Маӈгабада Вэсакор парисе’’э Налтонда ня’ харасяда ян’ яда пяди’. Ӈоб’’ ямб по’ яд’’махаданди’ неранди’ няна луца’ юр’’ мя’’ макодито’ сихи’’ нёдо тоховы’’. Тарем’ сырпата ертена мяти’ нита хэӈгхана ерибермакы, тохо’’мада яӈгу. Мядо’’ помна еркы мят’ яданари хинда ӈоб’’ ӈацекы яда’’мам’ пя. Тикы ӈацекэця еркы мякад ӈадибермы. Вэсако мят’ тю. Не ӈацякэця хальмер небянда ӈамяхат ӈамя.

Маӈгабада Вэсакор тикы не ӈацекым’ мине харасяда ян’ ӈани’ ядалъй’’. Сянд хунат ядабати’ ӈод’’ нюдямбой яха’ варрин’ пя мядикоцям’ ӈани’ серта’’ нив’, сидя нёхона пыда сертада. Парисе’’э Нальтом’ ӈобтарем’ еся салан’ сярада. Не нюхунда тарем’ ма: – Вэнеконд мадлаб’’ нён’ ӈадиьер’’, Вэнекор ӈэдахая еся сал’ ни’ ӈамдор’’.

Ялэма’ няна Маӈгабада Вэсако хане хаянё’’. Сянахав яля’ сыӈгарёда яӈгу. Ӈамгэ’ пирка’’на Парисе’’э Налто харта мадлы’’. Вэсако’не ню пин’ ни’’им’ тарп’’. Пихи пихна ӈылека товы, пыда тарем’ ма: -Хибя’ нюхуван ӈэхэянакэн? Вэсако’ не ню манзь ханада: – Ӈари’’ маньзяван Маӈгабада Вэсако’ не нюдм’. Тикахавахана сюдбя ӈылека тикы вадахат ян’ хубкада, манзь ханада: – Ӈамгэ ӈылекан’ маня’’ тэвына’’? Маӈгабада Вэсако си’’ив я’ я’’амвэ, ям’’вэда яӈгу, таня ӈо’’ хэбея. Хаданда ӈылама, пуямда пилю’’ӈа.

Си’’ив ӈэсоӈгана Вэсако тэвы’’. Тэвабата ӈод’’ нюхунда масьнё’’: Тюку’ яхат хэб’’ни тара.

Тебтад’ няна сэвакуто’ ед’ ӈани ядалъяд’’. Ӈамгэ’ пират’ яд’’махадандо’ итя ӈабтенандо’ яв’ варм’ пя’’.

Ся’’ны ӈэбто’ ныланаривы’’. Нид нылана пыдо’ сырпато’ итя ӈарка яв’ мюмня ӈоб’’ ӈарка ӈано панаць миӈанё’’. Тарем’ маниеб’’ нябтид’ тэвы хальмер тер’’ӈа, хальмер’’ ӈэбто’ мал’ илаӈы’’. Ян’ теб’’ ни’’им’. Теб’’махаданда тарем’ маманонда: – Тыни подерманзь мань хэхэрцядм’. Тикы ӈано’ ерв Ӈа ӈэривы. Ӈа яӈгодан’ тикы ӈано’ терм’ ян’ тэвабидо’. Парисе’’э Нальто няби ӈудахат ӈобо’’ сякалпида тад тикы’ пуна ӈахат ӈыхындо’ сюдарць ӈамдорӈа’’. Ӈэвакуто’ сер’ сюрба хаӈга’’. Пили’’ пуданамдо’ илебте’’махад си’’ив я’ хорам’ мэць Ӈа ти тона. Тикы яхана пыдо’ тетӈэ тад пёлмандо’ си’’ивахав яля’ ӈарвэто’ хэрна’’ ӈэӈо’’ яльняраха’’, си’’ив ӈэсоӈгана сюдбяко Ӈам’ хэвдаледо, пудёкокована ӈули’’ маторӈадо’, сейнда маликм’ я’ ӈыльня’ ӈэдарабтада. Маӈгабада Вэсако манзь ханада: – Нена’’ я’’влынё’’, сейнда маликм’ я’ хыйнзер’’ ӈэдарабтава’’,тад нерня’ я’ ӈыл’ няд нись ӈадю’’ талэртанакы, тад тикы пуна ӈа’ си’’ив я’ хорам’ ӈани’ хадэйдо’. Мята тераха’’на хаенадо’ яӈгу, ӈаномда ӈани тахабтадо’. Мята нё’ сим’ маняпэхэна саркабтадо’.

Сэвато’ сер’ ӈани’ ядалъяд’’. Сянахав по’ ядабато’ ӈод’’ нумда сырема. Ся’’ны’ ӈэбто’ нерандо’ няна луца’ юр’’ мя’’. Сававна манэць ӈахат хомбавы луца юр’’ мята, не ӈацекым’ хо’’ма мята ӈэвы. Маӈгабада Вэсако не нюхунда ма: – Тюку мят’ тюхуни’, небяр, нисяр тюкона мэриӈгуху’. Вэсако’ не ню тэри пысаӈга. Тикы’’ ӈока’’ мяд’ Ӈувоци’’ еркар’’ ӈэвы’’. Неры хадавэдо’, Есям’ тивта Ӈа ӈэвы. Маӈгабада Вэсако Ӈувоци’ тэтан’ манзь ханада: – Сеня’ ӈавнани тюку яхад, тюку мяд’ мюд ядавани сер’ ӈоб’’ не ӈацекым’ мань ходамзь, теда’ тайкуй ти.

Тикахавахана Ӈувоця’ не ню, небямда , нисямда сидя падухута ӈэдарабтаугахаюда.

Ӈувоци’ тэта сиддо’ илебте’’мянда е’’эмня Маӈгабада Вэсакон’ тарем’ ма: – Теда’ сидна’’ илебте’’мяданд ӈарка не нюми, ӈармы пирибтя, неданд ханад, таддикахад ты’’ни няби пелям’ татадм’.

Маӈгабада Вэсако нем’ мэ’’махаданда яханда мюсельй’’, вы яхананда ӈэда неро’ яхаконда хэвахана иле пэй’’.

Та’ малда