Хардахана вадюданна’’ ӈацекы’’, хуний ӈэсыхына илесь, садикан’ ядэрӈа пыдо’ школан’ хамадёсь турӈа’’. Тарця ӈацекы’’ тохолковадо’ ӈод саваркавна минзьты’’. Небянато’, нисянато’ хэвхана илесь тоходанвамдо’ минредо’. Маня’’ округханана тамна тарця ненэциена таня’’, хуний илевамдо’ выӈгана мюсерць мэ’’ӈадо’.

Тарця хибярина тыдо’ пэрць вымна мяд’ терсавэй мюсерӈа’’. Хасава’’ тыбэрӈа’’, не’’ хасавидо’ нядабась хусувэй мяд’ манзаям’ минре’’, нюкцидо’ хэвханандо’ илесь вадюдана’’. Си’’ив потаӈэ’ хэсь мякана илевы’’ ӈацекы’’ тоходанвась школан’ тэворцеты’’. Ӈэсыхы’ интернатхана илевамдо’ мэцьтыдо’. Нянэйювна мяд’ терсавэй мюсерта’’ ненэциена’’ Канин’ выӈгана мюсерӈа’’. Тарця ненэця’’ нюдякодандо’ нюкцидо’ хэвханандо’ иле’’, хойхана вадюдана’’. ӈацекы’’ садикан’ ни’’ ядэр’’. Школан’ хэвандо’ ӈэдонд’ небяндо’ хэвхана варёмдо’ мэць иле’’. Ӈодьбяндо’ ӈэсын’ тоходанвась’ тэвась хардахана илеван’ пон’ торумзь’ я’’амсеты’’, идо’ ӈод пилибт’ небяндо’, нисяндо’ нямна ядэрцеты. Хойхана вадювы’’ ӈацекэхэ’’на интернат’ ил’ незеларка ӈэва’’ е’’эмня, ӈацекы’’ теневабнандо’ тикы е’’эмня хойхана мюсерта’’ нюдяко’’ ӈацекы’’ мякана тохолабгудо’. Хойхана тохолкода’’ тарця ӈацекы’’ няюв’ манзараӈгу’’, пыдо’ ӈацекы’’ школан’ хамадабгудо’.

Хой ӈацекы’’ тохоламбава’ серкана тюку по’ округханана едэй сер’ ӈадимя’’. Тюку ирийна нертей яляхат’ «Канинский (тундровый) детский сад» проект’ манзаямда’ Канин’ выӈгана пядась. «Канин» община нюдяко’’ ӈацекы’’ няюв’ тохолкода манзараӈгу, нюдяко’’  ӈацекы’’ та’ ямбан садикан’ ядэрта’’. Тикы е’’эмня яӈга’ палатка’ хамадавы’’, тохолкова е’’эмня тарана’’ ӈавори’’ хоян’ тэвравы’’. Нертей выӈгы’ садикхана манзаравась хоян’ толхолкода Галина Изосимовна Шубина тэвыць. Пыда хойхана нюртейӈэ’ тарця манзаям’ пя’’. Ӈацекэця’’ няюв маля манзара. Хурка  ӈэвамда? Тикы нямна падвы манзаина тамна танеӈгу. Галина Шубина та’ ямбан манзаравамда ёльцесь, ӈэрёй някуна харвабнанда март’ тута’’, тикахана  лаханакурць нятава, хусувэй манзаянда нямна хонрагува’’.

Тедари’’ хэтгув’ тюку по’ таӈы ирий’’ ямбан Канин’ выӈгана мюсерта’’ хибярина’’ нюдяко ӈацекы’’ школан’ Галина Изосимовна хамадабгуда’. Галина Изосимовна  манзаямда’ теневана тохолкода. Пыда сидя ёнар’’ нертей похона Няръяна маркы гуманитарный колледжм’ ёльцевы, тикы’ пуд Несь ӈэсыхы’ садикхана манзарась, нюдяко’’ ӈацекы’’ теневана’’. Хой’ ил’ ӈод сававна теневана не. Пыда харта’ хойхана соявы’’. Харта ӈод’ школан’ хэванда ӈэсонд’ небянда, нисянда хэвхана хойхана мюсерць вадюданась.

Тюку та’ Галина Изосимовна Канинский выӈгана мюсерта’’ ненэцие’’ тетимдей, маттамдэй, си’’ивумдей ӈэсыхына манзараӈгу, ӈокханда хасую’’ ӈацекэцям’ школан’ хэвась’ хамадабгу. Ӈацекы’’ тоходангу’’, сянакода’’, небянадо’, нисянадо’ нядабагу. Школахана тоходанва’ нямна тохолкодандо’ вади’’ намдурта’’. Тарця сер’  ӈацекы’’ е’’эмня сертавы’’. Та’ ямбан тохолкода няюв’ манзарась ӈэсыхы’ школан’ тось, ӈэсыхы’ интернатхана тоходанва по’ ямбан илесь сейдо’ ни’’ пингу’’. Ханзер’’ тарця проект’ манзаямда манэ’’лабтагуда? Тикахад’ нерня манзаравада переӈгу’’.