Маня’’ округханана маля самляӈг’яӈганя по’’ ямбан «Суюкоцям’» нюбета литературно-творческой объединение манзаямда минреда. Тикахана ма’’лёда’’ ӈацекы’’ паднава серм’ хорпи’’. Тарця сава сер’’ юкад’ вата по’’ тяхана паднана няхаюна Прокопий Андреевич Явтысый, Алексей Ильич Пичков нэвэдись.
Пыди’ нянэй паднана ненэцяӈгахась, хусувэянди’ падвэда тянё ванься ӈа. Пыди’ падвы манзаямнанди’ тюку яля ӈацекы’’ тоходана’’.
Тюку по’ «Суюкоцяӈгана» паднана’’ ӈацекына харто’ группандо’ со’’яма ялям’ ненэцие школа-интернатхана мэ’’ӈадонзь. Таня паднана’’ ӈацекы’’, пыдо’ сиддо’ нерня пэртя’’ хибяри’’ ма’’лэйдаць. Тарця яляхана ӈацекы’’ харто’ падвыдо’ толамбиць, нито’ падвы’’ ваде’’ӈаць. Ханяӈы падвы’’ стих’’ сёӈэ’ ханавы’’. «Илебц» театрхана сянакода некоця интернатан’ товыць. Фаина Ледкова, Валентина Тайбарей, Серафима Дуркина, Лукерья Валей ӈацекы’’ падвы’’ сёӈэ’ мэйдонзь.
«Суюкоця» манзарава округна этнокультурный центрхад’ миӈа. Самляӈг’ яӈганя по’’ ямбан ӈацекы’’ падвыдо’ тянё ни’’ӈа’’. Ханяӈы, самляӈг’ яӈганя по’’ тяхана паднавы’’ ӈацекы’’ маля ӈарка хибяри’’. Тюку ялян’ лаханась «Субкоця» манзаям’ нерня Лукерья Александровна Валей минреда. Тикы не харта паднана, тарця сер’ савовна теневада, хамандабида. Хусувэй таранан’ паднавам’ хорпада ӈацекы’’ тохоламби. Самляӈг’ яӈганя по’’ ямбан ӈацекы’’ падвы’’ ӈобт’ ма’’лавы’’. Ӈокханда сертавэдо’- хасую’’ альманах «Молодые голоса тундры», тикахад’ луца’’ вадавна хэтась «авторские сборники» – тарця сертавыдо’ таня. Таняна ӈод’ ӈацекы’’ падвы’’ яӈга ма’’лавы’’. Лукерья Валей мась:- Таӈок по’’ ямбан паднана’’ ӈацекына ӈадимдана, ханяӈы манзаидо’ саць сава ӈэсьты. Тарем’ Валерий Селиверстов сэвхана маниесь ӈарума, пыда падвэмнанда книжкацям’ «Планета мыслей» сертаваць. Тикахад’ Матвей Большаков савовна падна, Тамна ӈопой паднанам’ манием’ – Сергей Тайбарей. Паднана’’ ӈацекына округна ӈэсыхына таня. Краснойхана паднаван’ харванина ӈокаць, пыдо’ нянэюв’ нянэювна Екатерина Петровна Тайбарей манзарась. Тикахад’ Индигахана паднана’’ ӈацекы’’ таня, пыдо’ ненэця’’, луца’’ вадавна падна’’. Нядаӈгодадо’ тохолкода Татьяна Юрьевна Давыдова. Хорейверкана сян’ не’’ ӈацекы’’ падна’’.»
Паднава сер’эртя’’ ӈацекына «Суюкоцяндо» со’’яма ялям’ сава ихиня ядабтадось. Сё’’ мэӈаць, падвыдо’ толамбиць, мядонзэй ня’’амаць, сава вади’’ намдаць. Тикахад’ школандо’ музейхана нядаӈгода нито’ няюв сяйӈаць.
