Вы здесь

Сё’’ мэ’’ӈаць, тараць, сяӈакуць

Е.П. Тайбарей хыноʼʼта неʼʼ маʼʼламбиʼʼ

Та’ мальӈгана ӈокаюв’ хибярина ныланасьтыд’, ныланавандо’ сер ӈани’’ ян’ тэворцеты’’. Валакада культурахана манзарана’’ хибярина таӈы ямбан манзаито’ нямна ӈэдалёрцеты’’. Тамальӈгана янда’’хана хуркари’’ фестиваль’’ танесеты’’, выставка’’манзарасьты’’.

Маня’’ округна культурам’ тю’’у минрена’’ нина’’ таӈы мальӈгана ныланавам’ ехэрасьты’’. Ненэцие’’ культурам’ пэртя’’ нина’’ поӈгана Екатерина Петровна Тайбарей манзара. Тикы не Краснойхана иле, ӈока по’’ ямбан нянэй ненэцие’’ культурам’ тю’’у пэрӈада. Харта ӈэсынанда ӈэрм’ тенз’ мэта’’ ненэцие’’ е’’эмня хуркари’’ мероприятия’’ хамадабсеты. Хойхана мюсерта’’ ненэциеда хэбидя’’ яляха’’на ӈобкана ма’’лабсеты’’, пыдо’ е’’эмняндо’ ныланава ялу’’ хамадабсеты. Манзаямда мэнена, теневана нява хусувэй серт’ ив’ ер сырта не. Харта мякнанда ӈод не нюда небяндо’ хэвхана хыно’’цеты, теда нюнда не нюкця хаданда няюв хыно’’ӈа, тара’’. Няръяна маркана сё’’ мэта’’ ӈацекы’’ поӈгана маниесьтына’’. Ӈацекыда ӈод , Екатерина Петровна, ненэцие’’ культурам’ теневадо’, небяндо’ хэвхана тохолабидо’.

Харта ӈэсынанда Екатерина Петровна вадам’ теневана’’ нита’’ няюв хусувэй ӈарка яляхана хыно’’манзь турцеты’’, пыдо’ нядандо’ ӈока ненэцие’’сём’ намдаваць. Пыда тамна харта музыкам’ падби, ханяӈы сёта вади’’ ӈобтарем’ харта падвыда.

Екатерина Петровна Тайбарей ӈани’’ культурахана манзарана’’ нита’’ тотрев’ хасенавам’ ехэрана хибяри. Манзараванда ямбан хуркари’’ мероприятияха’’ ӈэдалёрць ӈока ям’сюртесь. Тарем’ ӈод ваеравы таӈы мальӈгана ӈэдалёрмада танясь. Вэба’’ ирийхана Ленинградский областян’ тэворӈась, таняна луца’’вадавна хэтась: няхарамдэй Всероссийский фестиваль художественного творчества малочисленных финно-угорских и самодийских народов ваерась. Тарця фестивалян’ Санкт- Петербург’ март’ яндахат’’ товы’’ хуркари’’ творческой коллектив’’, хынокад’ , тарани’’ хибяри’’, инструментальной искусством’ минрени’’ , Россияна илени’’ финно-угорской, самодийской тензхад’ перена’’ хибяри’’ культурам’ манэ’’лабтамбади’’ маля няхарамдэймэвна ма’’ламбись. Тюку по’ тарця фестивалян’ Ленинградской, Мурманской, Псковской областьхад, Удмуртия, Карелия республикахад, Ямало-Ненецкий тамна Ханты-Мансийской округхад артист’’ турӈаць. Хусувэдо’ харто’ программыдо’ тэвравыць. Тарця фестиваль манзаямда вэба ирий маммамдэй толыркана Тосно маркана пядась. Концертной программа’’ хавна тамна конкурс подворий’’, мастер-классм’’ таняць.

Вэба ирий си’’ивумдей яляхана артист’’ харто’ программыдо’ Петергофхана Российской этнографической музейхана манэ’’лабтабидось. Маня’’округхадана тарця ӈарка фестивалян’ Екатерина Петровна Тайбарей не нюнда ненюкця Роксана няюв ӈэдалёрӈахась. Роксана Тайбарей самляӈг пота не ӈацекэця, хаданда няюв’ ненэцие’’ сёкоця’’ мэ’’ӈась. Я’’авлада не ӈацекы харвась хыно’’ӈа. Екатерина Петровна внучкамда тарана серт’ тохолабида. Фестивалькана мэвы’’ хибяри’’ маня’’ яхадана товы не ӈацекэцям’ саву’’ӈадось.

Нюртей Всероссийский фестиваль художественного творчества малочисленных финно-угорских и самодийских народов сидя ёнар’’юдимдей похона ваерась, тамальӈгана ӈэрм’ тенз’мэта хибяри’’ Зеленоград, Репино маркана программыдо’ манэ’’лабтаць. Нябимдей фестиваль сидя по’’ ваерась Выборг’ маркана ненэцие’’ ма’’ламбись.

Няхарамдэй фестиваль Ленинградской областьхана тюку по’ вэба ирийхана тет’’ яля’’ ямбан манзарась. Манзаямда хаювы ирий самлязимдей яляхана Тосно маркана пядась. Тет яля’’ ямбан хибяри’’ ӈока ихиняндо’ сомбой программы’’ манэ’’ӈаць. Финно-угорской, самодийской тензхад’ перена’’ хибяри’’ харто’ культурамдо’ Ленинградской областьхана манэ’’лабтабидось. Тетимдэй тарця фестиваль’ ненэцие’’ сидя по’’ ваерась ӈани’’ ма’’лаӈгу’’.