Хусувэй по’ нара няна май’ ирий пудана толыркана этнокультурной’ центр ненэцие» отдел манзарана» маркана иленя ненэця» нидо’ ма»ласьтыдо’. «Супер-герой стойбище» нюбета мероприятием’ выӈгана сертасеты».

Тикы яля хув’ нумда саць сава нись ӈа. Пи’ санрэй ха»морӈась, хань ӈэвысь. Тецись. Ю» сас’ няна этнокультурной центр харад’ хэван хибяри» ма»лаӈга пядось. Нидо’ ядабтамба маймба няхато тороварӈаць. Тецьбатаӈо» ӈацекыто, хаданато’ ня’, ханяӈы» мал’ мядтерсавэй ебц’савэй тоць. Автобусва» панӈась, ханяӈы нина» мимана сер» нултавахана мэсьтына. Едэй сертавы туристической центран’тэвынаць. Ӈани’ нина» нюртей автобусхана товыць. По’ ямбан ханяӈы нина» нинаць манэс», тороваркая, нина» севолцетына». Сырӈам’ сидя мя» трубахад якэ миӈась. Тандая» товы хибяри» мят тюць». Мядм’ пэртя Ксения Филипповна Явтысой хибяри ӈатевыдась. Мяд сид»няна толда тётыць, ӈавар»хана панӈаць. Ханзер» выӈгана ӈэсьты нерня’ товы’ хибяри сяйлабтэйдась. Мась: «Пуна ӈани’ сянако ёльцеванда пуд» евэйм ӈавортада».» Сидя мякана пирензё нядаӈгодида мале’ евэйм’ пиребиць. Сидя ӈацьмбой нехэ’ ненэцие» культурам’ минренаха’ Александра Павловна няби Людмила Игорьевна сянакома ява» хамадаӈаханзь. Мал’ хибяри» ӈацекыто’ ня’ хэвхандо’ тоць. Нерня’ Людмила хибярихи» тарця вади’ хэтась: «Супер-герои стойбища» ма»лавахана сидда» маймба маниева». Тюку яля манэтава» хурка команда мереӈа, ныхы»ӈа, ненэця’ вадам’ ӈокавна тенева. Сидя командам’ яӈгрець. Хусувэхэна сидндет хибярись. Ӈарктидо’ таняць, капитандо’ нювм’ хэтаць. Галина Петровна Лаптандер команда нюмда «Мерця». «Мерця’ тарев нерня’ пу»ларёхова» – пыдо’ тарем’ тёрейдаць. Няби ӈани’ «Сэр» хохорэй». Капитандо’ – Инна Прокопьевна.Ванюта. «Хохорэй’ дарев тиртава»» – пыдо’ маць. Сянако пядонзь. Нерня’ ӈопой ӈэхэна санарць пирдырӈаць. Тикы’хавна сюрба тобат’ няхат ненэця вадам’ хэтбат тара. Мерця» команда мерець санарӈась. Пуна ламбяха»на сидлад сюрберӈаць. Мерця» ӈани’ нердець. Тикахад мячм’ клюшкахана на»волпа сюрберӈаць. Тикы пуд» мядм’ мяра тарась. Ӈамгэ мальсей нером’ хоӈгун, тикы ӈу» ӈэӈгу». Мал’ сянакода» ӈа», ӈу» пюрӈа». Сянакода» ивъер» сянакуць. Мядекодо’ сававна мярыдонзь. Тамна ӈынхана муӈгм’ ӈэдарамбиць. Хуюм’ муӈгда ӈаха» ханта тикы нерде. Мерця» – муӈгдо’ ӈаха» хаясь. Пыдо’ нердець. Пуданаха»на сидя ӈарктаха’ пирдырӈаханзь. Пыди’ нямдм’ яркбихинзь. Тамна ӈани’ пирдырма пэрӈаханзь. Мерця команда няхаданда сидя толыркад ва»ӈась. Хусувэй сянаковы мядонзэйм’, медальм’ ня»мась. Сянако ёльцемахад мал’ евэйм’ ӈаворманзь мят тюць. Мякана лаханорӈаваць, хобцоко хэтмбиваць, хыно»ӈаваць. Нясъмба няха»на лаханаваць, хибя хурка выӈгад ӈа. Тарем’ ӈобт’ ма»лаӈга тара. Нина» манэтава», няха»на торумдава». Ӈацекэхэ’ сырпа»ан пыдо’ ӈани’ ӈобкана мэсьты». Няхато’ нювдо’ хэтсеты». Нидо’ теневаӈгу», ӈоб» нерня ‘ нясъюмба пыдо’ ңарамдаӈгу».

Ӈэдалава нерцюна мядонзэйм’, ӈарка вадам’ Ксения Явтысоян’ хэтаваць. «Ӈоб’ нерня мядоманзь няна» турӈада»! – мядм’ пэртя мась.

«Илебц» театрм’ минрена Серафима Дуркина падвы