Сидя ю’’ самляӈг по’’ тяхана ӈэрм’ яхана янда’’хана толырто’ тянё ненэця’’ ӈобт’ ма’’лёсь ассоциации’’ ӈадимдець. Таняна манзарана’’ хибяри’’ хари’ яханандо’ илена’’ ненэциедо’ хуркари’’ серкана нядабавась таславыць.
Таймыркана илена’’ харто’ ассоциациямдо’ сертаць. Тарця сер’ нямна Раиса Яптунэм’ хонрамбимась: – Яхананда ассоциацияра’ ся’’ӈы ӈадимясь?
Яптуне: Маня’’ яханана танеда ассоциациява ӈарка пэвдэй ирийна ю’’ нябимдей яляхана сидя ю’’ самляӈг пова мэтава’’. Ӈоб’ тикы ӈопой похона сертавы ӈэ’’нисям’ ӈавнанда. Ассоциация ненэцие’’ нядабава е’’эмня сертавы нисям’ ӈа’’, общественный организация’ нив’ ӈа’’. Ненэцяр’ тута’’, танеда серуда ваде’’та. Промысловой точкахана мэна’’ ненэця’’ ӈэя’’, тикыед’ лимитадо’ ня’’ама я’’амась выдараӈга’’, тикахад’ тарана падар’ серта’’ ехэра’’. Теда, сямянд’ лимитсипой’ ӈамгэм’ хадаӈгун’ ӈамгарина? Ненэця’’ ассоциацияна няку’ ханта’’, таняна сиддо’ нядаӈгу’’. Ассоциациява’ янана манзара.
Корр: Хибя’ теда ассоциациямда ӈудаханата ня’’амбида?
– Ассоциациява нядабада Сидор Чуприн, долган, палытанаӈэ’ манзарась, таняхад’ пенсиян’ тарпыць. Падарм’ сававна теневахая’ ненэцие’’ ӈоб нядабасьтыда. Тарця манзарана’’ саць’ тара’’. Тамна тарця проблема’ таня. Маня’’ ассоциацияна’ манзарась лохода вани’’ таня’’, манзарась лохом’ салдабась нив’ тара?! Общественный организация’ есям’ ханяхад’ хоӈгу? Ти’, лохона яӈгось. Тайна ма’’лёдава, тикахад’ ӈани’ яхана ма’’лёдава, ӈопой таславы ява вани’’ таня’’. Манзараванда е’’эмня есям’ нись’ ня’’амарпю. Теда краевой ассоциацияхад’ депутат Валерий Хольмович Вэнго таня, пыда краевой ассоциациям’ ня’’амби. Тикар’ сертавысь есядамда, теда недбяда” танеӈгу.
Корр: Пыдара’’ краевой ассоциация отделенияӈэ’ переда?
– Маня’’ таняхад’ перева’’. Ӈопой Красноярский крайва нив’ ӈа’’. Таняна тамна Эвенкия ассоциациява ӈоб’тикы таня, тикахад’ Туруханский районхана илена’’, тикахад’ селькуп’’- тасу’’ хаби’’.
Корр: Невхэна пыдара’’ Долгано-Ненецкий округӈэ’ толыдаць, теда Красноярский край муниципальной районӈэ’ хаядаць. Сян’ поӈэ’ тарем’ иледа’’, илера’’ несэйӈэ’ хая тюкохона мэсь? Тоенаркаӈэ’ ни’’ хань?
– Тикава 2006 похона сертавы ӈэ’’ нисяв. Маля сиднтет поӈэ’ хая. Илава’’ вов’’нив’’. Округва яӈгумдась, муниципальной район’ ӈамгэда таня? Таймырхана ӈока поселка’’ яӈгу, ю’’ тет поселок’’. Дудинка, тикахад’ Норильск, тикахад’ тамна сидя мар’’. Муниципальный район’ ӈамгэ’ полномочияда таня? Тальня’’ турта’’ еся’’ тянёма’’. Хусувэй Федеральный Закон’ манзарава е’’эмня пон’ ӈатена’’ тара’’, хусувэй ӈамгэ’ крайхад’ нив’мий’’. Тыбэртя’’ нямна ӈэда Закон’, тикыд’ мал’’ нямарпа’’ ним’ тара’’. Ӈули’’ ӈока ӈамгэва ёс’’ нивам’’.
Корр: Ӈэрм’ тенз’ мэта хибярихит’ депутатда’’ таня’’?
–Тарця хибярихит’ ялда ӈопой’ депутатва’’. Иб’ ӈод депутатский состава ю’’ самляӈг хибяри’’. Тикы поӈгана ялда ӈопой депутатва. Маня’’ тянёва нивам’ ӈа’’, хусувэй участокан’ тянёӈэ’ нивам’ ерибер’’. Ханярина луцар’ ӈока, пыдо’ луца’’ нидо” тэраби’’. Тад’ нерня мань’ ихинани’ тарем’ сава. Квотава танебнанда тара, ӈоб’ районхана ӈэя’’, крайхана ӈэя’’. Тикахана хар’’на нина’’ депутат’’ поӈгана танеӈгу’’.
