Вы здесь

Школана’’ музей тара манзара

Россия’ тавна ӈарка марка’’на, ӈэсыхы’’на хуркар’’ музей ӈока’’. Хибяри’’ ӈод’’ едэй я’’амна ӈэдалёрпто’’ нерня’ музейха’’ паромбасьты’’. Музейха’’на хусувэй мар’’, ӈэсы ӈаи ӈадимамда, культурамда манэма пир.

 

Пудана похо’’на ханяӈы округна’’ школа’’ харто’ музейдо’ таня’’. Маня’’ юнета А. П. Пырерка’ нюмна ӈэда ненэцие’’ школаханана’’ ӈобтарем’ музейва таня.

Тюку по музейна сидя ю самляӈг пода паны. Музей танява саць тарана сер’’, ӈаи илм’- историям’ сидяӈга’’амна манэма, падвэхэ’’на толавы пир. Тамна хуркари’’ музеян’ мипэй мядонзэй’’ таня’’: Норвегия’ яхад табэй букварь, Голландияхад’ табэй ӈэ’ мал (голландские деревянные туфли) тикы музеян М.И.Талеева табэй’’. Тамна мядэнзэй явӈга’’, ӈухуко’’, ӈухуко’ ембдяр’’ таня’’. Музейна’’ паскойдама нюртей букварь – Едэй вада, ненэй пензер’’, ненэцие’’ паднана’’ сидяӈг’’(портрет), нюдякоця ӈэсы: мя’’, хан, хибяри’’, ты’’, вэн’’ таня’’

Школана’’ музей’ серм’ ӈока по’’ Глафира Ивановна Ковалева минредась. Пыда – сахарамбада тохолкода, школаханана’’ нюртей школа – интернат ӈадима’ похот тохолкодаӈэ, воспитательӈэ, вожатойӈэ манзарась. Школана е’’эмня вадемыда вадакорха ӈэсьты’’, невхы сидяӈгаха’’ cырп’’ – тикы пысабцу, майбцо! Тикы’ по’’мальӈгана нацекы’’ харто’ ненеця’ вадамдо’ мал’’ теневавыдо’. Ӈарка’’ мариди’ няю ӈэдалёрць пэрмы’’, таняна ӈацекы’’ ненэй сём’ мэмы’’, таранидо’ хуркари мэкад’’ танецм’ тара пэрмы’’, экскурсияха’’ ядэрмы’’.

Тамальӈгана ӈацекы’’ харто’’ школандо’ хэвхана ӈамгари вадёданни’’ вадабавы’’: картошкам’, капустам’, морковкам’ тохолкодито’’ ня вадаба пэрмы’’. Школана’’ харта хоровида, юнода танявы’’, таняна ӈобтарем’ ӈацекы’’ воспитательто’’ ня манзаравы’’. Школандо’ ӈаркта’ Авенир Авенирович Торков ӈацекыта’ хэвхана манзарасьтавы. Ӈацекы’’ школандо’ ӈарка ервм’, тохолкодидо’’, воспитательдо’’, ӈани школандо’’ манзарани саць сахарамбвыдо’’. Ӈарка ӈацекы’’ интернатхана нюдяко нидо’’ хуркари серкна нядамбавыдо’’. Мал’’ нясьюмба, сомбойковна, ненэй мядндертарев’’ ӈарка мякна иленярха’’ ӈэвыць. Сава илевахана тарем’ нив ӈа’’. Теда’ Глафира Ивановна ӈока по’’ манзарамахаданда нылана, пенсиян’ хая. Музейхана сахарамба минрембэй серта теда’ Татьяна Петровна Гвоздухина минреда. Пыда ӈод’’ школахана’’ едэй хибяри ни ӈа’’, хаевы’ похо’’на Татьяна Петровна школана вожатойӈэ, тикы’пуд воспитательӈэ манзарась. Пыда школанаханана’’ манзарабэй тохолкоди, воспитатель ӈобтарем’ теневыда. Музей’ манзаям’ сейнда няркна пяда. Юнета школана ӈарка яля нертюна музейхана едэй стенд’’ сертаванзь табадась. Стендаха’’на ӈэда сидяӈгаха’’ сырп’’, ӈокам’ тензебтева пир’’. Ӈока по манзарабэй’’ тохолкода’’ сидяӈгана ӈади’’, хусувэй тохолкода ӈока по’’ манзараманда е’’эмня пады. Тохолкода’’ ӈарка яляхана, Победана’’ ӈарка яляхана школахана ветеранна’’ музеян’ ма’’ласьтыд’’, хэтувндадо’ няхато’ вуни яӈго’’.Тюку по музейна ӈарка ялян’ ваеравы похо’’на манзарабэй’’ тохолкодина’’, воспитательна’’, школана директорӈэ манзарабэй’ С.Н.Тельтевской товыць. Школана актовой залхана нюдяко ӈацекы’’ сертавы концертан’ пыдо’ сырӈаць. Пуна тохолкодина’’ школана музеян’ ма’’ лэяд’’. Мядомандо’ сер’’ невхыдо’ вадеӈаць, мэнена хынабцадо’ мэӈаць, няхато’ хэтувндадо’ ӈока ӈэсьты. Л.В. Бурдикова’ воспитатель ӈарктаӈэ манзарабэй, ӈока сава вади няхата хэтась. Мядондина’’ ӈани’ нацьмбойрахаӈэ хая’’, музейхана пон’’ мунудо’ соць’’.

М.И. Талеева, ненэцие’’ школа – интернат тохолкода