Хаювы ирийна сидя ю’’ няхарамдэй толыркана ЛитО «Заполярье» сиднтет ю’’ пода панысь. Округна паднана’’ хибярина тарця ялямдо’ мэ’’ӈадонзь. Тарця ялян’ ханяӈы паднана едэй манзаидо’ ӈадимяць.

Округна литературной объединение историяда ӈахы’’ похот’ миӈа’’. Таӈок по’’ ямбан ӈока паднана’’ хибярина ӈобкана ма’’лёсь серудо’ тасламбиць. Паднава’’ серудо’ тю’’у пэрӈаць. Округна луца’’ вадавна манзь: литература – паднава сер’ няхар’юдимдей похот’ миӈа’’. Маня’’ яханана илевы’’ хибяри’’ поӈгана паднава серм’ харвабтана невхы похо’’на ӈод’ таняць. Харто’ падвы манзаидо’ хибярина округна газетан’ ёнар’’ хасуюёнар’’ няхар’’ ю’’ нябимдей похот’ тэврамбидось. Сямянд’ нертей стих’’, проза’’ сиднтет’юкад вата по’’ тяхана «Няръяна вындер» газетана ӈадиберӈаць. Тамальӈгы похона газетанана манзаравы Георгий Суфтин, Иван Меньшиков няюв’ таремъв’ ибедормэхэнзь: газетахана литкружок ӈадимдесь. Тарем’ маля ёнар’’ хасуюёнар’’ няхар’’ ю’’ тетимдей по’ январь’ ирий сидя ю’’ няхарамдэй толыркана яля’ пэвсюмбы’ пеля мат’’ сясхана редакция’ мякана паднава серм’ харвабтана’’ хибяри’’ нюртей ма’’лёван’ ма’’лэйдаць. Тикы’ яляхад’ округна литература’ ӈадимданвам’ минрева’’. Нертей ма’’лёва’ пуд газетахана литературной страница’ ӈадимясь, ханяна округна паднана’’ падвы’’ манзая’’ ӈадимяць. Тикы’ пуд тарця страница’’ ирийхана сидя – няхар’’ ӈадибермы’’ ӈэсьты’’. Литературной кружокхана’ мэна’’ хибярина ӈод’ ӈобӈгэв’ ма’’люрцеты’’.

Маля 1935 няби 1936 похона Няръяна маркана «Заполярьем’» нюбета альманах нити’ пумна тарпъяханзь’. 1936 похона Няръяна март’ журналист Николай Леонтьев товысь. Пыда округна ӈэсымна ӈэдалёрць паднана’’ хибяри’’ хобвысь, тарем’ газетахана Маремьяна Голубкова манзая’’ ӈадимяць. Тарем’ Георгий Суфтин, Иван Меньшиков, Маремьяна Голубкова, Николай Леонтьев округна паднани’’ ӈобня’ ма’’ламбиць. Янамбовна литкружокан’ турта’’ хибяри’’ ӈокамданаць, паднанина’’ толыр’’ вадюданась. Сайнорма похо’’на паднава сер’ нулъяць. Хасава’’ сайнорманзь’ хаяць, ямдо’ сахарамбась яӈгумаць – Иван Меньшиков, Антон Пырерка, Александр Кузнецов; Вайгачхана Николай Вылка.

Сайнорма по’’ ваерась «Заполярье» литературной объединением’ мэць маля ёнар’’ хасуюёнар’’ самляӈг ю’’ тетимдей похона манзарась’ пядась. Паднана’’ ӈани’ ӈобкана ма’’люрӈаць. Таняна мэвы’’ поӈгана ненэця’’ паднана’’ Василий Ледков, Алексей Пичков, Александр Канюков, тикахад’ Прокопий Явтысый нядавыць. 1959 похона «Заполярье» няхарамдэй альманах тарпыць.

Тетимдей альманах си’’ив юдимдей похона маля хамадёвысь, паднана Александр Канюков ма’’ладась. Паднанана лакри’’яӈгумзь’ сертавы манзаяда’ ӈод юховысь. Тарем’ ниць’ тарп’’. Тикы’ пуд юкад’ вата по’’ литобъединение’ манзая нись’ ӈадю’’. 80-90 похо’’на ЛитО манзаям’ Александр Тунгусов, Роберт Вылка нерня масабтадись. Тарця паднана’’ нюв’ ӈадимяць- С.Шангин, Л.Валей, Т.Дуркина, А.Чуклин, В.Толкачев, А.Меситов.

По’’ ваерась ЛитО «Заполярье» ныхыдамда ма’’ла’’, едэй паднана’’ ӈадимя’’. 2004 поход’ альманах хусувэй по’ӈадиберӈа’’. 2005 поход’ этнокультурный центр’ няюв ӈобнзер’ манзара’’. Тет’ яӈганя книгам’ хамадаць, альманах’’ сертаби’’, ӈацекы’’ е’’эмня «Пунушка» журналм’ ӈадимбець. Литобъединение манзаяда нерня миӈа, несэй луца’’, ненэця’’ вадавна паднана нюв’ ӈадиберӈа’’.

2009 поход’ ЛитО «Заполярье» «Народный самодеятельный коллектив» нювм’ мэ’’ӈа.