Сайнорма маня’’ яханана яӈгусь. Тарем’ ӈод хусувэй ӈэрм’ яхад хибяри’’ ямдо’ лэтравась хаяць. Победа’ яля това е’’эмня яханана илена’’ хибяри’’ ныхыдо’ нись’ сяй манзараць. Тамальӈгы похо’’на округханана няхар’’ ю’’ сидндет ёнар’’ мат юр’’ самляӈг ю’’ хибяри’’ илець.
Саю’’ по’’ ямбан маня’’ округхадана хасую’’ ёнар’’ няхар юр’’ сидндет ю’’ няхар хибяри’’ сайнормась хаяць. Манзарась пирта’’ хасава’’ хаяць. Не’’, пухуця’’, вэсако’’, ӈацекы’’ манзаранаӈэ’ хаиць. Пыдо’ сайнормась хэвы нидо’ нядамбиць.
Маня’’ хибярина ханярина сайнорӈаць. Ӈокаювдо’ Ӈэрм’ яхана сайнорӈаць – Карельский, Ленинградский фронтхана; Мурманск’ марад’ хэвхана. Теневава’’- ханзер ява лэтбидось, ханзер ненэциена сайнорӈаць. Ӈэрм’ яхад ӈэдалавы’’ хибярина иба’ яхана ӈод сайнормыць. Маня’’ яхадана хэвы’’ хибярина Сталинградский битвахана мэвыць. Сталинград’ марад’ хэвхана сайнормы хибяри’’ округхадана ӈани’ таняць. Тюку ялян’ таслась – самляӈг юкад’ вата хибярива таняна сайнормыць, тет ю’’ хибярива ӈэвдо’ таняна масьтець. Сталинград’ марад хэвхана сайнормы поӈгана нянэй ненэця’’ ӈод таневыць. Пыдо’ нюбидо ти’ – Алексей Нестерович Валей – 1910 похона соявысь, Хоседа Хардахад сайнормась хэвысь. 31.12. 1942 похона Пимено- Черни ӈэсыкоця’ хэвхана яӈгумысь. Семен Васильевич Ванеканев – 1908 похона соявы, Песты ӈэсыхыд’ ӈэвысь, 1943 похона яӈгумысь Сталинградский областьхана.
Илья Симонович Тайбарей 1911 похона соявы, Каратайка ӈэсы’ тер, 1945 по’ яра’ ирийхана Сталинград’ марад’ хэвхана яӈгумысь. Иван Аввакумович Талеев -1922 похона соявы ненэць, Няхар Бугры ӈэсыд’ хэвысь, 1943 по’ январь’ ирий 29 толыркана яӈгумысь Сталинградский область Городищем’ нюбета ӈэсыхына.
Округханана ӈока по’’ ямбан Гаврил Никитич Марков илесь. Тикы сайнормы ненэць. Ӈока Победа яляхана памятник’ хэвхана сайнормы ветеран’’ поӈгана маниесьтыва. Гаврил Никитич ӈобтарем’ Сталинградхана сайнормысь.
Тикы хасава ӈавнанда Читинский областьхана соявысь, таняна сайнорма по’’ ӈэсонд илевысь. 1941 по’ неняӈг’’ ирийхана Красной Армиян’ еримясь. Сталинградский битвам’ саць сававна тенедась, таняхад’ госпиталян’ еримысь. Гаврил Никитич нябимдей танковой корпусхана служевысь. Тянембёвна Берлин’ ӈэсонд нивыць тэв. Сайнорма’ пуд пыда харта яханда тэвыць. Тохолкодаӈэ’ ӈэсынанда манзаравысь. Тикахад тоходанась тарава’ нид Гаврил Никитич Ленинград’ март’ ӈэдалавыць, таняна сян по’’ ямбан институтхана тоходанась. Ленинградхана недамда ядабтавысь – тикы Александра Ефимовна Маркова Канин’ я’ некоця. Институт’ ёльцесь пыди’ Ненэцие округан’ тоӈаханзь. Гаврил Никитич 1951 поход’ Няръяна мякана киномеханикӈэ’ манзарась, «Северный полюс» колхоз’ ӈэсымна ӈэдалёрӈась. Пудана похо’’на Няръяна маркана илеӈаханзь, тюку яхана сюры.
