Нисяв – Нямд Пай’ ню. Небяв не Тавысе’’э. Маньзяван мякана мэб’’на’’ Ирин пулы’’ ниня ӈамдесетым’. Ирин пихина мэб’’ ирин хан пыям’ яркокуцетым’. Нямд Пай вэсако’ ӈокахада сидя ю’’ мята.

Нисяв Нямд Пай’ ню ӈэвамда еделӈа. Ӈани ялям’ мэ’’ӈа, ӈани’ тасику’’. Си’’ив яля’ ӈэсоӈгана нисяв ха. Сидя ю’’ хабида тиндамда серта’’. Ӈэтана паря’ ни’ тинамда тёръялтадо’. Ирив, хадав ярцетыхы’. Мань манзетым’:- Мань тикаркахана мэдаманю’’, ӈамгэ ярӈади’’? Сянд’ илеб’’на’’ нисян ха’’махад пон’ илесава’’, хэв’ илесава’’ вунив тене’’. Небяв мюдда пуйдалтавы. Си’’ми’ ной пис’ мю’ ӈабта. Ирив ма’’нив’: – Нена’’ нюдяен. Самбляӈгри пор.

Тарем’ сырпа’’ни, ирив тет нямд пай тым’ сяра. Небян сямян нерний хурюда маханяӈы хэван’ сярыда, ма’’нив’: – Тет нямд пайм’ нюн ню мээйдамда. Ирив сидя пайдэн’ си’’ми нюцярӈа. Небяв тет сэраконда иням’ лабиде. Ханя’ ӈэбта ӈод’’ сензита марнари’’ миӈа’’. Ся’’ны ӈэбта хонё’’махадан немав хая. Ӈарка’ хой ниня няхар’’ ю’’ мя’’. Небяв ма’’нив’: -Няхар’’ Тавысе’’э иринат мяд’’ ӈадимя’’. Ӈадяда мят’ ӈамгэ пон’ мимнани’. Небяв мядо’ сямян пуня’ мята мярада. Ӈопой пи’ сеӈгани’. Таддикахад нита мят хэсеты, пон’ яӈгосеты. Ӈаваран ханюй’’ ӈэсеты’’. Ханюй ӈамзако нирӈыбасетыдм’. Небян не няда танявы, ӈацекэхэт тарси’’ хэвы, пирибти’’ ёльцянд нивы’’тэв’’.

Си’’ивахана ӈопой’ хуна ӈаворадав пиресеты. Ва’’авханан небян хорецяхана си’’ми’ юйцеты. Мер’ хэсеты. Сыра’ ямбан’ тарем’ илем’. Ханьтасетым’. Ся’’ны ӈэбта ӈо’’ пивна ядэрӈам’. Тад ӈэдалёда’’ ӈокавна товы’’. Мядо сюртевы’’. Хано’’ помна ядэрӈам’. Ӈарка Тавысе’’э мят’ тюм’. Мя’’ пан’ сисавэй’ пана’’ӈа’, хибяри’’ ӈамды’’. Ӈадябата небян пано ӈамдалць хасава ӈамдавы’. Малцана тэта’’ ню ӈэӈгоданакы. Хэвахананда хасава ӈамды. Марцеда си’’ив нум талыби’’. Ӈарка’’я хасава ма’’нив’: -Нем пэрӈан, нюда таня. Нямд Пай вэсаконд нюнда ню. Малцана тэта’’ ню сидя пенда ни’ сабця, ма’’нив’:- Тикыехэр ӈаркав’. Сабць’ посёкодрев’ хабтаӈгув!

Тарця вадаха’’на пин’ сакададм’. Ӈани’ мякан хаям’. Ханюй ӈамзи’’мана нирнорӈам’. Ханюй ӈамзи ӈамзь теци ханимядм’. Небян хореця’ мю’ ходеръяв’’. Нумда пэвсюмя. Небян хореця’ мю хонаравэв’’. Ӈамгэ’ пирка’’на небян ня неяков, си’’ми сиде’’нив’. Пий’’ ӈэвы’’. Едм’ пиревы, ма’’нив’: -Ӈавор’’, епдя евэйком’ ӈамдан.

Си’’ми авламбванда сер’ лахана, ма’’нив’: -Хэванд нерня сит емббтам’. Теда’ сит ӈэдараӈгум’, сэва’’н хэвняна ха’’мар ӈэя. Тэхэ’’нат сит ӈэдараӈгудм’.

Си’’ми емба’’ӈа, ӈэдараванда хэвахана тюхудан си’’ми валӈа, пин’ тарпара. Тет нямд пай’ нё’ хэвахана сяравы’’. Хан’ни си’’ми тебте, ма’’нив: -Хананд мюня ӈаварад таня’’. Сянд’- хунат’ перебато’ ӈод’’ переӈгу’’. Тикахад ӈавардамд ӈаворцун.

Ёнэвнан хуркохона си’’ми талвэда. Няхарм’ ӈэсоӈота тюр’ нярхалада. –Ханяхав’ тет нямд пай сит тэвраӈгу’’. Тэри тарця хибяри’ ӈудондава’ нид сит ня’’амараӈгу’’.

Тет нямд пай’ иням’ пи’’нда, ма’’нив’: – Ервара’’ сэва’’н хэвня’ ханара’’!

Малда тамна ни’’ӈа’’.