Хаювы’’ яля’’ мальӈгана хэвхы округханана мел’’ ненэця’’ ӈарка ма’’лёва’’ сер’ ваерась. Яндахат’ товы’’ ӈудидо’ мэта’’ хибяри’’ харто’ манзаидо’ манэ’’лабтаванзь ӈэрм’ яхана ма’’лэйдаць. «Душа Севера» этнофестиваль’ хэвхы округханана илена’’ нина’’ ӈока по’’ ямбан ӈатедонзь. Маня’’ округхадана таняюв’ Маргарита Васильевна Латышева ӈэдалёрӈась. Тикы мел’’ некоцява этнокультурный центрхана манзара.
Латышева: - Ханзер’’ мань таня еримямась? Этнокультурной центрава’ Саляхардахана танеда «Дом ремесел» харадхана манзарана’’ нина’’ няюв ӈобкана манзаям’ минрева’’, ненэцие культурам’ нерняку минрева, харна культурава лэтбива’’. Пыдо’ манзаранидо’ маня’’ округханана тэворӈаць. Тарем’ мамб’’ сава’’: пыдо’ сава нина’’. Мал тарця манзаям’ хамадабива’’, ненэцие’’ культурам’ лэтбава е’’эмня ӈобкана манзарава’’. Тарця нин’’ тюкумэвахана сюв’ таня хаӈаць. Мань’ ӈарка маймбабцавэй таня хаямась. Тарця сомбой фестивалян’ еримян’.
Корр: Таняхад’ ӈод мел’’ ненэциедо’ тюкон’ турӈаць, хибя’’ турца?
- Тюкон’ сидямэвна турӈась Салиндер Лариса Николаевна, пыда «Дом ремесел» мякана манзарана не. Пыда Тазовский выӈгы я’тер, Ямал няна тарця выӈгы таня. Пыда тюкохона мастер-класс сертабись, манэ’’лабтадась: ханзер я’мал ватовна сэдорась тара. Тикахад’ маня’’ тикы мел’’ нем’, маня’’ сава нява’’ Ома ӈэсын’ ӈэдарабиваць. Пыда таня тэворӈась, Омахана илена’’ не’’ сэдорась’ тохолабись. Тамна таняд’ Сергей Сотруев турӈась, хаби хасава, пыда лэвна’’ манзарана хасава. Няръяна маркана сян’’ яля’’ манзарась, ӈацембой хибяри’’ тохолабись: ханзер’’ лэхэ’’на’’ манзарась . Тикы ӈарка мел’’ хасава, сертавы ӈамгарида ёльце мэкад. Пыда Россияна Президент е’’эмня ӈарка мядонзэй’ сёхова сертавысь, ӈарка лэхэд’ сидяӈг мадавысь. Тарця сотрудничеством’ мэць тюкумэвахана мань’ таня еримям’, сюв’ таня нин’’ хаӈаць. Таняна ёльце ӈарка хэбидя ялясь. Ӈока хибяри’’ ма’’лыць, маркана илена хибяри’’ турӈаць, хуркари яхад’ товы’’ хибяри’’ таняць. Мань’ Канин’ яхана сэдбада сави’’ ханамась. Нянандо’ ёльце мэкадархась, юндарцеты. Ханяӈы тарця сави’’ нюртеймэвна манэ’’мы’’, ембдяр’’. Тикахад’ маня’’вадава яӈга. Нянандо’ мэкад нив’ӈа’’. Тамна таняна ӈока теневана’’ нина’’ ядтамась, пыдо’ сёхова Няръяна март’ турӈаць. Татьяна Лар хыноцеты, Елена Уфимцева, пыдо сава теневанин’, Лариса Николаевна Салиндер. Мастер-класс сертамась, манэ’’лабтабивась: ханзер’’ Канин савам’ сэдась тара. Мань мамась: нерня ӈацекы савам’ сэдбась тоходаӈгува’’. Нядуй’ савам’ манэ’’лабтамась ханзер сэдбада. Хартабэй савав’ танесь. Ханзер тарця сава сэдбада? Манэ’’лабтавась. Пыдо’ нянандо’ мэкадархась, ӈокавна юндарӈаць. Канин’ Саля нямна ӈока ӈамгэм’ няндо’ ваде’’ӈамась. Савина’’ хурка ӈэсьты. Савина’’ ӈока ӈа’’ним, хуркари’ савина’’. Пыдо’ выӈгана илена’’ ненэця’’, валакада ӈопой савадо. Луца’’ вадавна манзь –капор – вадак’’. Вадак’’ ӈобтарем’ мэкад’, паской сава. Пыдо’ яханандо’ маня’’яна пирувна тамна тецярка. Нянандо’ вадак сава серо’’ӈа’’.
Корр: Ихит’ сямянд мэёвна еримы сер’ хурка ӈэдарха’? Ненэцие манэ’’ӈан’, пыдо няюв лахананась, вадамдо’ ханзер’’ нерня мэ’’ӈадо’, лахана’’?
- Саляхардахана мал’’ ненэця’’ нянэй вадам’ тенева’’, ихинян пили’’ савась. Нюдяко ӈацекэця’’ небяндо’ хэвхана харто’ вадавнандо’ лаханасьты’’, харто’ ембдяродо’ мэ’’ӈа’’. Тикахад’ пирибтяко мандалӈэ’ нусь, ӈамгэковам’ манэ’’сарць, тасалкось харто’ поӈгнандо’ ненэця’’ вадавна лаханасьты’’.
Тарця ӈарка маркана илена’’ ненэця’’ хэбидя ялян’ турӈаць. Яндахат’ товы’’ хибярихи’’ маймбиць, хонаркуць манзаина’’ нямна. Сава, ӈарка сер’ Ямалкана ваерась, ихиня’ сомбой, нянана’’ тарана манзаина е’’эмня. Нерня ӈод’ тарця ма’’лёваха’ тэворпана сава ӈэ’’ нив.
Корр: Таняна сит’ манэ’’ӈа, сертабада манзаид’ мэкад’, нерняна ӈод’ тарця фестивалька’ тэвормид’ таняя’’. Хусувэй сертабада серл’ саваривна миӈая, сензан’ ӈа, маймбась манзара. Пыдар’ тарана манзаямд’ ӈоб нерня маймбась минред.
