Ю’’ пунонцяхад пиревы яр ӈули’’ ӈамнелы – нямюхуртм’ нялма’’ пир! Тикы ё’’ойда евэямд нисява’’ сямянхат мэнедава, валакада мани’ не нян ня ханёми’ хусувэй ялянд нимня тыхыналтыць: варюд латамдана’’ма, вынд’ тянныд’’ма, пунонцид нимнандо’ тахарана’’ – мерцямд янд латавахана яркаӈгу’’ вунир! Ненэсяхава мани’ Сандран ня’ сабе нининзь хадахалю’’: хабэвко’’омна ӈамдалкованд паӈго тэвотана. Юнуй яляхана хабэвконд ё’’н’ хибяр нида’’ харва’’? Илебэй нероконд тебтетарха ямд хусувэй хибяр сахарамбидава. Хабэвко’’омна ӈамдалковар ӈо’’ – харта и’ вато! Мани’ Сандран ня’ тикыд ялэд сабе ӈатесинима ӈа, нивы ӈатевэр сер’’л хадкэ’’ нив’: едяв теба, мал’ юнуямд, ӈамдалкованд паӈгом’ пэӈан нина ваертэян.

Не няв ӈопориӈэ ӈамдалкусь. Ханяӈэхэ’’на небява’’ сита нядабасетыва.

Серквар тарем’ ӈась. Ялэта ямбха’’ выӈгана мэ’’махаданда пудана мэваха’’на нисява’’ хэ’’ли’ ханесэси’’ салэлы’’. Ханяӈэхэ’’на валакада лат’’ ни’ пыда нибтя няхар’’ хабэвком’, нибтя ӈопойри ябтом’ лабхалцеты. Тикыехэвар маня’’ ӈарка семьяханана’’ ханя тянё ӈа’’. Нисяна’’ сята туселтасеты, тикында нид маня’’ ина’’ ӈод’’ вомзеты’’. Ӈоб’’ вэва’ ӈани’ таранзянда хабэйӈэ пыда лат’’ мал’ ни’ нявакорха, валакада саць париденя ӈамгэхэвам’ хубкадта, ма: – Сэв’’ вэӈголабтавэв. Вэнекоми ня’’мада… Лахацянд’ ят’ сакадта таралй’’.

Сававна манэць тикахананда мань ямб, ябтако ӈэта, ян’ манорпэй тобатана тэкоцям’ тумднархадм’, валакада тикар саць нюдяко, нямдси. Нись манз’’ тензена. Индта ӈо’’ ни мяхана’’.

– Су’’ляко! – тамна сабе нись пунрю’’ мань тёреюв’’.

– Тад ӈо’’, хасавав нюв. Тикар – су’’ляко. Тид’’ манзь, тикар су’’ляко ӈэбэй… Ты’’ нисерӈа’’, – нисяв ма, тикыринда ӈод’’ пыдамда вэӈгорпададарев’’’: – Халям’ пэрць нибтя ябто’’мана хане теда’ мань я’’мадм’: тын лэтмбидма, су’’лякуд маниева’ е’’эмня ӈани’ сэври тара’’ ни’’.

Хурка ӈэсь таравамда мань минханда таслав, тикыми такалпа валакада хэвня’ сылыв’’, сованда пирувна манзь варцедадм’: – Харт ман, сэври тара’’ни’’, маня’’ ӈани’ тюкохона… ярмева: харвабта ӈобтарем’ танянакы’’… сэвна’’!

Вадин нисява’’ нинарыхыда надм’’, неры ӈыхында небяна’’ ня’ лаханаку: – Яр ӈани ӈыера’ я ӈэвы. Пунонцянд яхад ӈо’’ нидм’ харда’’лёд’’.

– Пунонцянд я ӈо’’ таня… нюдяко едкохона пиревы: ханенахаюна’’ самляӈгри тиртяком’ есмэхэ’, – няни’ сылаӈга небява’’ маню.

– Ӈамгэхэд серод тарем’ тыхыната’’? – Сандран ня’ няюни’ сылаӈга пысабэй нисява’’ ма. – Ӈамгэ серод вэва’’, ӈа? Ханенахаюн? – Пуна ӈани’ небяна’’ ня’ лаханолы’’:- Ӈэя ят’, хурка таня, тикы ӈо’’ сава. Пунонцит паӈго хад’ ваеранакы. Сырид юна’’, тиртид варю’’мана тахарана’’. Сер’’ яӈгу: мерривна хабэвкор пёдалты’’. Вынд тавна мале тёрда тэдарӈа.

– Каб’’-каб-бэв’’! Мя’’-мя’’-мя’’! – вадида тэ’’элтамбдадрев’’ мя’’на’’ хэвхана тиртянд тёр хэ’’нараванонда.

– Каб-бэв’’, каб-бэв’’, каб-бэв’’! – няби хабэвкор ӈо’’ тёрей’’ ню’’.

– Лык-хы-ы’’! – нюртеяр хокабтёлы’’.

Тедахава’ мале хабэвкут тёр’’ си’’ми ниць лэӈграмбю’’, сыӈгрёсипой’’ пибин, мальцями серадм’, пин’ нялкарадм’ – ти мале нисян хан’ ниня са’’мертадм’. Нюрте’ мань пинаркаманзь, маӈадамзь, си’’ми питартанакы, валакада тобэй нисяв си’’ми манэкарт’’ нинараха: хан’ ӈэхэд мэтаиням’ ека, тикында пуй вэсм’ ӈудаханда пэбтада, хурка мунзипой’’ тюрамда ила, иням’ лам’’иде, тахаби ти – ӈэдалэйни’. Ха’’алкот нина ханар санлы’’, ся’’амнан, лэмбаравнан саболод хавналъяд, лахацие’’ ӈэва’’ нимнани’ лэ’’мортарев’ пу’’лэяд’’.

Тэхэ’’ ӈэдалэйни’.