Елена Николаевна Окотэтта Ямалкана илена не. Хойхана соявы, вадювы не Ленинград’ маркана институтм’ ёльце’’махаданда харта яхананда манзарась. Пыда ӈока по’’ ямбан дошкольной образование серкана методистӈэ’ тарась.

Хаювы по’ носиндалава ирийхана си’’ив ю’’ самляӈг пода панысь. Теда маля ӈахакуд’ харвабтана манзаямда хаедась. Хусувэй яля’ манзаян’ нибнанда ядэр’ ӈод мякнанда сертабада манзаяда ӈока ӈэсьты. Пыда нюдяко’’ ӈацекы’’ няюв манзарана’’ нида’’ нядамби’’. Минрена манзаянанандо’ тарана’’ книги’’ нита’’ е’’эмня’ падби’’. Сидя ёнар’’ няхарамдэй’ яӈганя похона Елена Николаевна Окотэтта тамна ӈопой книгада ӈадимясь. «Ненецкий фольклор для детей» – таремъюв’ нюмдевы. Тарця книгам’ хэвхы округханана илена’’ нина’’, ӈацекы’’ няюв’ манзарана’’ – тохолкода’’, воспитатель’’, хуркари’’ кружок’’, факультатив’’ манзаям’ пэртя’’ Елена Николаевнахад’ мядонзэйӈэ’ ня’’амадонзь. Тарця манзаям’ ня’’амась нида’’ маймбиць. Хурка материал’ Елена Николаевна едэй сертавы книганда’ мю’’ ма’’лась? Тикы вада’’ хара’’, табеко’ мэта вада’’ хара’’, тикахад пунрава’, лэтрёва’ вада’’, пунӈэ мэта вада’’; табекова’, хынумдава’ вада’’ – малӈэ’ ӈопой книгахана ховы’’ ӈэӈгу’’.

Вада’’ хара’’ – « Вабтомы идм’ нир ма’’лаӈгу, хэвы ялямд нир сал’’раӈгу.», «Вада муӈг нибта ӈа’’ӈод’’ сеян’ теберӈа.» , «Вадам’ падмю нир сюрт’’».

Табеко’ мэта вада’’ хара’’ – «Ӈаворма’ ёльцяӈгана хэвнямна нён’ ёӈгэ’’», «Ӈаворць мале’’мяхаданд хыди нёд нянзыбю’’.», «Ӈани нянд илам’ нёр хамз’’».

Пунрава’, лэтрёва’ вада’’- «Тум’ нён сянакус’’, ту’ хада нензюмда – сер’’ хадкэӈгу.», «Тун’ нён сабцяр’’ – нямюр мерёмда (паереӈгу).»

Табекова’, хынумдава’ вада’’ – « Лорцэй, лорцэй! Ной пи’’ил питов, питов! Лорцей, лорцей! Тар’’ пи’’ил питов, питов!»

Тарця тарана книгам’ хэвхы округханана илена не Елена Николаевна Окотэтта падась. Хэвхы округхана ӈацекы’’ няюв манзарана’’ нина’’ теда манзаянандо’ мэ’’ӈадо’. Ёнар’’ книга’’, ӈопой тарця манзая’ маня’’ яхана харвабнанда тэвӈгу’’.