Ӈэрм’ яхана хуркари’’ тенз’ толырто’ тянё ненэця’’ иле’’. Ханяӈыдо’ маня’’ сидна’’ тотрев’ харто’ вадандо’ нерня танева’’ нямна идо’ теда няркна’’. Яханандо’ харто’ вадамдо’ мэта хибяридо’ хусувэй по’ тянёмдана’’, ӈацекыдо’ нись’ харва’’ вадамдо’ тохолабидо’, мякнандо’ ни’’ лахана’’.

Вепс’’ тенз’ мэта хибяри’’ Карелияхана, Вологодской, Ленинградской областьхана иле’’, толырто’ ӈоб тянё. Тюку ялян’ лаханась пыдо’ харто’ вадамдо’ илелътембидо’. Тамна сидя ю’’ самляӈг по’’ тяхана вадандо’ нямна миндя’’ серудо’ вэва’’ ӈэвыць. Теда тарцям’ нин’ манд’. Вадамдо’ тю’’у’’ и’’илабава серкана ӈарка манзаям’ Общество вепсской культуры сертамби. Теда вепс’’ вадавна лахананидо’ хусувэй по’ ӈокамдана’’, ӈацекыдо’ ханярина лахана’’. Вадамдо’ садикхана, школахана, тикахад’ институтхана тохолабидо’. Республикаханандо’ вепс’’ вадавна радиона манзаранидо’ таня’’, телевидениехэна харто’ вадавнандо’-передачи’’ хамадаби’’. Харто’ тенз’ хибярито’ нямна кино’’ сертамби’’. Яханандо’ маля сидя ю’’ сидя по’’ ямбан харто’ вадавнандо’ падбада газетадо’ тарпурӈа. Харто’ манзаранидо’ таня. Сидя ёнар’’ ӈоб’яӈганя поход’ журнал’ сертаби’’. Харто’ яханандо’ вепс’’ невхы похона таневы ӈарка ялудо’ мэцьты’’, хуркари’’ фестивалька’’ нидо’ ма’’лабсеты’’, харто’ ӈод’ яндамна ӈэдалёрцеты’’. Теда пыдо’ культурамдо’ тю’’у’’ и’’ладо’, невхы паӈгуто’ нямна литературам’ падби’’. Хусувэй по’ яханандо’ «Вепсской культура помдо’» мэцьты’’, тарця яляхато’ ив’ ер хамякосьты’’. Тамальӈгана яндахат’ товы’’ ненэциедо’ ӈобкана ма’’ласьтыд’, хари’’ вадаривнандо’ лаханасьты’’, харто’ ембдяродо’ мэцьты’’. Ханзер’’ теда серудо’ миӈа’’? Тикы нямна маймбась лаханасьты’’. Пыдо’ тенева’’: тарем’ нерня ӈэбнанда вададо’ танеӈгу’’, культурадо’ илеӈгу’’, вепс’’ паӈгудо’ лэтбась яханандо’ тамна пон’’ илеӈгу’’. Общество вепсской культуры яхананда сававна манзара, ӈарка серм’ пэрӈа’’.

Маня’’ ӈод яханана тарця обществом’ сертабна’’ ни’’ сава ӈа’’. Тикахана харвабнанда хари’’ вадана нямна серуна нерняюв’ тидхалцуд’’. Тедари’’ ӈопой яхана нуванё, пуняри’’ хайнава’’.