярахалаӈаха’, неда’ тяхана не нултада.

Недам’ манэць хасаваюм’ хонарку: – Тюку ӈамгэ’ нюхула’’ма? – Тикар неда. Мядо’ ӈадь ян’ та’ ӈэсыхы’. Неюм’ хасаваханда ӈани’ тарем’ ма: – Мяк’’ хань’’. Хибя ӈэвар вадес’’. Нултаванд ёльцяӈгана хасев’’ няюв’ нултад, не’ няюв’ нёр нулта’’. Хаби вэсако Ий мяк’’ хая. Ханамда сябун’ сярада, не хонарамба пя: – Ӈамгэ ненэцянда’’? Не’’ мунзи’’, иридо’ ядэрӈа’’: – Са’’ла ӈэдакы? Хасев’’ няна хая, хибя’’ ӈэвамдо’ хонара’’. Ӈобто’ ма: – Мань Вы’ Харючи вэсакодм’. Пыдар хибян? – Хаби вэсако’ нядм’.

Вы’ Харючи няхата ма: – Недя сядота не ӈэдакы. Са’’лако хаби хадавы ӈэя. Нюдя Харючи вахалъй’’: – Нисяхаваӈэ, хусувэй ненэць’ пыдар нявандар. Си’ няна хэхэ’’ ядо’ танявы. Хаби вэсако’ ийм’ таня’ нюхулембидо’ – нядо’ перена пяраха. Вы’ Харюцт нюдя нюмда хаӈа: – Нибат ту’’ сит хадаӈгудм’.

Нюдя Харюци то, хабим’ нюхуледо’. Хаби вэсако’ ийм’ ямб яля’ пя’ малан’ ӈыдадо’. – Немда хуняна хоцакэва’’. Нув’ ялэмзь тыдо’ то’’. Вы’ Харюци тет хорсе’’эм’ сяра. Сававна манэць яля пя’ ни’ ӈыдавы нядо’ хэвы. Хаби вэсако’ не ню’ якэда теда’ ӈадимя. Вы’ Харюци мят’ тю. Не лат’’ ниня лабцорта, бюркаван’ ни’ харва’’. Вы’ Харюци пелей’ нямна, Хаби вэсако’ ий’ си’ ня’ ӈамды’’. Ӈаволыд’’ – харда лэхэ’’ теберӈа. Тад нирцилаванда Вы’ Харюци нямда еймананда харахана матидеда. Нем’ маноӈадо’. Хан’ мю’ пэман’ харвадо’, нюдя Харюци нида хонара: – Пэртяра’’ ӈамгэ таня? Ладленара’’ ӈум’ лахаць’. Ненэся ӈод’ ӈум’ лахацям’ ладлевы’’. Мята ха’’аврамба пя’ – сидя халакада тадда’ то’’олахаха’. Тикахавахана Вы’ Харюци сидя ӈоталмамда ӈобт’ пэйде, – халакаха’ пересянди’ яӈговы. Мядм’ ха’’аврадо’. Ты ёркалӈа’’, мюдм’ пуйда’’, ты подеръядо’. Мюдм’ нерняку’ ва’’алтадонзь ӈод’’ подеро’’ пясик’’ харто’ екаӈга’’. Вы’ Харюци ӈани’ сидя ӈотамламда ӈобт’ пейде мюд хэӈгада.

Хуняна нюдя Харюци сиды, ху’ ханимы. Сававна манэць мядода, нида мал’ ӈокахандо’ ӈэвто’ тю’’уня’ ӈэсь паллы’’. Нюдя Харюци Хаби вэсако’ ий’ мят’ хая. Не тумда тандая’ пятавэда.Нюдя Харюци пелей’ нямна хая, тюмю’ вакан’ туёць пэй’’. Тарем’ вэн’ нюдрев’ мят’ тювым’, тун’ хылкатанам’ сялилць не ма: – Такэр вэванё’’, ӈэрмонзь мальцякомд мэтнакы, пуна иринд им’ нён вомда’’. Хуняна ямдэйд’’. Хаби вэсако’ Ий харта ӈудонда, нюдя Харюци танырӈа. Нултаб’’та ӈутос’ ирт’ нултасетыда. Ӈопой мюселмахананандо’ ӈудондана нултава’ пойм’ ямбумбавы, паӈгараха соты’ ни’ нултада. Тарем’ сырпато’ ты’ иня’ няӈы хэвахад си’’ив ядана. Нюдя Харюци’ нинядэнда ню’’ – мяӈгода ӈэвы’’, манзь ханадо’: – Ява’’ харе’’ ӈан! – Тэдамда’’ таидм’, менаруй хабт’’, яхадэй’’ ӈэӈгу’’ – ӈули’’ ӈокаханда тодо’ сидя’’ ты’’, – Хаби вэсако’ Ий тарем’ ватора.

Нюдя Харюцир тыда махайха’’ питарпида, таредо’ тянпида. Хэвня’ ӈэдалэй’’. Мюд’’ манзада’’. Ты’’ мюд’ пумна харто’ сяйна’’. Яданидо’ Харюциндо’ сидя тензь’ хабт ханм’ пыяха’ пэӈадо’.