Сидя по’ тяхана округханана тамна ӈопой фольклорный коллектив’ ӈадимясь. Нянэй не’’, ӈокаювдо’ Нюдя яхана со’’явы’’, вадамдо’ теневана’’, харто’ тенз’ ненэцието’ культурам’ тю’’у пэрман’ харвана’’; хадунато’, иринато’ мэ’’мы’’ хынс’’ тенена’’ ӈобкана ма’’люрць’ пядонзь.
Ма’’люрць’, поӈгнандо’ лаханакурць’ не’’ группамдо’ «Ханебцёӈэ’» нюмдедонзь. Тюку ялян’ лаханась: сидя пота’ «Ханебцёр’» ныхыдамда ма’’ла’’, сэвхана маниесь – вады’’. Теда «Ханебцё» мэёвна ӈэта’ ниня нуна’’ коллектив, харта программамда манэ’’лабтабась явнана ӈэдалёрӈа. Тарця коллектив’ манзаям’ нерня пэртяӈэ’, нида’’ нядабадаӈэ’ Людмила Алексеевна Булыгина тара. Людмила Алексеевна нида’’ ӈобкана ма’’лаби’’, минрена манзаянандо’ тарана серудо’ тасламбада. Тюку ирийна тетимдей яляхана «Ханибцё» со’’яма ялямда мэ’’ӈась. «Ясавэй» нюбета ассоциацияна мякана ӈарка ялямдо’ мэ’’мась ма’’люрӈаць.
Сидя по’ ямбан сертавы’’ манзаядо’ маля тянё ни’’ӈа’’. Нянэй ненэцие’’ культурам’ манэ’’лабтабась ханяримна ӈэдалёрӈаць. Пыдо’ нядандо’ минда вадава Норвегияхана илена’’ хибяри’’ намдурӈадось, ханяна хуркари’’ я’ тер’’ хибяри’’ табидя’’ ма’’лёван’ ма’’люрӈаць.
«Ханебцёна» сянакода’’ нина’’ ханяӈыдо’ тамна «Тэдормахана», тикахад’ «Илебц» театрхана сянакуць. Харто’ тенздо’ культурам’ теневана’’, вадамдо’ мэнена’’, ӈэрм’ ямдо’ сахарамбада’’. Мал’’ не’’ сяӈгова сейхандо’ мэёвна тебвы хынс’’, небянато’, хадунато’ мэ’’мы’’ ярабц’’, сюдбабц’’ илелътемби’’. Тарця сер’ нерня илева’’, танева’’ е’’эмня тюку яля’ нина’’ манзара’’.
Нись’ ӈана’’ тамна «Ханибцё» ӈадимам’ намднархаваць, маля сидя поӈэ’ хая – ханзер’ нина’’ масьтевы’’ манзаидо’ манэ’’лабтабась округна ӈэдалёрӈа’’. Пыдо’ сиципой’’ ӈобкарт’ фольклорный фестваль’ нисьты’’ ваераӈга’’, сиддо’ ханда’’ пилибт’ танесеты’’. Ты’’ яля’’ тось нина’’ таняюв’ ӈэдаласьтыд’. Хойхана илена’’ ненэциена «Ханибцё» тован’ маймбасьты’’.
«Ханибцёна» сянакода’’, хыно’’-та’’ нина’’ - Федосья Семеновна Кауц, Анастасия Аристарховна Помылева, Ксения Филипповна Явтысая, Александра Вильевна Выучейская, Людмила Алексеевна Булыгина, Мария Игоревна Кушнир, Людмила Алексеевна Вонгуева, Федора Николаевна Вылка.
Ты’’ сие ниць’ ирийна тетимдей яляхана «Ханибцёхона» сянакода’’ ӈока ихид’ миндя’’ вади’’ намдаць. Округна администрация’ ӈэрм’ тенз’’ ненэцие’’ серу’’ тасламбада управленияхад’ вадам’ Ю.А. Хатанзейский, А.В. Дитятев хэтӈаханзь. Пыди’мядонзэйӈэ’ хусувэй нен’ ӈамдэд’ тэврахаӈанзь, благодарность’ падарм’ таӈаханзь. Тикахад’ «Ясавэй» асоциацияхадана вадам’ вице-президентӈэ’ тарана Ю.А. Ледкова лаханась, Совет старейшин’ вадам’ Л.В.Лаптандер тэврадась. Ненэцие’’ культурам’ тю’’у минрева е’’эмня, культурава лэтбава е’’эмня хусувэй не ассоциацияхад’ ӈод благодарностьм’ ня’’амась. Маркы администрацияхад’ вадам’ С.К.Никулин хэтась, мядонзэйӈэ’ ӈамдэдм’ тэвравысь.
Яля’ пэвсюмбы ямбан ӈобкана ма’’лавы хибяри’’ ненэцие’’ вадана, культурана нерня мима’’ е’’эмня ӈокавна лаханаць. Тасалкурць, тад’ нерня серуна ханзер’ минреӈгуна’’. Тарця сер’ хусувэй хибярихид’ пере, хусувэва харта вадавнанда лаханабнанда, хибяховам’ хэвхананда тохолабнанда тикахана вадава илеӈгу, культурава ӈод’ тю’’ури минда.
