Паднана’’ нина’’ яханана сацьри ӈока’’ ни’’ӈа’’, ханяӈына ненэця’’ вадавна падна’’. Хари’’ вадавнанда тохолкода Матрена Ивановна Талеева падна. «Таты» -тарем’ нюмдевы пьесада таня. Сян пелямда маля газетахана толараць. Тюку яля’ тамна ӈопой пелямда толада.

Пале: Мань тикы ваторамаси’’ нелеӈгодвакэв’’. Вы’ яхана нем’ мэва’ мер’’ вуни ӈа’’, хусувэй ненд’ мирта’ миць тара. Тамна юн ӈо’’ мер’’ хэсьты’’, вэваку юн – мэвнда пирибтяв’ марлабтав’’, писядетна’’ ӈокаць. Хибя нян не’ нюмда ватортаса’’? Тынев – ӈацекы’’ын’ небя, ӈока по’’ иле илени’, вэвако вадам’ няданда намдвэв’’ яӈгу, нев’ хаевндав ни ӈа’’. Пыда Салямда хусувэй серкана табадабӈгуда. Мал’’ ӈобкана илеӈгува’’. Тараӈгу няби мядм’ мярӈгува’’. Хаврява’’ ӈо’’ нелева’ ӈарӈэ хая, тикым’ вунив’ юр’’, Хавря’ немда харта мяканда табта тара. Невхы ватова’’ тарця. Тыне, тарем?

Тыне: Хасава, илевав’ няданд’ пере, не выӈгана, нюта таняб’’ ӈо’’, ты’ пэртяси’’ иле я’’амгу. Салян’ иле’ падарта тарця ӈэдакы, мань не’ нюв сяӈав’’, пыда ябдабта тара. Пале, вадид’’ сейхад миӈа’’. Валакада небёв, теда’ нянани’ тобат’’ тара. Сит Саляр саць сахарамби, нянд’ намдӈгу. Писядетна’’ хибяри’’ вади ла’’амдаӈгун, ӈацекын’ нисяси’ вадёданбато’ нив’’ вэва ӈа’’. Вадав’ тарця!

Луке’ пухуця: Не нюв, ир’ лата, сеяр’ лимбяка, мань нянанди’ тутадм’, тарця серкна нядаӈгодадм’. Июв’ ӈацекэця’’ ӈока’ ӈэван маймби – тикы’ саць сава. Илевара’’ нерня’ сававна минда – тикы мань ӈо’’ ябув’! Мика, тына’’ мят’ татнакыд’’, пэвсюмы’ няна, япдакохона ӈэдалаӈгуна’’. Нибтя сеӈггуди’, ханзер’’ савада?

Пале: Ибкава’’ сеӈгаб’’ вэвада яӈгу. Валакада мякнани’ хаюртини’ тэри’’ тарцяри’’. Колхозник’’ мяд’’ хахаи’’, тыдо’ маня’’ тэхэ’’на’’ нибто’ вов’’, тякахава ненэй мая’’ ӈэӈгу.

Мика: Нензя тарцёв’’, ты’’ вомб’’ саць вэва, ӈока тым’ сян яля яркба тараӈгу, тад’’ идембата, ты’’ паде пяӈгудо’, ӈацекы’’ ты мадартыдо’’? Хантадм’ ты мят’ татын’’, Пале, мядонзэйданд’ хан’ ты татадм’.

Пале: Сит нядаӈгудм’, сидя ханхана хэхэни’, невхэна ӈобкана тэхэ’’на мэсьтыни’, ӈока хабэвком’ ӈамдланись. Тикым’ пилибт’’ тенев’’.

Маттамдэй пеляда

Хасаваха пин тарпыхы’. Вэн’’ мадлыд’’. Пыди’ тэхэ ӈэдалэйха’. Не’’ мякана мэ’’.

Еване: Тыне, мань няданд’ тянёмбовна нюдяркадм’. Сит хамадамбидм’, нюни’’ ябдава, нюни’ нися’ хэвханани’ илева, тикы е’’эмня’ сёнзя’ мюй моренавам’ ла’’амдава пир’’. Хибяри’’ лахарё’’, сырадарев юӈгу’’, иӈудота’’ хибяри’’ хумбанзи’’ ни лахарют’’. Сыв’ сэрпаным’ сэдаманзь, нянд’ мядонзэйӈэ татав’’, няни’ тэввами’ нянан’ майбцо, ӈарка мя’’ал – харт мя’’ал, тыд’ харт – тыд’’.

Тыне: Тарцёв’’, мань сёнзян’ вовормам’ мерцявна ӈэдараӈгув’’. Еване, вадид’’ сава’’, мани’ токую’’ сэримы нени’, илевами’ харни’ минреми’. Теда’ пыдар сём’ ханов’’, хэтувндар пыдар ӈод’’ нив’’ таня.

Еване: Нянди’ небян’ сём’ мэтадм’. Невхэна ӈо пирибця’’, наны’’ сейханандо’ мэненыдо’ танесеты’’. Сэрнем’ ёнэй’ папар ханада, ниди’ ӈана’’ сэвтевыкыди’, ӈадьбянда хуныхы’, теда инзеледи’. ( сём’ мэӈа).