Сидя ю’’ самляӈг по’’ тяхана Няръяна маркана ӈарка пэвдэй ирийна нябимдей яӈганя’ толыркана округханана илена’’ ненэця’’ ӈарка ма’’лёйм’ мэ’’манзь ма’’лэйдаць. Хибяри’’, хуний минрена’’ иландо’ несэювна сылыдаць. Хибяри’’, хуний харто’ ныхыто’ енась нерня илевамдо’ тасламбась пядось. Хибяхартан’ нись ена’’ харто’ серудо’ минреван’ харвэлыдаць.

Округна хусувэй ӈэсыхыт’ товы’’ ненэця’’ маркана илена’’ ненэцие’’ няюв’ танеда’’ серудо’ таславанзь ӈобкана ма’’лэйдаць. Няръяна маркана ӈэрм’ тенз’ мэта’’ ненэця’’ ма’’лёсь едэй организациядамдо’ ӈадимдець. Тамальӈгана яханана общественной организация’ соясь. Ненэциена тарця организациямдо’ «Ясавэйӈэ’» нюмдедонзь. «Ясавэй» – ненэцие’’ нерня мима’’ е’’эмня ӈадимдевысь. Сидя ю’’ самляӈг по’’ тяхана ма’’лась хибярина нерня манзарава’’ нямна серудо’ ӈобкана таслэйдось, ваде’’ӈадось: ӈамгэ’ е’’эмня тарця организациям’ сертамбидо’, ханзер’’ тад’ нерня манзараӈгу’’, ӈобкана хурка’’ серу’’ таслабӈгу’’. Нюртей нерм’ пэртяӈэ’ ненэциена Ангелина Ардеевам’ тэраць, Советхана манзаравнда ненэцие’’ нюмдець. «Ясавэйва» манзарась’ пядась.

Тюку по’ ӈарка пэвдэй ирийна нябимдей яӈганя яляхана «Ясавэй» ассоциацияна сидя ю’’ самляӈг пом’ мэ’’мась ма’’люрӈаваць. «Арктика» КДЦ- мякана яндахат’ товы’’ хибяри’’ ма’’лыць. Асоциацияна ма’’лёйм’ президентӈэ’ тарана Александр Белугин нэдась. Тикахад’ ма’’лавы’’ хибярихи’ харто’ нюртей вадидо’ ервуна’’ хэтаць, ӈани’’ организацияхад’ лаханавы’’ – Фёдор Канев, тикы «Изватас» нерм’ пэртя, Андрей Вокуев округханана Баренц-секретариат’ манзаям’ нерня минренава. Финляндия’ Рованием’ маркад Арктический центр’ Лапландия университетхад’ товы’’ хибяри’’ харто’ манзаито’ нямна вадам’ хибярихина’’ тэвраць. «ORHELIA» проектмана манзара’’мидо’ ваде’’ӈаць.

Тикахад’ «25 лет Ассоциации «Ясавэй»: история, реальность, перспективы.» круглый стол’ ваерась. Хибярина сюртяв’ тол’ тяха’’ ӈамдась ассоциацияна сидя ю’’ самляӈг по’’ ямбан манзаравам’ тасламбиць. Теда ассоциацияна серу’’ нерня пэртя’’ нина’’ ваде’’ӈадось хурка манзаи’’ пудана по’ ямбан сертаць, ханзер’’ ассоциациява манзара. Сямянд’ нерде вадамда минревы’’ президент’ А.Е. Белугин. Пыда’ пуданда В.В. Песков, Ю.А. Ледкова, А.И. Ардеев, В.М. Вылка лаханаць, хусувэдо’ сертавы’’ манзаито’ нямна вади’’ хэтбиць. Тарем’ хэтхая’’, ассоциациява манзара. Яндахат’ товы’’ хибярина ӈод’ харто’ вадидо’ хэтбиць. Культура’ серуна яханана ханзер’’ мима’нямна сата’’ вадам’ этно-культурный центрана ӈэвахана мэна В.С.Зганич хэтась. Хусувэй вадам’ мэ’’мы хибярихид’ тарця вада’’ соць: нянэй ненэця’’ тад’ нерня ныхыдо’ ма’’лась ӈоб’ нерня хуркари’’ серкана нидо’ нядабась манзарабнандо’. Маня’’ ненэцяӈэ’ янда’’ ӈэбна’’ вуни’ тара’’. Ӈобкана, нина’’ нядаба’’, нина’’ хамадаба’’ ядбана’’ илева’’ незеларкась’ минд’ нив’’. Тикахана хусувэва’’ ныхыта’’.

Ма’’лёвана пуданана ихиня сомбой сер’ ваерась. Сидя ю’’ самляӈг по’’ ямбан ассоциациям’ нядабавы’’ хибяри’’ ихид’ миндя’’ вади’’ намдаць, мядонзэйм’ ня’’маць. Ӈокханда си’’ив юкад’ вата хибяри’’ нюмдець.

«Ясавэй» ассоциацияна сидя ю’’ самляӈг пом’ мадава’’. Ӈэрм’ тенз’ ненэцие’’ серу’’ тасламбада’’, ненэцие’’ нядабада’’ организациява иле’’, манзара’’. Нерняна ӈод’ манзаяда сававна миӈая’’, нина’’ таромда маниея’’.