Округханана тыбэртя’’ ненэциена хусувэй выӈгана тыдо’ пэрць мюсерӈа’’. Ханяӈы яхана ненэця’’ невхы по’’ тотрев’ нянэй мякана иле’’, не’’ хасавидо’ хусувэй серкана нядабидо’, нюдо’ хэвханандо’ вадюдана’’. Ханяӈы яхана мяд’ ханзуйӈэ’ ненэця’’ балокхана иле’’, тарця ӈэсына’’ хасавари’’ тыдо’ пэрць мюсерӈа’’.

 Недо’, нюдо’ хардахана илесь’ хаюрӈа’’. Невхэна хой’ тер’’ ненэця’’ колхозхана манзаранаӈэ' таславыць. Колхоз’ тыбэртяӈэ’ манзараць, тикы’ поӈгана харто’ тыдо’ ӈод пэрцеты’’. Тены’’ похо’’на’’ округна тыбэртя’’ сельско-хозяйственный кооперативхана тыбэртяӈэ’ манзара’’. Тамна тарця ненэциена таня’’, хуний тыдо’ семейно-родовой общинахана пэръядо’. Тарем’ Нюдя яхана хибярина’’ мюсерӈа’’, тыто’ толыр’’ ӈокамдаби’’. Тамна яханана «Канин» нюбета общинава таня, таняна мюсерта’’ ненэця’’ маля сидя юкад’ вата по’’ ямбан тарем’ манзара’’. «Ямб’ то» общинахана илена’’ ненэця’’ илевандо’ ямбан харто’ тыдо’ пэрць мюсерӈа’’. Харто’ ныхыто’ енась’ илевамдо’ тидхалембидо’. Ӈокханда маня’’ яханана юр’’ сиднтет ю’’ ёнаркад вата’’ ты’’ хадырӈа’’, ёнаркад’ вата хибярива выӈгы’ илм’ мэць явнана мюсерӈа’’.

Теда тыбэртина’’ маля сывы’ мюсерць’ яханато’ тэвбэй’’. Ӈэрёй’ яляха’ тэвась хойхана манзаранина’’ тыто’ толыр’’ таслась, ӈамзаӈэ’ ханавнда тыдо’ яӈгрейдось. Нюдя’ пэвдэй ирийхад’ яндаха’’на ханярина хойхана манзарана’’ нина’’ тыдо’ хабарпи’’. Тюку по’ ты’’ хэвндо’ сава ӈэбнандо’ таранарха’. Та’ ямбан ханзось’, епьда’’ яля’’ яӈгуць’, тикахад’ ты’’ ӈаврадо’ ӈод тянё нись’ӈа’’, тудако’’ янда’’хана’’ ӈокаць’. Ты’’ хабарпава манзаидо’ тыбэртина’’ нянэювна тецьда яля’’ пуд’ пэрцеты’’. Тюку по’ сямянд’ нерде забой’ манзаидо’ «Путь Ильича» СПК манзарана’’ пэйдось, тикы сельско-хозяйственный кооперативхана серудо’ сававна миӈа’’. Тыбэртидо’ манзаяхато’ ив’ ер сырӈа’’, тыдо’ сававна маниейдо’. Тюку по’ тыто’ хабарпава’’ манзаидо’ едэй сертавы комплексхана минрейдо’. Ӈокханда мат’’ёнар’’ няхар’’ юр’’ тым’ хабарӈаць. «Ижемский оленевод и Ко» СПК манзарана’’ по’ забоян’ сиднтет ёнаркад’ вата тым’ тэвраць. Нюдя’ пэвдэй еркы’ толыркад’ СПК «Ерв», «Харп» тыбэртя’’ забой’ манзаидо’ миӈа’’. «Харп» сельхозкооператив’  забоян’ тет ёнар’’ няхар’’ юр’’ тэмдо’ яӈгревыць, тикахад’ юр’’ сидя юр’’ вата тонна’’ ты’’ӈамзам’ ня’’амвась едты’’.

Нерняна товнда яля’’ пиркана «Няръяна тэхэна» тыдо’ хабарпава манзаидо’ пяӈгу’’. Тыбэртя’’ тыдо’ тюку по’ Коткино’ ӈэсыхына мипгудо’, таня’’ ёнар’’ тым’ тэвраць. Тет ю’’ тонна’’ ӈамзам’ ня’’амвась ятна’’.

Ты’’хабарпава манзая’ округханана тамна миӈа’’.