Ӈацекына теда нылана’’. Ныланавандо’ сер толаӈговамдо’ юрбабто ни’’тара’’. Ненэця’’ ӈацекына харто’ вадавнандо’ толаӈгобнандо’ ӈани’ тара. Пыдара’’ е’’эмня «Пунушка» журналкана тарця вадако’ падвы.

Яв’ салякохона писяко’ ваӈготада ӈэвы. Писякор тарем’ сырпата хайнана ӈо сэре’’эм’ манэ’’ӈа, манзь тёрэй’’: – Ӈо сэре’’эей, тяхакумнов! Ӈо сэре’’э тарцям’ намда вахалъй’’: – Писякои, пыдар пидяханд табтав’’, сюдбя я саляхартан’ нив’’ табцету’’.

–Хэй, ӈон’ таркаебаб сэйта мара’ ниня хаер’’ сит холкабтасетынё’’. Пыдъер тэрихава манзетынанё’’: -«Пюль’’, пюль’’!»

Писякор манэ’’мэмда, намдавэмда тарем’ ваде’’ӈада. Тарця вада’’ хаер сеян’ вэвавна теба’’:- Ӈамгэ си’’ми вадиндамбин?

– Сит вадиндамбаӈгудм’. Тир’’ сит такалп’’ ханяӈэхэт вакар нинё’’ ӈадясету’’. Тадахава тир макабтылы’’, хурканри ясоре’’эӈэ хан’’лы’’: – Тюку ханзер’’ ӈэда ӈамгэ ӈэса? Ӈамгэ мань е’’эни вадиндан?

Мерцянд сит посыба пяб’’ пелярид лыӈгабтамбасетынанё’’. –Ӈамгэ си’’ми вадё’’ӈан?

Мерця’ им’ писяко’ вада’ ӈани’волдадо’. –Мерця’, си’ив яля’ посана’’махаданд, терта’’махаданд ӈамдлёда Пэт пыяхана вывнаесетынанё’’. Ӈамгёда пэ вахалъй’’: – Мань пыяханани мерця сяха’ выварца? Хумбанзи’’ си’’ми серк’’ поёлтамбин.

–Хэй, нена’’ хынаӈов, пэхэваӈэ мунзяраванава. Пыдьер сит иӈгне’’яр Ӈэмда тибтехэя хаесетынё’’. – Мань ӈэни тибтепа’’мами сяха’, писякоӈэ манэцар? Си’’ми пилц ваӈготанд мю’ пакалцетынанё’’, таняна манакорид ледресетынё’’.

– Иӈгнеӈэ, хумбанзи’’ ӈарамдын. Хабинд пя’ яӈгохона няндси’’яри няӈгра’’ясетынё’’.

Пя яӈго тарця вади мэтам’ ӈобтарем’ волтада: – Мань сяха’ иӈгнейм’ сякалпасав, сяха’ няндаси няӈгараса? -Хаби’ пя яӈго мунзяравахана, – писякор тарем’ ма. – Хора янде’’эр си’’емд сидит няд сюртехэя, енядаркая хаесетынё’’.

Пя яӈго’ ненахада то, Хора яндехэнда ӈопой’ тёрей’’: – Писякор ти тода!

Писякои’ ӈамгэмда пэрмана, хора янде’’э ӈопой’ палкадтадаю Писякоцяи тарем’ пызылёдаханда пидякоемда ӈо сэре’’э няёлмэда.

Та’ малда