Яханана нянэй ненэця’’ поӈгана харто’ вадамдо’ мэта хибярина тянёмдана’’. Ӈарка хибярина валакада сававна тамна лахана’’. Тарем’ ӈэбнанда юд’ мян по’’ ваерась вадава ӈовсю’’ сусаӈгу. Толанзёбнанд’ вадамд’ ӈани’ намдуртар’, тохолаӈгур’. Толанзюда’’.
Ёнэй Парнэко не ӈани’ нюм’ хо. Нюнда ӈамзи пирейда. Тёняӈы нида ӈани’ хонрэйда. Парнэко’’ не’’, ненэй несавэй мал’ то’’. Ӈарка ед’ мюня нюнда ӈэвакэця тэри мулкадарӈа.
Ямб хыдян’ ӈамзакуда тедыда. Ӈаворць пэяд’’. Ӈарка ненэй нер нита сэв’’ хыӈгохана ӈамзи ютекэци идэнда понд’ мэсетыда. Парнэко’ няхабида ненэй я’’авла ӈаворӈа’’. Едандо’ терам’ и’’евэйсавэй ӈамадо’. Ӈарка ненэй нер ма’’нив’: - Малейв’’. Мякани хантадм’.
Ӈани’ ся’’ны ӈэбта ӈод’’ нюдя Парнэко не нюм’ ӈани’ нив’ ху’’. Ӈарка няхаюта сер нюнда ӈамзаком’ ӈани’ пиреда. Ӈани’ няндо’ мят’ мяди’’мярманзь мал’ хая’’. Ненэй нер пэрта ӈамзида ӈани’ идэнда понд’ нидав’ сюрпю’’. Тарем’ ма’’ламбадаханда ӈамзида ед’ терӈэ хая’’. Ненэй нер мяканда хая. Пыда ӈод’’ нита сер’ ӈани’ ӈацекэда соя. Макода’ сивня еся ебц ӈурна ха’’морцеты, пуна ӈани’ макода сивня ӈурна хэсеты. Неры ма’’лавы ӈацекыта ӈамзи Ӈарка ненэй нер едан’ пядыда. Евэймда пиреда. Тёняӈы нида хонра, манзь тёрей’’: - Тёня’ мякани мядоманзь тода’’. Няндо’ мунм’ намдахава, парнэко’ нехэв’’ таминхандо’ то’’. Мятю’’. Пыя’’ядо’ пай’ нэкалъядо’, ма’’ ни’’им’: - Пэ, пэ, нюйвонда. Нер маси’’: - Ханёв. Нисянодо’ ӈопой’’, нябанодо’ ӈопой’’. Ӈаворць пэяд’’. Ӈани’ ма’’ ни’’ним’: - Пэ,пэ, нюйвонда. Ненэй нер ӈани’ маси’’:- Ханя’’. Нисякодо’ ӈопой’’, небякодо’ ӈопой’’. Ӈаворць малесь парнэко’’ не’’ мякто’ хая’’. Ся’’ны’ ӈэбто’ ӈо’’ хане хан’’мы’’ хаби’’ то’’. Ӈарка ненэй ненд ебцада макода’ сивня ӈани’ ха’’амы’’. Нюмдя ня’’мада. Хаби’’ тохова ненэй нер ӈацекэмда ня’’амба хасев’ нерад яда. Парнэко’’ не’’ ӈоб’’ яда посова салик ланзяӈа’’. Вэсакуто’ нерняд посова салик ня’’амба яда’’. Нюсавэй нямдо’ манэкава ма’’ним’: - Няна’’ нюдя танявынё’’. Мале тосахава тосаваць: ӈамоӈгадана’’ нюмда сюрпавэданё’’. Хасава’’ манзь ханадо’: - Тюку не’’ са’’ла’’ ӈэвы’’. Парадавы’’ ӈэя’’, харто’ нюдо’ ӈамы’’. Не’’ нивы’’ ӈа’’, ӈылека’’ ӈэвы’’. Хасава’’ тодабцям’ пята’. Тикы парнэкудо’ тун’ моё’’ядо’. Парнэко’’ паравандо’ нерня ма’’ним’: - Сибякохортанов’’ я’ тиӈгэвнов, неняӈгацинов’ я’ тиӈгэвнов!
Ӈарка ненэй нер ӈарка хаби хасавамда няць неры няхаютаха’’ ман’ хая. Нюдя нянда ха’’ман’ тэвыд’’. Ямд ямб мядикодо’ тамна палавы. Мята мю’ сырӈаха’, нюдя ненэй нер мята мюня тамна сэдоравы. Нямдо’ содадо’. Ӈобт’ ялъяд’’. Ёнэй не няхандо’ хая’’. Ӈани’ ӈоб’’ ямд ямб мядиком’ хо’’. Мята мюня нядо’ ӈани’ сэдоравы. Нямдо’ ӈани’ тарпрадо’. Мякандо’ ӈани’ хая’’. Неры мякато’ тэвыд. Тет хабинд нюдяха’ сидя ненэй нем’ неданди’ мэӈахаюди’. Пили’’ нюдяридо’ неси’’ хаи. Тадахава та’ илелъяд’.
Лаханакони малда.
