Хойхана мюсерта’’хибярина пям’ ханяхад’ ховна. Ӈодьбянда округханана тарця ненэцие’’ пяхана нядамбидо. Маля сян по’’ ямбан тарця манзаи’’сертаби’’, пям’ хоян тэврава е’’эмня есь’’ Заполярный район’ бюджетхад хоби’’.

Тюку по’ ӈод тарця манзая миӈа’’. Ӈобяӈганя миллионхад вата есям’ пям хоян’ тэврава е’’эмня бюджетан’ паклевыць, теда хойхана мюсерта’’ ненэцие’’мят’’ пя’’тэвравы ӈэӈгу. Округна вымна мюсерта’’ ненэця’’ пядамдо’ ӈате’’. Ӈокханда сидя ёнаркад вата кубометр пям’ Нюдя, Ӈарка, Канин, Тиман выӈгана мюсерта’’ ненэцие’’ ян’ тэврась тараӈгу. Теда пя’’ округна ӈэсыхы тэвравы, таняна СПК серм’пэртя хоян’ ханавась хамадабидо. Хамандёда пя’’ хоян’ тэврангудо’. Пядо’ танесь мюсерта’’ хибярина идо’ ни’’ ядэрт ханяхад пям хось, печь тодалава е’’эмня пядо сыра ямбан танеӈгу. Тикахад илевадо’ незеларка нив’ ӈэӈгу’’.

Хонгурейхана илена’’ ты’’пэртя’’ харто’ ӈэсынандо’ пядамдо’ маля яӈрець, теда пилеӈгудо’, лядтыдо’. Тикахад’ тыто’ толыр’’ таславась хэвандо’ мальӈгана мюсерць’ яхато’ тэвраӈгудо’. Ӈэрёй просчёт’ манзаидо’ тикы колхозхана вэба’’ ирий еркы толыркана мэцьтыдо’. Тамальӈгана хоян’ манзарана’’ хэсьты’’. Тюку по’ ӈод тарем’ ӈэвась’ мэ.