Пухуця тумда пятада. Си’’ми лимбикако панэхэ’ емба’’ӈа. Саць тянюмбовна си’’ми ӈавалаӈаха’. Ӈавала’’махаданди’ си’’ми хонабталаӈаха’. Ӈани’ пи’ сеӈгава’’ юркына’’.Тейхад ӈокаркавна ӈавалаӈаха’. Си’’ив си’’ми тарем’ ӈаволамбихи’. Си’’ив ӈэсоӈгана си’’ми ненэйвана ӈаваламба пяӈаха’. Ти илем’. Мерця мунли со. Тас по’ илева’’. Тас по’ ямбан’ хоным’. Тас по’ ӈэсонзь мань тарем’ мадм’: -Пин’ тарпаба’’н вэвав’?
Ирив тарем’ ма: – Хадар ембдяртаданд тата, тикавахана тарпаӈгун. Мань тарем’ мадм’: – Хибяди’ ӈэдакэди’? Ирив тарем’ ма: – Мань си’’ми Ӈарка Сэв Сэрмана пэрӈа’’, няби мякана Нюдя Сэв Сэр’’ няв таня. Тедамбой’ ядэрӈа. Небой похона сит ховани нерня ныхытадамда пюрманзь хаясь. Мань няв вэва. Илева’ ямбан’ няхадан пина илем’. Теда пин’ хэван’ харвананё’’, нян тованда ёльцяӈэ хая. Харврбта тута. Пыда няни’ манда:- «Пыдар ӈарабцодамд вадабавэнанё’’?». Мань тарем’ мадм’: -Няханд вуним’ харваӈгу’’, хэвахананд ӈамдёдам’.
Хадав ной танзитана мальцям’ та’’нив’. Ирин хэван’ пин’ ӈамдыв’’. Яля’ ямбахана тарем’ ӈамдыни’. Мале пэвсюмданы’’. Ӈамгэ’ пирка’’на ӈэдалёда ӈадимя. Нултада. Тикар Тикар юда Сэв Сэр’’ ӈэвы. Мань хэвахан нултада. Ханахартамда ни сяр’’. Ӈобда тамдалпи, ӈарка няханда ма’’нив: – НЯдани таре ӈарабцодамд вадавэн.
Сидя я’’выкани’ лабцей’’, мань ӈо’’ лапцейв’’. Хасенава сер’’ вуни таня’’. Тадахава ӈобт’ лабцейни’. Си’’ив’ хабтаркада таня ну’’. Ӈаркарка’’ ӈэвы’’.
Няхаркав яля’ мани’ пёдани’. Няхар’’ ӈэсоӈгана нюдя Сэв Сэрм’ ӈылан мов. Нюдя Сэв Сэрм’ хадав. Си’’ми хадабадам’ вунив савадаӈгу’’. Ӈарка Сэв Сэр’’ пыда тарем’ ма: – Маньди илеван ямбан’ пинаманзь. Тедахав’ хадар такы ханда ханар ӈэя, мята мя’’л ӈэя, неда ӈани’ нер ӈэя. Сит нюдани мэӈгум’.
Вэсако’ ня’ мят’ тюӈаха’, нен’ ма’’нихим’: -Вэсакор харта харвась. Теда’ ӈацекы пирдаледа, хадада. Ӈацекым’ пирдалевы ӈэбта нюдя Сэв Сэр’ ӈацекым’ хадаӈгудась. Не, сит ӈацекэн’ митани’.
Харна’’ сермняна мядоӈава’’. Та’ илелъяв’’. Ӈани тас по’ илева’’. Тас по’ ӈэсоӈгана мань мадм’:- Ири’, мань ӈо’’ тын таня’’ ни’’им’. Тарси’’ тенейн. НЯмд Пай вэсако’ ю’ ёнарта тыда таняць. Тыни пюрманзь хантам’. Ирими’ ма’’нив’: – Теда’ Нюдя Сэв Сэрнэ хань’’. Паныда сер’’, ханда мэс’’, тыда подер’’. Хибяри’’ юнраб’’ манзь пэр’’: «Нюдя Сэв Сэртм’.» Тыда тана’’ нинав’. Нюдя Сэв Сэр’’ си’’ив хабтаркамда подеръян. Подеро’’махадан ирив хэвани то. Пыда тарем’ ма:- Тэхэв’’ таня’’. Тэхэбини мэ’’махани мась’’, ӈамахани мась’’. Хаёвы сер’’ хуркари’’ ӈэя’’.
Мань тарем’ мадм’: -Ирив, хадав, сидди’ вуним’ хаеӈгу’’. Ти ӈэдалэйв’’. Сыра’ ямбан’ ӈэдалыдм’. Ӈамгэ’ пирка’’на нярахалёда хой’ ни’ нултав. Хой’ ядувна ябтако яхако хэвы. Яхако харахана ӈоб’’ ӈарка мя’’. Тыда мяд’ хэвахана ва’’анвы’’. Тикы’ мят’ ӈэдалэйв’’. Вад’ ня’’авахана ты’’ ва’’анвы’’. Вад’ малан’ нултав. Вэн’’ тёрейд’’. Вэно’’ тёресь не тарпы’’. Хабтарка тэта’’ не ӈэвы. Не ма’’нив’: – Нюдя Сэв Сэр’’, тев’ тэвавэн. Небой похона турманорсеню’’.
Мань тарем’ мадм’: -Небой похона турӈадамзь. Нид ху’ хэся’’? Не ма’’нив’: -Няхар’’ Тавысе’’э нюядко не нядо’ таня. Нямдо’ нюдя Туӈгот’ мипидо’. Тюванзь хаяць. Хубта ни ӈа’’. Няхар’’ Тавысе’’э мядодо’ хой’ тюнд’ пинякуна ӈа’’. Мань тарем’ мадм’: -Мань тыни хубта яхад мэтини’. Сянахав тэдав та’’ма. Не ма’’нив’: – Тэдар харт ня’’ам’’.
