Тюку ирийна нюртей яляхана ӈармбэй ненэциена ӈарка ялям’ мэ’’ӈаваць. Ӈарка хибярина тарця ялям’ харто’ илӈганандо’, манзаравахандо’ недво’’мы’’ ӈэ’’ним. Мал’’ пыдо’ харто’ ӈэсынандо’ ӈэя, маркана ӈэя манзаравандо’ мальӈгана ныхыдо’ нись’ сяй сававна манзараць.
Ява’ сахарамбась нерняри’’ миӈаць. Тамальӈгы’’ похо’’на сибиць ванься’ ӈа’’. Ӈокаюв теда ӈармбэй хибярина сайнорма’ по’’ тенейдо’, ханяӈыдо’ тамальӈгана маля ӈарка хибяридрев’ манзаравыць. Ханяӈыдо’ сайнорма’ пуд евакоӈэ’ хаёсь мер’’ манзарась пядонзь. Тарця хибярина округханана тянё ниць’ ӈа, теда пыдо’ маля ӈармбэй хибяри.
Хусувэй хибяри илеванда мальӈгана ихиня сомбой вади’’ намдурпата тара. Ӈармбэй хибярина – хадунана, иринана, небянана, нисянана ӈэя хари’’ нюто’, нюто’ ню’’ таром’ хусувэй яля’ маниебнандо’, сава вади’’ намдурпато’, нядаӈговам’ ня’’амарпабнандо’.
Каменка ӈэсы ӈарка ни’’ӈа, таняна теда илена’’ хибяри’’ ӈокаювдо’ маля ӈармбэй хибяри’’. Маля ӈахакуд’ ни’’ манзара’’, нюдо’ вадавы’’, варёмдо’ мэць илевамдо’ мэ’’ӈадо’. Тикы ӈэсыхына маля самляӈг’ юкад’ вата по’’ ямбан Леонид Васильевич, Зоя Егоровна Лаптандерха’ илеӈаха. Пыди’ илеванди’ ямбан «Няръяна ты» колхозхана манзараӈахась. Леонид Васильевич ты’’пэртяӈэ’ тарась, сава манзаранаӈэ’ пилибт’ толысь. Неда Зоя Егоровна хорована манзарась, пыда ӈод’ манзаян’ сававна сырта несь. Теда пыди’ нюти’’ таром’ маниесь илеӈаха. Ӈарумы нюди’ ӈод нисямдо, небямдо нисьтыдо’ юрбю. Еримбнанда, мядоманзь турцеты, хусувэй тарана серкана нядаӈгосьты. Пыди’ нюди’’ сава хибяриӈэ’ вадэйдись.
Тюку по’ хор’’ирий’ сидндетимдей яляхана Зоя Егоровна Лаптандер мат’’ ю’’ самляӈг помда ядабтась. Тикы яляхана ӈока ихиня сомбой вади’’ няхататта, нюхутатта намдась. Теневана нида’’ ӈод тарця ялям’ нидось юр’’, няхандо’ сейхад’ лаханаць.
Зоя Егоровна ёнар’’ хасуюёнар’’ тет ю’’ сидндетимдей похона хор’’ ирий сидндетимдей толыркана Ӈюдя яхана мюсерта ненэцие мякана соявысь. Тамальӈгана нися’ хасада Егор Алексеевич Ледков сайнормахад’ то’’омахаданда «Няръяна ты» колхозхана ты’’пэртяӈэ’ таравысь. Небя’ хасадо’ Александра Ивановна хасавамда нядабась хойхана мюсерӈась. Мякана хусувэй не манзая’ няданда миӈась. Сайнорма по’’ пуд’ нюкцидо’ вадабась илець. Не нюкцядо’ нюдякоданда ныхында пирувна небямда нядабадаӈэ’ вадюданась. Тикахад’ нити’ пумна хой’ ӈацекы’’ нисяди’, небяди’ яӈгумаць. Евакоӈэ’ хаювы’’ ӈацекы’’ нерня хададо’ (нисяндо’ небя) вадамбидась. Ледков’ илелъядаць, таняна харто’ мято’ мярысь. Тикым’ Зоя Егоровна савовна тенеда. Небой’ похона Ледкован’ тэвормана мальӈгана, мято’ мярвы ям’ няна’’ манэ’’лабтамбидась. По’’ янамбовна нерняри’’ миӈаць. Зоя Егоровна школамда ёльцесь, тикахад’ манзара пядась, хаюпа хаясь. Пудана сян юд’ мян по’’ ямбан Каменкахана иле’’. Тикы ӈэсы – пыдо’ илесь яхадандо’ хая. Тюкохона илеванда ямбан манзарась, нюда вадамбись. Теда’ ӈод, хардахана илесь манзаясю’ нисьты. Пэртя’ серта пилибт’ танесеты – нюта ню’’ пэрцеты, сэдорасьты, надурта, та’ мальӈгана хой’ няку ӈодиманзь ядэрта.
Зоя Егоровна Лаптандер нямбар некоця, ядабтабнанд’ лахарёдо’ тянё нисьты’’ӈа’’, невхы по’’ илм’ сававна теневава.
Тюку яля’ Зоя Егоровнан’ сейхад ӈэда вади’’ мэ’’ӈадм: сямянд’ тарана’’ – сензан’ ӈа, хэвхананд’ мэна нид’ нёя’’ хаӈгур’’, сава ихиня хусувэй ялям’ ядабтамбю. Маймбась илевамд’ нерня минред’.
