Округханана’’ падтаӈгова серм’ минрена’’ хибярина’’ сацьри’’ ӈока ни’’ӈа’’. Тарця нина’’ ненэциена’’ поӈгана тянё’’ ӈэбнандо’ ӈод’’ таня’’. Ӈарка падтаӈгода нява’’ Надежда Выучейская, падтаӈгова’’ серт’ яӈга тоходанвы.

Пыда сававна манзарана нява’’, падвы’’ манзаида’’ маля’’ ӈока’’. Хуркари’’ я’ тер’’ хибяри’’ Надежда манзаи’’ теневыдо’, ӈатесетыдо’. Маня’’ яханана’’ ӈод’ пыда манзаита’’ выставки’’ сертабасьты’’. Та’ ямбан Няръяна маркана «Арктикам’» нюбета дворец культуры мякана «Семь красок политры» нюбета выставка’ манзараӈгу’’. Таняна маркана илена’’ картины’’ падбада’’ хибярина’’ манзаи’’ манэ’’тада’’. Надежда Алексеевна сян’ манзая’’ таня’’. Тамна ӈопой падтаӈгодава’’ Павел Выучейский. Тикы ӈоб’’ ивъер манзарана нява’’. Нянэй ненэця’’ тотрев’, Павел падтаӈгось’ пир’’мада’’ вэяхананда’ӈа’’. Ханзер’’ пыдамда тенеда’’, пилибт’ падтаӈговы’’ ӈэсьты’’. Павел округханана’’ соявы, евакоӈэ’ вадювы. Няръяна маркана ненэцие’’ школа-интернатм’ ёльце’’махаданда Сыктывкар’ маркана художественной училищехэ’’на’’ тоходанван’ харвавысь. Валакада таняна тоходанвада нивысь’ ӈадив’’. Армиянда’ пуд харта’’ ӈэсынанда манзара’’ пядась. Тикахад’ по’’ ваерась март’ илевась товысь, тюкохона лесозаводхана манзарась. Тикы’ пуд ханярина’’ манзаравысь. Валакада падтаӈговамда сяхарт’ нидась хаембю’’, илеванда ямбан пилибт’ картины’’ падби’’. Хусувэй сертавы’’ манзаянанда харта ямда’’ манэ’’лабтамби’’, хой’ илм’, хойхана манзарани’’.

Падтаӈгода’’ манзая’’ выставочный залхана манэ’’ма’’ пир’’, март’ тобнанда’’ таняюв’ тюӈгада’’.