«Маймбава» – тарця нювм’ нюбета коллектив Саляхана маля няхар’’ ю’’ самляӈг по’’ ямбан манзара. Няхар’’ ю’’ самляӈг по’’ ямбан таняна тарана’’, хынота’’ хибяри’’ харто’ ӈэсынандо’, округханана, ӈарка яна ӈани’ маркана илена’’ ненэцие’’ сею’’ маймбтемби’’. ӈани’ яха’’ тэвормадо’ ӈод танясь, ӈани’ тенз’ мэта хибярихи’’ ӈод нянэй ненэцие’’ культурам’ манэ’’лабтамбидось.

Тарця ныхыта’’ коллектив’ Нельмин’ Саляхана няхар’’ ю’’ самляӈг по’’ ямбан манзаямда минреда. Тюку ялян’ хэтась: ансамбльхана сямянд’ нертейӈэ’ таравы’’, хыно’’мы’’ хибяри’’ теда маля ӈарка хибяри’’. Пыдо’ харто’ ансамбляндо’ луца’’ вадавна манзь – историям’ теневадо’, ихиняндо’ лэтбидо’, теда вадюданна’’ хибярихи ваде’’ӈадо’. «Маймбава» ансамбль’ историяда’ тарцясь.

Елена Николаевна Окотэтта Ямалкана илена не. Хойхана соявы, вадювы не Ленинград’ маркана институтм’ ёльце’’махаданда харта яхананда манзарась. Пыда ӈока по’’ ямбан дошкольной образование серкана методистӈэ’ тарась.

Хаювы по’ носиндалава ирийхана си’’ив ю’’ самляӈг пода панысь. Теда маля ӈахакуд’ харвабтана манзаямда хаедась. Хусувэй яля’ манзаян’ нибнанда ядэр’ ӈод мякнанда сертабада манзаяда ӈока ӈэсьты. Пыда нюдяко’’ ӈацекы’’ няюв манзарана’’ нида’’ нядамби’’. Минрена манзаянанандо’ тарана’’ книги’’ нита’’ е’’эмня’ падби’’.

Тюку ирийна нябимдей толыркана Красной’ ӈэсыхына илена’’ хибяри’’ ненэцие’’ культура нямна хамандавы ӈарка ялямдо’ мэ’’ӈаць. Нянэй ненэця’’ традиции’’, быт’’ теневана’’ хибяри’’ поӈгнандо’ пирдырӈаць. Культура’ хардандо’ сценан’ си’’ив хибяри’’ ныхыдо’ хормась тарпыдаць. Няхар’’ не’’, тет ӈацембой хасавако’’.

Не’’ харто’ паӈгудо’ ваде’’ӈаць, нюкубць’ сё’’ мэ’’ӈаць, сэдвыдо’ манэ’’лабтабиць, ӈодя’’ таром’ хэтбиць. Хасавако’’ ӈани’ пэдаваць. Нянэй ненэця’’ ӈэвадо’ ӈадись. Пыдо’ тынзям’ паӈгалпиць, хан’ тя санарӈаць, хурка яха’ округханана таня –тикым’ падбиць. Тикахад’ сямянд’ ныхытидо’ нюмдець – не’’ поӈгана нюртейӈэ’ Парасковья Выучейская хаясь., хасава’’ поӈгана нердевы Николай Ледков. Хусувэй конкурсана мэвы’’ благодарственной письмом’, мядонзэйм’ ня’’амась.

Я’ сяр ниня ӈудидо’ мэта’’ ненэця тянё вуни’’ӈа’’. Маня’’ яханана тарця хибярина’’ ӈани’ таня. Мел’’ ненэциена округна ӈэсына’’ иле’’, маркана иленя’’ поӈгана таня’’.

Пыдо’ ӈуданато’ сертавы’’; сэвхана, ин’ мэёвна еримберта’’ манзаи’’ манэ’’манзь’ ӈока ма’’люрцетыва’’. «Мел манзарана» таремъюв’ нюмдевы’’ выставка яханана хусувэй по’ танесеты. Тарця серкана этнокультурный центрхана манзаранина’’ сидна’’ маймбтебсеты’’. Мел’’ нина’’ манзаи’’ ӈатесетына’’, мел’’ ненэциена нюби’’ теневына’’. Тарця ненэциена харто’ манзаидо’ ӈани яхана илена’’ хибярихи’ манэ’’лабтабавась ядэласьтыдо’.

Сидя ёнар’’ няхарамдэй’ яӈганя пова’ маня’’ округханана «Мяд’ тер’’» поӈэ’ миӈась. По’ ямбан мяд’ тер’’ ненэцие’’ нямна хуркари’’ сер’’ таняць, сава вада’’ саць; тикахад’ округна ерв’’ ӈока нюсавэй семьи’’ есяхана, мяду’ нямна нядамбидо’.

Маркана, округна ӈэсыхына ӈод’ мяд’ тер’’ нямна хамандавы сава сер’’ таняць. Тарем’ӈод Хонгурейхана. Мэта ирийна сидя ю’’ нябимдей яляхана Хонгурей’ ӈэсыхы культура’ хардахана ӈока хибяри’’ ма’’лэйдаць. Тикы ӈэсыхына илена’’ хибяри’’ ӈокаювдо’ «Няръяна ты» колхозхана сяӈгова манзараць, ханяӈыдо’ хойхана мюсерць’ ты’’ пэрӈаць, не’’ мядм’ манзаям’ пэртяӈэ’ тараць. Тэхэна манзаравы’’ ненэця’’ теда нюдо’, нюто’ ню’’ маля тэхэна’’ мэнаӈэ’ тара’’. Тюку’ мэвахана тэхэт’ перена мяд’ тер’’ ненэцие’’ ма’’лаць.

Сайнорма’ мальӈгана маня’’ яхадана оленно-транспортный батальон’’ хаяць. Хойхана мюсермы’’ ненэця’’, тэсавэй, вэнекосавэй, ханудо’ ханась’ яхадандо’ ӈэдалэйдаць. Сайнорма’ по’’ ямбан ямдо’ хэвняхад’ товы’’ вэвко хибярихит’ лэтбидось.

Нерняна товнда похона Россиянана Олимпиада ваераӈгу. Хуркари’’ яхат товы’’, хуркари’’ тенз’ мэта’’ хибяри’’ нянэювна спорт’ мэнена’’ маня’’ яхана пирдырманзь’ ма’’лаӈгуд’. Сидя ёнар’’ тетимдэй’ яӈганя по’ Олимпиадан’ ява’ сян по’’ ямбан хамякусь.