Хусувэй по’ ты’’ ниць ириян тэвась тоходанна’’ ӈацекына тохолкова серудо’ ёльцебасьты. Нюдярка ӈацекы’’ ныланавась тарпсетыд’, ӈаркарка ӈацекы’’ экзамендо’ мипва ёльць’ мэцьты’’.

Тюку по’ ӈод ёнар’’ мян ӈацекы’’ округмана школахана тохолковамдо’ ёльцемби’’. Тюку ирийна сидя ю’’ няхарамдэй толыркана округна хусувэй ӈэсыхы’’, маркы школахана тохолковамдо’ ёльцембада ӈацекы’’ е’’эмня пудана сеӈгадо’ ваерась. Ӈацекы’’ школа’ илӈгана пудана ялудо’ мэ’’ӈа’’, нерняна сиддо’ ӈарка ил’ ӈате’’.

Теда ханярина хасуюдимдей, ӈобяӈганя классм’ ёльцембада’’ ӈацекы’’ экзамендо’ мипась лапцейдаць. Нюртейдо’ маля падбидось. Ӈацекы’’ тэтнава’’ ялудо’ мэ’’ӈа’’. Тикахад’ ханярина выпускнойдо’ ваераӈгу. Та’ ёльцяӈгана нерня тохолковамдо’ таслабгу’’. Школам’ ёльцевына нерня тоходанвамдо’ ӈани маркана мэтадо, хибяхова харвабнанда Няръяна маркана хаюда. Сян по’’ ваерась, тюку по’ школамдо’ хаебада ӈацекына харвабнанда манзаравась харто’ яхандо’ тута’’. Пыдо’ нерня илевнда, пыдо’ харто’ со’’яма ямдо’ сахарамбада.

Тюку яля’ няндо мададм’: ӈацекые’’, нерняна сидда ӈарка ил’ ӈате, сибиць ни’’ ӈэӈгу, хусувэй серуда харта таслабгуда. Ненэця’’ ӈацекы’’, харта вадамда тохолабида’’, хари’’ тенз’ ненэциета культурам’ теневада’’, паӈгуда’’ тенесь иламда нерня минрера’’. Ява нерняӈы похо’’на хурка ӈэӈгу, хибя’’ тюкохона манзараӈгу’’ – мал’’ няданда’’ переӈгу. Сава ихиня хусувэй ялям’ ядабтабида, сензда ӈада’’, маймбась иледа’’. Сава сёнзя!