Вы здесь

Не ӈацекэва пэдова’’

 Алина Ледкова – ненэця’’  вадавна хынотакова

Та’ ёльцяӈгана культурахана манзарана’’ хибярина ныланавам’ ехэрасьты’’. Тамальӈгана яндаха’’на’’ хуркари’’ фестиваль’’, конкурс’’, выставка’’ танесеты’’. Маня’’ яханана по’ ямбан я’’авлавы ӈацекы’’ ӈод тарем’ еримбнанда ханяхова ядэрцеты’’.

Ӈацекы’’ ӈарка яляхана Ӈысма яхана хусувэй по’ «Юркытш» – «Венок дружбы» нюбета фестиваль-конкурс’ ваерасьты. Пыдадо’ нерняри минрена’’ ӈацекы’’ таняюв’ ма’’лабсеты’’. Ӈацекы’’ хуний харто’ яханандо’ тара’’, сё’’ мэ’’ӈа’’, лахарё’’ хэтби’’. Ӈацекы’’, хуний хуркари’’ коллективха’ ядэрӈа’’. Хуний хуркари’’ фестивалькана мэбэбцомдо’ мэцьты’’. Ӈокханда сидя юр’’ самляӈг ю’’ ӈацекы’’ Ӈысма’’ яхана ма’’ласьтыд’. 2011 поход’ тарця фестиваль’ Межрегиональный детский фестиваль-конкурс’ национальных культур’’ нюбе’’ӈа’’. Тюку по’ Сыктывкар’ маркана тарем’ нюмдевы фестиваль’ ӈани ваерась. Тюку по’ ӈод ӈока’’ ӈацекы’’ ӈысма’’ яхана ма’’ламбидось. Маня’’ округва ӈод’ тюкумэвахана тарця мэкад’ фестивалян’ тэворӈась. Самляӈг номинацияхана ӈацекы’’ пыдадо’ манэ’’лабтамбиць. «Народная песня» номинацияхана маня’’ не ӈацекэва хыно’’ӈась. Сыктывкаран’ тэвормы Алина Ледкова, мат’’ покоцяда, Няръяна маркана иле. Алина я’’авлада не ӈацекэця. Этнокультурный центрхана ненэцие’’ отделкана «Нумгыкоцям’» нюбета вокальной группа манзара, ханяна ӈацекы’’ сё’’ мэ’’ӈа’’. Тарця ӈацекы’’ нерня пэртяӈэ’ Людмила Игоревна Ледкова тара. «Нумгыкоця» сидя ёнар’’ няхарамдэй’ яӈганя похона ӈадимясь, таняна мат’’ ӈацекы’’ хыно’’ӈа’’. Алина ӈод’ тикы группахана хынота не ӈацекы. Тюку по’ пыда сян’’ конкурсхана я’’авлавамда манэ’’лабтась. Март’ ирийхана округханана’’ «Сава сё» конкурсхана ӈацекы’’ поӈгана нердесь, ты’’ ниць ирийхана «Хрустальный колокольчик» конкурсхана садикхаданда хыно’’ӈась, тикахана нябимдей местам’ ханась. Теда июнь’ ирийхана Сыктывкар’ маркана ваеравы ӈацекы’’ конкурсхана ӈани’’ пэдовась. Ӈысма яхана Алина Ледкова ненэця’’ вадавна сидя сём’ мэ’’ӈась – «Туцякоми», «Маня нюдякова». Гала-концертхана ӈод’ хыно’’ӈась. Ӈысма’’ яхад’ нябимдей межрегиональный ӈацекы’’ фестиваль – конкурсхад мядонзэйсавэй яханда тось. Алина мэкад’, я’’авлада не ӈацекы. Пыда тамна садикан’ ядэрӈа. Ненэця’’ вадавна хыно’’мам’ ёльце харвабтада, тарасеты’’, товнда тохолкова’ похона музыкальной школан’ ханта, фортепьянохона сянаковась’ тоходангу. Нерняна Алина тамна ӈока хуркари’’ конкурсада’’, фестивальта’’ танеӈгу’’, ӈоб’ нерня серуда сававна миӈая!