Вы здесь

Тум’ минревнда нина’’

Нерняна товнда похона Россиянана Олимпиада ваераӈгу. Хуркари’’ яхат товы’’, хуркари’’ тенз’ мэта’’ хибяри’’ нянэювна спорт’ мэнена’’ маня’’ яхана пирдырманзь’ ма’’лаӈгуд’. Сидя ёнар’’ тетимдэй’ яӈганя по’ Олимпиадан’ ява’ сян по’’ ямбан хамякусь.

Сочи’ маркана хусувэй тарана’’ ӈавори’’ едэювна сертаць. Олимпийской ту’ Россиявна ӈэдалёрӈа. Ӈока марка’’на’’ илена’’ хибяри’’ тикы тум’ яханандо’ ядтамбидось, тикахад’ ту’ Северный полюсан’ ӈаркая’ яв’ ӈанохона тэворӈась, космосан’ тиӈгу, яв’ ид’ ӈылан’ ядэладонзь. Маня’’ округханана илена’’ хибяри’’ ӈод’ тарця тум’ валакада ядтабгудо’. Няръяна март’ Олимпийской ту’ носиндалава ирийна няхарамдэй яляхана тиртя’ ӈанохона тэвӈгу. Тикахад’ тэхэна ӈэдалёда марад’ няюв ханаӈгуда. Округна еркы мар’’на улицавна яӈга тэравы’’ хибярина тум’ минреӈгудо’. Ӈокханда самляӈг ю’’ хибяри’’ ӈэӈгу’’, хуний тарця серм’ пэрманда. Хибяри’’, хуний минрена’’ манзаяхандо’ сававна манзара’’, спортхана ныхы’’ӈа’’. Тарця хибяри’’ олимпийской тум’ минревась нюмдейнаць. Самляӈг ю’’ хибяри’’ поӈгана нянэй ненэця’’ ӈод таня, тикы Надежда Алексеевна Канева, Хонгурей ӈэсыхына почтовой отделение манзаям’ пэртя не; Игорь Николаевич Ледков «Харп» колхозхана илеванда ямбан ты’’пэрма серм’ нерня минрена ненэць, тикахад’ Максим Владимирович Ледков тикы хасава ӈобтарем’ Краснойхана илена, маля ӈахакуд’ ты’’пэртяӈэ’ манзара, «Харпхана» сидндетимдей ӈэсындо’ бригадирӈэ’ тара. Тикахад’ Юрий Тайбарей, ненэця хасава ӈацекэця. Ив’ер спорт’мэнена, пыда нюмда ӈока ныхыта’’спортсмен’’ поӈгана намдурцетыва’’.

Теда маня’’ хибярина ӈод’ олимпийский тум’ минревась’ хамяку’’. Нерняна товнда яля’’хана Няръяна март’ тута’’.

Надежда Алексеевна Хонгурей’ ӈэсыхына иле, илан’ мэёвна сырта не. Пыда Нюдя яхана ты’’пэртя мякана соявысь. Нися’ хасада Алексей Гермагенович Ардеев «Няръяна ты» колхозхана ты’’ пэртяӈэ’ тарась, пыда спортхана ныхы’’мысь – округна чемпионӈэ’ по национальным видам спорта тарась. Ӈодьбянда харвабнанда ӈарка не нюда’ ӈод спорт’ мэненакэда. Надежда тикы’нямна тарця вади’’ хэтась: – Мань’ илеван’ ямбан спорт’ мэнем’. Школахана тоходанван’ мальӈгана сава тохолкода’’ сидна’’ тохолабиць, тикахад’ ӈэсыхына илебнан’ пиликов’ хуркари’’ спортивной мероприятияхана сянакосьтым’. Сырэй мальӈгана ламбахана сюрберцетыдм’, таӈы’ мальӈгана хоювна ядэрцетыдм’. Сим’ олимпийской тум’ миневась’ тэраць, инян’ хань’ сава ӈа’’. Маймбим’, ив’ няркна.

Максим Владимирович Ледков Краснойхана илена ненэць, ты’’пэртя, бригадир. Хойхана илева, манзарава сибиць сер’ ни’’ӈа’’. Валакада ныхыта хибяри’’ хойхана иле’’, манзара’’. Хибяри’’, хуний ямдо’ сахарамбась, тыдо’лэтби’’. Манзаядо’ теда ӈока, валакада забоян’ тэвравнда тыдо’ яӈгрембась пяӈгу. Максим’ ӈод олимпийский тум’ миневнда. Тэтнабнанда’ ӈод Няръяна март’ тута.

Мэта’’ си’’ивна пудана яляхана Няръяна маркана олимпийской тум’ ядабтабгува. Тарця ӈарка яля’ ваерава нямна вадина тамна танеӈгу. Тарем’ еримбнанда, тум’ минрена’’ нина’’ лаханакурць ня’’атына’’.