Маля ӈока по’’ ямбан Россиянана толырто’ тянё хуркари’’ тенз’’ мэта ненэця’’ харто’ ӈарка ассоциациядо’ таня. Луца’’ вадавна нюмда таремъюв’ со’’: Всероссийская ассоциация коренных малочисленных народов Севера, Сибири и Дальнего Востока. Сидя ю’’ самляӈг по’’ тяхана толырто’ тянё ненэцие’’ хуркари серкана нядамбава’’ е’’эмня ӈадимясь.

Таӈок по’’ ямбан ассоциацияна серм’ нерня минренаӈэ’ сян хибяри’’ тараць, мат’’ яӈганя по’’ ямбан президентаӈэ’ Сергей Николаевич Харючи манзарась. Пыда манзараванда мальӈгана ассоциациява мэёвна ӈэта’’ни’’ нулъяць. Хусувэй тет по’’ ваерась ӈарка ассоциацияна съездаха’’ ма’’люрцетыва’’, тамальӈгана общественный организацияна сян по’’ ямбан манзаравам’ таслабсетыва’’, ӈобкана нерняна сертавнда серуна’’ ваде’’цетыва’’. Пуданамэвна ассоциацияна съездан’ сидя ёнар’’ няхар’’ яӈганя по’ март’ ирийхана ма’’люрӈаваць. Тамальӈгана Саля’хардхана’ яндахат’ товы’’ хибяри’’ манзараць. Ӈарка ассоциацияна манзаям’ нерня минревндаӈэ’ тикахана несэйм’ хибярим’ тэраваць. Пудана съездхана ассоциацияна президентаӈэ’ Григорий Петрович Ледковм’ тэраць. Маня’’ яхана соявы, Няръяна маркана вадюданась, маркы школам’ ёльцесь, тюкохона манзарась’ пядась. Тикахад’ сян по’’ ямбан Ямалкана илесь, таняна хуркари ӈарка манзаяхана манзарась. Тазовский район’ Гыда ӈэсыхы’ ервотаӈэ’ манзарась, тикахад «Гыданский» совхоз председательӈэ’ тарась. Манзаямда теневана хасавам’ районхана манзарана’’ ерв’’ сэвтэдось. Нюдякоця ӈэсыхыд’ нерня манзаравась Тазовский районан’ тэвыць. Таняхад’ Ямалкана илена’’ хибяри’’ РФ Государственной Дума депутатӈэ’ яхадандо’ тэрадось. Теда Григорий Ледков Москва маркана иле, депутат’ манзаянда’ хавна тамна Всероссийской ассоциацияна нерм’ пэртяӈэ’ манзара. Ассоциация’ манзарава нямна лаханась ня’’ӈавась. Пыда тарця вади’’ хэтась: – Мань’ сими’ ассоциацияна си’’ивумдей съездхана президентаӈэ’ тэраць, по’ вата маля манзарадм’. Сертавнда манзаина ӈока ӈэсьты’’. Сямянд’ нерде маня’’ толырто’ тянё ненэцие’’ илева яха’ тэворӈаваць. Ханзер’’ нина’’ харто’ яханандо’ иле’’, сэвханана манэ’’ӈаваць. Ассоциациява сян’ тенз’’ серу’’ тасламби’’: хуркари’’ мероприятия’’ хамандабива’’, экспертной манзаи’’ минрева’’, хурка Вато’’ ӈэрм’ яхана илена’’ хибяри’’ илӈгана тара тикым’ тасламбива’’; ӈани’я’ тер’’ хибяри’’ няюв манзарасьтыва’’. Маня’’ хибярина федеральной няби региональной власть’ поӈгана манзара’’. Тюку ирийхана Нью-Йорк маркана ООН штаб-квартирахана Всемирной конференция’ манзаравнда, тарця ма’’лёвахана ассоциацияна серм’ пэртя хибяри’’ манзараӈгу’’. Таняюв’ ӈэдалавнда’’ маля таславы’’.

Россиянана толырто’ тянё ненэця’’ сидя ю’’ мат’’ субъектхана иле’’, таняюв ӈэдалёрмана мальӈгана регион’ няюв нерня ӈобнзер’ манзарава’’ е’’эмня соглашении’’ падбива’’. Тарця соглашения’’ маля ӈока’’. Пилю’’ ирий’ си’’ивумдей толыркана Няръяна маркана Арктикахана илена’’ я’ тер’’ международной ма’’лёвадо’ ваерась, тамальӈгана теда губернатор’ манзаям’ пэртя Игорь Кошин’ няюв лаханакурӈамась. Нерняна маня’’ округна ерв’ няюв манзаравава тасламбиваць. Ненэцие’’ округхана ӈэрм’ ненэцие’’ сававна илева’’ е’’эмня тарана’’ Вато’, программа’’ маля таня’’, хибяри’’ е’’эмня манзара’’.

Няръяна мар’ мань’ со’’явы яв’. Тюкона нин’’ иле’’, харн’ яхан’пилибт’ харвась турцетыдм’. Тюку по’ тамна турман’ харвадм’, ся’’ха тутадм’ тедари’’ хэтась я’’амав’. Ненэцие’’ округ’ няюв сертавнда манзаина тянё ни’’ӈа’’, тюкохона сидна’’ хамадаби’’, нерня ӈобнзер’ манзаравась хамады’’.

Тюку по’ маня’’ округва сиднтет ю’’ самляӈг пода паны. Яв’ мань саць сахарамбив’, тюкохона индо’ лата’’, сава хибяри’’ иле’’. Ӈоб’ нерня ямда сахарамбась иледа’’. Яб’’ӈада’’, сензда’ ӈада’’, мань’ сава нин’’!