Россия яханана хуркари’’ тенз’ мэта хибяри’’ иле’’. Хусувэй тенз’ мэта’’ харто’ илесь ядо’, харто’ вададо’, харто’ культурадо’. Хуркари’’ тенз’ ненэця’’ паднанидо’ таня’’. Россиянана финно-угорский тензхад’ перена’’ паднана’’ харто’ ассоциациямдо’ сидя ёнар’’ няхарамдэй похона ӈадимдедонзь, тамальӈгана нюртей ма’’люрӈаць.

Паднава’ серм’ минрена’’ ервамдо’ тэраць, тикахад’ Советхана манзаравндидо’ нюмдець. Тарця ассоциация’ маля ӈоб’ яӈганя по’’ ямбан манзаямда минреда. Таӈок по’’ ямбан финно-угорский журналист’’ ( паднана’’) ассоциация’ нермпэртяӈэ’ Александр Абдулов манзарась. Тикы’ хасава Йошкар-Ола маркана «Марий Эл» нюбета газета редакторӈэ’ тара, пыдо’ газетадо’ марийской вадавна ӈадиберӈа. Газетахана манзаранидо’ малӈэ’ харто’ вадавнандо’ лахана’’, харто’ вадавнандо’ падна’’. Нерняна товнда похона газетандо’ юр’’ пода’ пангу. Тарця яляхато’ маля хамяку’’.

Финно-угорский тензхад’ перена’’ паднана’’ ӈарка ма’’лёямдо’ мэ’’манзь тюку’ мэвахана Марий Эл республика еркы маркана ма’’люрӈаць. Газетахана манзарана’’ хибяри’’ Йошкар-Ола маркана сидя яля’’ ямбан манзараць, ӈока тарана серу’’ ӈобкана таслаць. Финно-угорский тензхад’ перена’’ ханярина иленаӈэ’ яханандо’ хари’’ вадавнандо’ газетыдо’ ӈадимберӈа’’, журнал’ сертамби’’, ӈацекыто’ е’’эмня хамандабада журналкоцидо’ таня’’. Мордовия, Ӈысма’’, Татарстан,Чувашия, Карелия, Пермский крайхад’ товы’’ журналист’’, полиграфия’ серм’ тасламбада’’ хибяри’’ харто’ яханандо’ сертамбада’’ манзаидо’ тюку мэвахана Йошкар-Ола март’ тэврэйдонзь. Марий Эл республика’ тет’’яӈганя районда, ханярина харто’ тенз’ мэта’’ хибяридо’ иле’’. Хусувэй район’ харта газетада таня, хуний марийской вадавна тарпурӈа. Марий Эл республикахана илена’’ хибяри’’ харто’ вадамдо’, культурамдо’ теневана’’, ханярина хари’’ вадавнандо’ лаханакурӈа’’. Тюку ирий’ сидя ю’’ нюртей яляхана Йошкар-Ола маркана илена’’, мядондидо’ хусувэй по’ мэта’’ хэбидя ялян’ ӈани’’ ма’’лыць. Луца’’ вадавна ӈарка яляндо’ нюм’ – «Праздник цветов». Тикы яляхана яхана манзарана’’ хибяри’’ тикы нерцюна сертавы манзаяхататто’ ныланава’’ ялядо’. Тарця яляндо’ история’ маля ӈахы’’, ёнар’’ хасуюёнар’’ сидя юдимдей поход’ мэта’’ ялядо’. Республикандо’ еркы маркана хусувэй районхад’ мядонда’’ тоць, хусувэйдо’ харто’ ембдяродо’ мэ’’ӈаць, хусувэй яхад’ харто’ ӈаврадо’ тэвравыць. Конкурсхана мэбетидо’ тэрабиць. Ханярид’ товы’’ хибяри’’ яля’ ямбан тараць, сё’’ мэ’’ӈаць, харто’ манзаидо’ няхато’ манэ’’лабтабиць. Нидо’ манэць, маймбиць.

Яндато’ товы’’ журналист’’ ӈод тарця яляхана манзараць. «Марий Эл» нюбета газета манзарана’’ тарця ялян’ харто’ стендамдо’ хамандаць. Газетамдо’ тэвраць, тикахад’ хусувэй манзаранадо’ харто’ тенз’ пиревы’’, ябцавы’’ ӈаврадо’ тэвравыць.

Тюку’ мэвахана финно-угорской пресса’ ӈарка ма’’лёй няхар’’ яля’’ ямбан манзарась. Финно-угорский тенз’ ненэцие’’ вадам’ мэта газетахана манзарана’’ конкурсхана нердевы’’ нидо’ нюмдець. Хусувэй манзаи’’ тэвравы газета диплом’ ня’’амась. Паднана’’ хибяри’’ няхар’’ яля’’ ямбан манзара’’мидо’ резолюциян’ падыдось, хуний тю’’уна ӈамдюда’’ ервха’ тэвравы’’ ӈэӈгу’’. Маттамдэй Всероссийской финно-угорской пресса форумхана яндат’ товы’’ паднава’’ серм’ минрена’’ хибяри’’ Россия’ яна’ финно-угорской журналист’’ ассоциация президентӈэ’ несэй хибярим’ тэраць. А.С.Абдулов ӈоб’яӈганя по’’ ямбан манзаравы манзаямда хаеда.