Маня’’ округва’’ нянэй ненэцие’’ илесь я. Нянэй ненэця’’ сян юр’’ по’’ ямбан харто’ явнандо тыдо’ пэрць мюсерӈа’’. Маня’’ хибярина’’ хойхана илесь нюдо’ вадаби’’, ямдо’ лэтби’’. Тарем’ яханана’’ тыбэртя’’ хибярина’’ хусувэй выӈгана мюсерӈа’’.

 Хасава’’ тыбэрӈа’’, не’’ хасавидо’ нядабась хойхана иле’’. Ты’’ – ненэцие’’ ил’. Невхы похот’ иринана’’, хадунана’’ явнана’’ тэкоцидо’ пэрць мюсерӈаць. Тыбэрма сер’’ тюку яля’’ ӈэсонд’ тэвы’’. Теда’ ӈод’ хойхана хибярина’’ харвась иле’’, манзара’’. Невхы по’’ пирувна мюсерта’’ хибярина’’ саць тянё’’. Округханана’’ си’’ив ёнаркад’ вата ненэй ненэцяӈгат валакада ёнаркад ватамбой хибярива’’ хойхана мюсерць иле’’. Тына’’ толыр’’ ӈани’’ хусувэй по’ нядаӈга’’. Теда округханана’’ юр’’ сиднтет ю’’ ёнаркад вата тэва’’. Нянэй ненэця’’ пилибт’ тэхэт’ илець. Нерня’ ӈод тарем’ ӈэбнанда нив’ тара’’. Тына’’ толыр’’ ӈокамдая’’. Тикахана хойхана ненэциена’’ манзаядо’ танеӈгу’’, тикахана выӈгана хибярина’’ пилибт’ мюсерта’’. Тикахана хусувэй по’ ӈатена’’ ӈарка ялява’’, ты’ ялява танеӈгу’’. Хойхана мюсерта’’ хибярина, хой’ манзаям’ пэртя’’ нина’’ манзаяндо’ хэбидя ялям’ ӈани’’ ӈатедо’. Хэбидя ялямдо’ мэ’’манзь тюку по’ ма’’лаӈгуд.

Маня’’ округханана’’ Ты’ ялява маля ёнар’’ хасуюёнар’’ няхар’’ ю’’ нябимдей поход’ мэ’’ӈава’’. Хойхана мюсерта’’ хибярина’’, тэхэ’’на’’ манзаранина’’ тарця яляхана ныланавась таславы’’ яхато’ ма’’ласьтыд’. Ӈобкана ма’’лась нина’’ по’ ямбан’ манзаравидо’ таслабсеты’’, поӈгнандо’ пирдырцеты’’. Нидо’ манэць маймбасьты’’, нерня ханзер’’ илевамдо’ таслабсеты’’. Теда ӈод’ тарем ӈэсьты’’.

Ты ялян’ хамякова’’ сер’ округханана’’ тыбэртя’’ сельскохозяйственный кооператив’’ поӈгнандо’ пирдырӈаць, ханяна по’ ямбан серудо’ сямянд’ сававна миӈаць, нарэй просчетамдо’ ёльцяндо’ ваераць’, тэхэ’’ прививки’’ ёльцьӈганда сертабиць. Манзаяхана нерденя’  СПК ты’ яляхана нюмдеӈгудо’, сававна манзарава’’ е’’эмня няхар’’ нерня тарпвы’’ кооператив’’ еся’’ нядмам’ ня’’амгу’’. Тикы е’’эмня няхар’’юр’’ си’’ив ю’’ самляӈг юр’’ еся’’ таславы’’. Еся’ нядмам’ тамна няхар’’ сямянд’ сававна манзаравы’’ ӈэсы’’ ня’’амӈгу’’, нюбедо’ маля’’ таславы’’.

Ты’’ ялям’ мэ’’мась хоян’ тиртя’’ ӈано’’ хибяри’’, тыбэртяха’’на’’ тарана’’  ӈавори’’ тэвраӈгу’’. Тюку по’ еся’’ тянёмдева’’ нид’ хоян’ си’’ив рейс’’ танеӈгу’.