Маня’’ округханана паднана’’ нина’’ тянё ни’’ӈа’’. Тарця хибярина поӈгана ненэця’’ вадавна паднана’’ нина’’ таня’’. Матрёна Ивановна Талеева «Таты» пьесам’ падась, тюку яля’ пьесанда пудана’ пелям’ толада’’.

Ты’’ юркулыд’’, сую’’ туроӈа, нерденя ты’’ хантана’’. Ты’’ ватомдо’ теневадо’. Ты’ ӈомахана ӈацекэри’’ хаи’’. Хасаваха’ вад’ няю нись паромбю ядалъяха’. Не’’ ӈани’ ваӈг няю, лаханакоя яда’’.

Мика: Ӈацекэӈэ, хибяра сямянхат ӈокавна пилюм’ хада? Толэйда’’, сянда?

Яктя: Ӈэтёв, мань сямянхат ӈокавна хадам’. Тита сяӈок, саць ӈока.

Пале: Савва ню, пыдхавар мядондан, не’ ӈацекэхэт хибядо’ ваӈада?

Уле: Ӈэтёв, сыр’’, мань си’’ыв ю’’ си’’ыв пилёв.

Еле: Мань ӈани юркад ваӈа.

Евдя: Мани’ Эдэн’ ня ӈопой хобани’ хадабинись. Улева’’ нядни’ ӈокавна хада.

Мика: Ти, Уле мядоманзь ятна. Саць пэдавада, ӈока пилём’ хадада. Хури’’ пон’ тына’’ хасена’ ваныць. Хаяда’’ сяйӈада’’, ӈамнелада ӈавар стол’ ниня ӈатена’’. Мани’ няканда ня’ харни’ пилё я’ ӈыл мэӈгуни’, пилё ӈэвадо хэвняку я’ ӈыл сюртыни’.

Уле: Хакэй, мань нянанд мядоманзь тутадм’, ӈэтяв тарем мась. Мань ӈоб’’ ӈока сянув пилём’, хоба пилём’ ӈо’’ мардадм’.

Луке’ пухуця: Саць ӈоб’’ я’’авлын, сяй’ пуд паскойвана ембсад, тыни’ подерпэй’’, мань ӈо’’ ембтыв’’.

Еване: Яктя, Татё, тям’ пыдари’ мядонзэйди’ ӈэя, тоти’ сяй’ хыдя, мюнанди’ хампет’’, холаць’’ ӈа’’. Мякна мэна ниди’ мядолабтади’.

Пале: Лакамбой ӈэёв, пыдари’’ ӈани’ сидна’’ вэдоманзь турӈадов! (ханамда вадада, тыта ӈэ хамада, вадна мядонзэй тыта’ няю васадэй’’, янамбовна ӈэдалэй’’.)

Тыне: Лакамбоей, лакамбоей, пыдара’’ ӈани’ мядоманзь турӈадов! (хасаванда пумна няватала ӈэдалэй’’.)

Луке’ пухуця: Хавряв си’’ым хосая турӈая, ӈатенаӈгудм’, тедари’ лакамбой ӈэя!

Луке’ пухуця паской ной паным’ сервы, панода тю’’у мэвыда, ӈэванда’ ниня ибтерена няръяна плат, не’ нюнда пумна няваталӈго ӈэдалэй’’. Вад’ хэвхана Мика, Еване ӈацекыта ня’ нусь хаи’’, ӈэдалавы пумна сырӈа’’.