Яра ирий сидя ю’’ нюртей яляхана я’ сяр ниня’’ илена’’ хибяри’’ тарця ялям’ мэ’’ӈа’’ – Международный день родного языка. Тарця ялям’ маля сян’’ по’’ ямбан ханярина ядтабидо’. Маня’’ округва ӈод тарця сава серкад’ нисьты’’ хадю’’.

Маня’’ илесь яханана хуркари’’ тенз’ мэта хибяри’’, хусувэдо’ харто’ вадамдо’ мэта’’. Ӈокаювдо’ харто’ вадавнандо’ харвась’ лахана’’, вадандо’ таром’ мэ’’ӈа’’. Тюку по’ яханана тарця ялям’ мэ’’ӈаваць. Этнокультурный центрхана манзарана’’ нина’’ ихиня’ сомбой мероприятием’ хамадаць. «Мань вадав’, мань няв’» нюмда ненэця’ вадавна хэтась таремъюв’ сось. Тикы яля’ нянэй ныланава яляӈэ’ ха’’мыць. «Арктикам’» нюбета культура’ хардахана ӈока хибяри’’ ма’’люрӈаць. Хуркари’’ тенз’ мэта хибяри’’ ӈобкана ныланаць, хари’’ вадавнандо’ лаханаць. Поӈгнандо’ ненэця’’ хибярина ӈод таняць. Хибяри’’, хуний харто’ вадамдо’ мэ’’ӈа’’, харто’ культурамдо’ тенева’’, харто’ паӈгудо’ лэтби’’, нянэй ненэцяӈгат’ сидя мяд’ тер’’ тарця ныланава яляхана пыдадо’ манэ’’лабтабиць. Тикы Татьяна Павловна Бецко, Надежда Николаевна Талеева. Пыди’ сидди’ перениди’, нюкциди’, нюти’ ню’’ нядабиць.  Маня’’ нина’’ ненэцие’ лаханако’’ манэ’’лабтаць, тикахад’ вада’ хара ваде’’ӈаць, хобцоко’’ хомбиць. Таняна мэвы’’ нина’’ харто’ вадамдо’ мэнена’’ хибяри’’.

Татьяна Павловна Бецко тарця вади’’ хэтась: - Харн вадав’ со’’ямахадан мэ’’ӈав’. Лаханаван’ ёльце харвасетыдм’, валакада ханяна лаханась няв’ сабе’ ӈока ни’’ӈа’’. Теда маркана илем’, лаханана’’ тянё’’. Невхэна Варандэна илеваць, малӈэ’ хари вадавна лаханаваць. Маня’’ нина’’ малӈэ’ тэхэ’’на мэна’’, хойхана вадываць, пилибт хойхана мюсерӈаваць. Ханзер’’ вадава ехэраӈгува’’? Тюку яля’ вадаку манэ’’лабтаби’’, тикахад’ хуркари сянакова’’, вада хара’’, хобцоко’’. Маня’’ ӈани’’ тарцява. Тюку яля’ тетӈэ’ тюкохона мэва’’- мань, не нюв’, сидя хасава нюда. Сими’ нядаби’’. Мань’ внукан’ няюв «Няръяна лэ’’мор’’ няби писяко» вадаком’ ваде’’ӈанись. Тикы невхы ненэця’ лаханако.

Тюкохона явлы’’ сава , вадидо’ теневана’’ хибяри’’ маниева’’, хари вадавна маня’’ лаханава’’. Ихинян’ ёльце сава.

Надежда Николаевна Талеева ваеравы ӈарка яляхана  мята’ терсавэй мэсь. Ӈарка яля ед’ тарця вади’’ ханась: - Мяни’ тер’’ няюв’ лаханакум’ манэ’’лабтаваць. Лаханакон’ нюмда «Нара» . Маня’’ ненэциена нара’ тован’ ёльце маймбасьту’’ ним. Маня’’ Ямал’ мяд’ тер’’ манэ’’лабтаваць. Сими’ нядабавы не нюми’, тикад’ не нюни’ нюкця, тикахад Ямал няд’ товы нями’ Татьяна Окотэтта. Перенява’’.

Тарця ма’’лёвахана ӈоб ими’ тэри’’ савась. Нина’’ манэ’’ӈава’’, хари’’ вадавна лаханава’’. Сямянд’ савада тикы – нюна’’, нюна’’ ню’’ тюкохона мэ’’. Пыдо’ сидна’’ тарця серкана нядаби’’.

Хари’ вадавнана мякнана ӈоб лаханасьтыва’’. Тедахова ӈацекэюни’ туху’’. Нюни нюкця вадам’ намдурць вады, теда сём савовна мэ’’ӈа’’.

Тарем’ ӈэбнанда нив’ тара. Хусувэй вадам’ теневана мякана хари’’ вадавна лаханась’ тара’’, тикахана нюда’’ лаханаӈгу’’, нюта’’ ню’’ вадамдо’ теневаӈгудо’. Мань вадав’, мань няв’ нянэювна ӈэбнанда тара’’.